Pakico ser interesá den religion?

DEN tur país di mundo, tin un interés den religion. En cambio, tin hopi hende cu ta bisa mashá francamente cu nan no tin ningun interés den religion. Pero, nan semper a síntinan asina?

Naturaleza humano mes ta manifesta cu hende no ta keda realmente satisfecho cu cosnan material so. Hende tin mester di spiritualidad. Un existencia dia tras dia cu ta ser edificá rond di satisfaccion di simplemente necesidad física, cu tempo pa recreo de bez en cuando, no ta satisface henteramente e necesidad di curazón di hende. Distinto di bestia, hende kier sa, ‘Ki propósito bida tin?’ ‘E bida breve aki, cu ta inclui hopi cos cu ta bonita pero també hopi cos cu ta mahós, ta tur loke tin?’ Bo no a haci pregunta manera esei?

Sin embargo, hopi miyones di hende cu ta na bida awe a crece den ambiente cu a opone cualkier interés significante den religion. Tal influencia por a bini di nan mayornan, nan maestro, nan compañénan, of asta for di gobierno.

Skalabrino, un hoven di Albania, a splica cu bao di gobernacion comunista hende a wordu siñá cu no ta existi Dios. Además, tabata peligroso pa nan papia tocante religion; tal papiamento por a resulta den encarcelacion. Pero, na 1991, ora e tabata den Suiza como refugiado, e tabata duná e oportunidad di studia e Bijbel. El a acepta. Pakico?

Wel, na Albania el a tende cu a existi un buki tal como e Bijbel, pero e realmente no tabata sa nada di dje. Pues, na principio tal bez un deseo pa comprende e Bijbel no tabata primeramente loke a motivé. Aunque nan a bisé cu lo e studiá tocante e propósito di Dios pa humanidad i pe tera, e també a mira un estudio como un oportunidad pa mehora su uso dje idioma local. Pero, pronto el a haya cu loke e tabata siña a satisface un anhelo spiritual di curazón di dje. El a sinti un felicidad i placer ora el a siña tocante e promesa di Dios di un mundo nobo unda paz lo prevalece, un mundo den locual hende por biba pa semper i disfruta di un abundancia di tur loke ta necesario pa bida. Su interés a aumenta ora el a siña cu e i su famía por bira un parti dje mundo nobo. Tabata imposibel pe warda e bon nobo den su mes, p’sei el a yama su famía den Albania na telefón pa compartié cu nan.

Aleksei, cu ta biba den Rusia, també a haya sorpresa riba efecto cu conocimento exacto dje Bijbel por tene riba e bida di hende. Hogá cu problema i impotente pa haya un splicacion satisfactorio pe propósito di bida, el a planeá pa comete suicidio. Pero, promé el a bai Finlandia pa bishita un amigo. Riba camina den e trein, el a menciona su problema cu algun otro pasahero. Uno di nan tabata un Testigo di Jehova, cu a animé pa studia e Bijbel pasobra e ta duna solucion pa tal problema. Aleksei a keda dudoso. Riba e camina pa bolbe, e tabatin un experencia similar. E ora ei tabata un otro Testigo, un hende muher, cu a papia i a bisé cu e tabatin problema dje mesun clase pero cu e Bijbel a yudé resolvénan. E també a consehé pa studia e Bijbel. Ora el a yega cas, e telefón a ring. Un otro amigo tabata studia cu Testigo di Jehova i tabata mashá feliz. Aleksei tabata cuminza comprende cu kizás e Bijbel realmente por duné loke el a falta, pero e tabata sa cu sin yudanza e no por comprendé. El a conbiní pa tene un estudio bíblico di cas regularmente cu Testigo di Jehova, i a cuminza asisti na nan reunion. Pronto el a cuminza comprende pakico hende cu ta orientá nan bida rond di loke e Bijbel ta siña ta tanto feliz, aunque problema cu ta común pa humanidad ta enfrenta nan també.

Cu comprendimento penetrante di curazón humano, Jesucristo a bisa: “No ta cu pan so hende ta biba.” (Mateo 4:​4, Testament Nobo) El a bisa també: “Feliz ta hende cu ta consiente di nan necesidad spiritual.” (Mateo 5:⁠3) Nan ta haya felicidad pasobra nan ta intensamente consiente di nan necesidad, ta dal paso drechi pa satisfacénan, i ta experimenta e bendicion di Dios. Sin embargo, nos necesidad spiritual no ta keda satisfecho pa motibo cu nos simplemente ta bira miembro di un religion of ta bai misa. Un religion cu ta principalmente un ceremonia por satisface bo emocion, pero e ta duna solucion realista pa problema di bida? Aunque un religion ta siña cierto doctrina básico cu ta correcto, si e no ta trata directamente cu e berdadero propósito di bida, e por satisface bo necesidad spiritual? Asta di importancia mas grandi, e práctica di tal religion por resulta den un bon relacion cu Dios? Sin esei, lo bo falta berdadero satisfaccion.

En cuanto esei, hopi hende ta busca algo cu nan no a haya ainda.

[Caption on page 3]

Si bo bira miembro di un religion, esei por berdaderamente satisface bo necesidad spiritual?

[Caption on page 4]

Hopi hende a descubri cu ora nan ta comprende e Bijbel, bida ta haya un otro nificacion