Responsabilidad Ta Asociá Cu Conocimento Dje Religion Berdadero

“Feliz ta esnan cu ta tende e palabra di Dios i ta wardé!”​—⁠LUCAS 11:⁠28.

1. Despues di identifica e religion berdadero, cua clase di hende ta edifica nan bida rond di dje?

SIMPLEMENTE identificacion dje religion berdadero no ta basta. Si nos ta amante di loke ta husto i berdadero, despues di haya e religion berdadero, nos ta edifica nos bida rond di dje. E religion berdadero no ta simplemente un filosofía mental; sino ta un moda di biba.​—⁠Salmo 119:105; Isaías 2:3; compara cu Echo 9:⁠2.

2, 3. (a) Con Jesús a enfatiza e importancia di hacimento dje boluntad di Dios? (b) Tur hende cu ta conoce e religion berdadero tin cua responsabilidad?

² Jesucristo a enfatiza e importancia di haci loke Dios a revela di ser su boluntad. Den su conclusion di loke ta yamá e Sermón di Monte, Jesús a duna di conoce cu, tur hende cu ta yamé Señor (asina pretendiendo di ser cristian) lo no drenta den e Reino, sino solamente hende cu ta haci e boluntad di su Tata. Segun Jesús, otronan lo ser rechazá como “hacidor di maldad.” Pakico maldad? Pasobra manera e Bijbel ta bisa, ta picá pa hende keda sin haci e boluntad di Dios, i tur picá ta maldad. (Mateo 7:​21-23; 1 Juan 3:4; compara cu Romano 10:​2, 3.) Hende por sa cua ta e religion berdadero, nan por encomenda esnan cu ta siñé, nan por elogiá esnan cu ta practiqué, pero també nan tin e responsabilidad di apliqué den nan mes bida. (Santiago 4:17) Si nan ta acepta tal responsabilidad, nan lo haya cu nan bida ta mas ricu, i nan lo experimenta un gozo cu nan no por haya di ningun otro manera.

³ Den e artículo anterior, nos a considera seis dje marcanan di identificacion dje religion berdadero. Cada un di nan no solamente ta yúdanos identifica e religion berdadero sino també ta presenta na nos personalmente varios desafío i oportunidad. Di ki manera?

Con bo ta reacciona ne Palabra di Dios?

4. (a) Ora hende mas reciente ta cuminza asocia cu Testigo di Jehova, kico nan ta ripara pronto en cuanto e uso cu Testigo di Jehova ta haci dje Bijbel? (b) Con bon alimentacion spiritualmente ta afecta sirbidor di Jehova Dios?

⁴ Mientras cu Testigo di Jehova ta studia e Bijbel cu hende recién interesá, hopi di tal hende mas reciente ta discerni rápidamente cu e siñanza ei ta bíblico. Pa dúnanan contesta pa nan pregunta, nan no ta ser referí na credo religioso, ni na tradicion di hende, ni na opinion di hende prominente. E Palabra di Dios mes ta e autoridad. Ora nan ta bai Salón di Reino, nan ta ripara cu ei també e Bijbel ta e buki principal di siñanza. Pronto buscador sincero dje berdad ta realiza cu un factor principal pe gozo cu nan ta mira den Testigo di Jehova ta e echo cu nan ta bon alimentá spiritualmente for dje Palabra di Dios.​—⁠Isaías 65:​13, 14.

5. (a) Cua desafío ta presenta pa hende cu ta observa Testigo di Jehova? (b) Con nan por participa den e gozo di Testigo di Jehova?

⁵ Si bo ta reconoce esei, con bo ta reaccioná na dje? Si bo ta capta e sentido di dje, bo no por keda simplemente un dje mirones, ni bo no mester deseá di keda asina. E Bijbel ta mustra cu hende cu ta “scuchador so” pero no ta “hacidor dje palabra” ta ‘gaña nan mes cu razonamento falso.’ (Santiago 1:22) Nan ta gaña nan mes pasobra nan no ta reconoce cu apesar di loke nan por bisa, ora nan no ta obedece Dios, esei ta mustra cu nan realmente no ta stimé. Un pretension di fe cu no tin apoyo di obra ta un fe morto. (Santiago 2:​18-26; 1 Juan 5:⁠3) Na contraste, hende cu e amor pa Jehova Dios ta conmove pa ser “un hacidor dje obra” lo ser “feliz den su hacimento di dje.” Sí, manera Jesucristo a splica, “feliz ta hende cu ta tende e palabra di Dios i ta wardé!”​—⁠Santiago 1:25; Lucas 11:28; Juan 13:⁠17.

6. Si nos berdaderamente ta aprecia e Palabra di Dios, nos personalmente lo purba di probecha di cua oportunidad?

⁶ Tal gozo lo bira mas profundo mientras cu bo ta aumenta bo conocimento dje boluntad di Dios i ta aplica mas cos cu bo ta siña. Cuanto esfuerzo lo bo haci pa studia e Palabra di Dios? Diez di miles di hende cu no a conoce letter a traha duro pa siña leza, haciendo esei pa nan specialmente leza e Scritura i siñé na otro hende. Otro hende ta lanta madrugá tur maínta pa nan dedica algun ora tur dia na lezamento di Bijbel i buki cu ta yuda cu estudio bíblico, tal como E Toren di Vigilancia. Mientras cu bo ta haci lezamento sistemático di Bijbel of ta busca texto mencioná den buki di estudio, tuma nota cuidadoso di ley i mandamento di Jehova Dios, i purba di discerní e varios principio cu tin ei pa nos guía. Medita riba loke cada parti ta revela tocante Dios, tocante su propósito, i su tratamento cu humanidad. Permiti tempo pa esei moldeá bo curazón. Considera si tin manera pa bo aplica e conseho bíblico mas cabalmente den bo mes bida.​—⁠Salmo 1:​1, 2; 19:​7-11; 1 Tesalonicense 4:⁠1.

Bo debocion na Jehova Dios ta completo?

7. (a) Ki efecto e doctrina dje trinidad a tene riba esfuerzo di hende pa adora Dios? (b) Kico por sosode ora hende ta siña e berdad tocante Jehova Dios?

⁷ Pa miyones di hende, tabata un alivio pa nan siña cu e Dios berdadero no ta tres persona den uno. E splicacion “esei ta un misterio” nunca a satisfacénan. Con nan por hala cerca un Dios cu ta incomprendibel? Como resultado di tal siñanza, nan a keda incliná di ignora e Tata (kende su nomber nan nunca a tende den misa) i adora Jesús como Dios of dirigi nan adoracion na María (cu segun e siñanza cu nan a recibi ta “Mama di Dios”). Pero nan curazón ta responde cu gusto ora un Testigo di Jehova ta habri e Bijbel i ta mústranan e nomber personal di Dios, Jehova. (Salmo 83:18) Un señora venezolana a keda asina gozá cu e literalmente a braza e testigo hovencita cu a comparti tal berdad precioso cuné, i a conbini pa acepta un estudio bíblico di cas. Ora hende asina ta siña cu Jesús a menciona su Tata como “mi Dios i bo Dios” i cu Jesús a yama su Tata “e único Dios berdadero,” nan ta realiza cu loke e Bijbel ta siña tocante Dios no ta incomprendibel. (Juan 17:3; 20:17) Mientras cu nan ta yega di conoce calidad di Jehova, nan ta sinti un atraccion na dje, nan ta cuminza haci oracion na dje, i kier agradé. Cu cua resultado?

8. (a) Debí na nan amor pa Jehova i nan deseo pa agradé, kico miyones di hende a haci? (b) Pakico bautismo cristian ta vitalmente importante?

⁸ Durante e último diez aña, 2.528.524 hende riba seis continente i riba un cantidad di isla a dedica nan bida na Jehova Dios, anto a simboliza nan dedicacion cu bautismo bao di awa. Bo tabata uno di nan, of bo ta prepara awor pa bautiza? Bautismo ta un suceso importante den e bida di tur cristian berdadero. Jesús a comisiona sigidor di dje pa haci disípel di hende di tur nacion i bautizánan. (Mateo 28:​19, 20) Ta notable també cu net despues dje bautismo di Jesús mes cu Jehova Dios personalmente a papia foi cielo, bisando: “Bo ta mi Yiu, esun stimá; mi a aprobá di bo.”​—⁠Lucas 3:​21, 22.

9. Pa nos mantene un relacion aprobá cu Jehova Dios, kico ta necesario di nos parti?

⁹ Un relacion aprobá cu Jehova Dios ta algo pa mantene cu aprecio. Si bo a drenta den tal relacion via dedicacion i bautismo bao di awa, evita tur loke por empeora tal relacion. No permiti ansiedad di bida i preocupacion riba cosnan material hala tal relacion na un lugar segundario. (1 Timoteo 6:​8-12) Berdaderamente biba na armonía cu e conseho di Proverbio 3:6: “Den tur bo caminanan tuma nota di [Jehova], i e mes lo haci bo berea stret.”

Ki profundamente e amor di Cristo ta afectábo?

10. Pakico nos adoracion di Jehova Dios no ta hácinos ignora Jesús?

¹⁰ Naturalmente, e aprecio correcto pa Jehova como e único Dios berdadero, no ta haci hende ignora Jesucristo. Al contrario, Revelacion 19:10 ta bisa: “E dunamento di testimonio di Jesús ta loke ta inspirá profetizamento.” For di Génesis te na Revelacion, profecía inspirá ta duna detaye dje papel di Jesucristo den e propósito di Jehova Dios. Mientras cu hende ta yega di conoce tal detaye, un cuadro fasinante ta presenta cu ta liber di confusion i concepto malu cu a resulta di siñanza falso di cristiandad.

11. Con e siñanza di loke e Bijbel realmente ta siña tocante e Yiu di Dios a afecta un señora na Polonia?

¹¹ Comprendimento dje berdad tocante e Yiu di Dios por tene un efecto profundo riba hende. Esei tabata e caso cu Danuta, un señora di Polonia. El a mantene contacto cu Testigo di Jehova pa ocho aña, disfrutando di loke nan ta siña, pero sin haci e adoracion berdadero su moda di biba. Anto el a recibi un copia dje buki E homber mas importante cu hamás a biba, locual ta presenta e bida di Cristo na moda fácil pa comprende.a Den anochi, el a habri e buki cu intencion di leza un capítulo so. Pero, e no a cera e buki te cu dia a habri, ora el a caba di lezé. El a cuminza yora. El a pidi, “Jehova, pordonámi.” Como resultado di loke el a leza, el a mira mas claramente cu nunca na antes e amor cu Jehova i su Yiu ta mustra. El a realiza cu pa ocho aña e tabata aparta malagradicidamente for dje yudanza cu Dios cu pacenshi tabata extende na dje. Na 1993 el a bautiza como símbolo di su dedicacion na Jehova Dios riba e fundeshi di fe den Jesucristo.

12. Con e conocimento exacto di Jesucristo ta afecta nos bida?

¹² “Conocimento exacto di nos Señor Jesucristo” ta asociá cu e bida di hende cristian activo i fructífero. (2 Pedro 1:⁠8) Te na ki grado lo bo tene un parti den tal actividad, compartiendo e mensahe di Reino cu otro hende? Hopi circunstancia ta afecta cuanto un hende por haci. (Mateo 13:​18-23) Nos no por cambia algun circunstancia; pero por cambia otronan. Kico por motivános pa identifica i haci cambio cu por ta hací? Apóstol Pablo a skirbi: “E amor cu Cristo tin ta obligános”; es decir, e amor cu el a demonstra entregando su bida pa nos ta asina sobresaliente cu segun cu nos aprecio di esei ta aumenta, nos mes curazón lo ser conmoví profundamente. Como resultado, nos ta realiza cu ta sumamente inapropiado pa nos sigi continuamente tras di meta egoísta i biba principalmente pa agrada nos mes. Mas bien, nos ta ahustá nos asuntonan pa duna e promé lugar ne trabao cu Cristo a siña su disípelnan pa haci.​—⁠2 Corintio 5:​14, 15.

Apartá for di mundo​—⁠te na ki grado?

13. Pakico nos no mester deseá di tene parti den un religion cu ta haci su mes un parti di mundo?

¹³ No ta difícil pa mira e fama di cristiandad i di otro religion pa motibo cu nan ta deseá di ser un parti di mundo. Nan ta usa fondo dje iglesia pa financiá actividad revolucionario. Pastor ta bira guerrillero. Dia tras dia, corant ta publica informe tocante partido religioso den varios parti di mundo cu ta bringa contra otro. Nan man ta sushá cu sanger. (Isaías 1:15) Mundialmente e clero ta sigi purba di manipula e situacion político. Adorador berdadero no ta tene parti den esei.​—⁠Santiago 4:​1-4.

14. (a) Kico nos mester evita personalmente pa nos keda separá for di mundo? (b) Kico por yúdanos evita caimento den trampa di actitud i práctica di mundo?

¹⁴ Pero, separacion for di mundo ta enbolbe mas cu esei. E mundo ta ser caracterizá pa amor pa placa i loke placa por cumpra, e deseo pa prominencia personal, i sigimento sin fin tras di placer, hunto cu cosnan tal como falta di berdadero interés den otronan, gañamento i zundramento, rebelion contra autoridad, i un falta di ehercicio di dominio propio. (2 Timoteo 3:​2-5; 1 Juan 2:​15, 16) Debí na nos mes imperfeccion, tin bez cu di algun manera nos por reflexioná riba cierto inclinacion asina. Kico por yúdanos den nos lucha pa evita tal trampa? Nos tin cu haci nos mes corda ken ta responsabel pa tal inclinacion di mundo. “E mundo henter ta bao di poder dje malbado.” (1 Juan 5:19) No ta importá ki tentador un cierto camina por parce, no ta importá cuanto otro hende ta biba asina, ora nos ta mira cu Satanás e Diabel, e enemigo principal di Jehova Dios, ta tras di dje, nos ta realiza ki mahós tal camina tá.​—⁠Salmo 97:⁠10.

Ki leu bo amor ta yega?

15. Con e amor sin egoísmo cu bo a mira a yudábo identifica e religion berdadero?

¹⁵ Ora na principio bo a cuminza asociá cu Testigo di Jehova, e amor manifestá den nan sin duda a atraébo pa motibo di su contraste cu e spiritu di mundo. Énfasis riba amor sin egoísmo ta haci e adoracion puro di Jehova Dios diferente cu tur otro forma di adoracion. Tal bez esei ta loke a convencébo cu Testigo di Jehova en berdad ta practica e religion berdadero. Jesucristo mes a bisa: “Cu esei tur hende lo sa cu boso ta mi disípelnan, si boso tin amor den boso.”​—⁠Juan 13:⁠35.

16. Cua oportunidad por tin pa nos individualmente extende nos amor?

¹⁶ Tal calidad ta identificábo també como un disípel di Cristo? Tin manera cu bo por extendébo demonstrando amor? Sin duda; nos tur por haci esei. Amor ta encerra mas cu simplemente cariño pa otro hende den Salón di Reino. I si nos ta extende amor solamente na hende cu ta stima nos, ki diferencia tin entre nos i hende di mundo? E Bijbel ta urgínos: “Sobre todo, tene amor intenso un pa otro.” (1 Pedro 4:⁠8) Na ken nos por mustra mas amor? Pa un ruman cristian homber of muher di otro circunstancia i cu tin manera di haci cierto cosnan cu ta irritános? Pa un persona cu, como resultado di enfermedad of behez, no por asisti na reunion regularmente? Pa nos casá? Of, kizás, pa nos mayornan di edad? Algun ruman cu tabata haci bon manifestando e fruta di spiritu, incluyendo amor, a kere cu nan tabata siña tur esei di nobo ora nan a contra cu un situacion mashá dificultoso cu por presenta den dunamento di cuido casi total na miembro di famía cu a bira severamente incapacitá. Naturalmente, ora tal circunstancia ta enfrentános, nos amor també mester yega mas ayá cu nos mes famía.

Dunamento di testimonio dje Reino ta ki importante pa bo?

17. Si nos personalmente a recibi beneficio di bishita di Testigo di Jehova, nos mester síntinos conmoví pa haci kico?

¹⁷ Un manera importante pa nos demonstra nos amor pa nos próhimo ta door di dúnanan un testimonio tocante e Reino di Dios. Tin un solo grupo di hende cu ta haci e trabao cu Jesús a profetiza. (Marco 13:10) Esei ta Testigo di Jehova. Nos a beneficiá di esei personalmente. Awor ta nos privilegio pa yuda otro hende. Si nos tin e punto di bista di Dios dje asunto, e trabao di duna testimonio di Reino lo ser prominente den nos bida.

18. Con lezamento dje buki Los testigos de Jehová, proclamadores del Reino de Dios por influenciá nos mes parti den e dunamento di testimonio dje Reino?

¹⁸ E relato emocionante dje manera cu e mensahe di Reino ta ser hibá na parti mas remoto dje tera durante e último dianan aki ta ser contá den e buki Los testigos de Jehová, proclamadores del Reino de Dios. Si ta disponibel den bo idioma, no keda sin lezé. I ora bo ta haci esei, tuma nota special di tur manera den locual hende individual a participa den dunamento di testimonio dje Reino. Tin ehempel di algun cu bo por imita? Tin hopi oportunidad habrí pa nos tur. Laga nos amor pa Jehova Dios conmovénos pa probecha di nan tur.

19. Cua beneficio nos ta recibi ora nos ta acepta e responsabilidad cu conocimento dje religion berdadero ta duna?

¹⁹ Ora nos ta aplica nos mes asina ne hacimento dje boluntad di Jehova, nos ta haya e contesta pe pregunta, Ki nificacion bida tin? (Revelacion 4:11) Nos no ta den scuridad mas, hibando un bida di banidad. No tin un ofishi na locual bo por dedicábo cu por duna mas felicidad cu e aplicacion di bo mes cu tur bo curazón ne sirbishi di Jehova Dios. I ki un futuro magnífico esei ta ofrece! Un eternidad di bida di satisfaccion den e mundo nobo di Dios, unda nos por usa nos facultad plenamente na armonía cu e propósito amoroso pa locual Dios a crea humanidad.

[Footnotes]

Con bo ta contestá?

◻ Pakico ta vital pa un religion acepta e Bijbel como e Palabra di Dios i onra Jehova como e Dios berdadero?

◻ Kico e religion berdadero ta siña en cuanto e papel di Jesús como Rescatador?

◻ Pakico hende cristian mester keda apartá for di mundo i practica amor sin egoísmo?

◻ E dunamento di testimonio tocante e Reino ta hunga cua papel den e religion berdadero?

[Caption on page 16]

Bautismo ta un paso vital den aceptacion di responsabilidad dje adoracion berdadero. Cada luna, mas cu 25.000 hende mundialmente ta dal tal paso

Rusia

Senegal

Papua Nueva Guinea

E. U. A.

[Caption on page 17]

Compartimento di berdad bíblico cu otro hende ta un parti dje adoracion berdadero

E. U. A.

Brasil

E. U. A.

Hong Kong