Mirando Cu Aprecio n’e “Cas di Dios”

“UN COS mi a pidi Jehova​—⁠esei ta loke lo mi busca, cu mi por biba den e cas di Jehova tur e dianan di mi bida, pa contemplá e agradabilidad di Jehova i pa mira cu aprecio na su tempel.”​—⁠Salmo 27:⁠4.

Rey David apreciativo a mira cu placer, of deleite, n’e tempel di Jehova. Bo ta sinti di igual manera tocante centronan di adoracion berdadero awe? E mas cu 95 casnan di Betel na sucursalnan dje Sociedad Watch Tower ta entre e facilidadnan cu ta ser asociá cu e adoracion di Jehova den nos tempu.

“Mirando bek riba mi hopi añanan di sirbishi di Betel ta yená mi cu profundo gratitud i gran aprecio, cua a crece di aña pa aña,” Helga ta splica, kende a cuminsá traha n’e cas di Betel na Alemania na 1948. Helga ta un dje 13.828 trahadornan di Betel gososo rond mundu kendenan den e aña di sirbishi di 1993 a “contemplá e agradabilidad di Jehova.” Kico exactamente e nomber Betel ta nificá? Con cada Testigo di Jehova, sea e ta sirbi Dios den Betel of pafó, por mira cu aprecio n’e areglo aki?

Un Nomber Cu Ta Exigí Debocion

“Betel” ta un nomber masha apropiado, ya cu e palabra hebreo Behth-ʼElʹ ta nificá “Cas di Dios.” (Génesis 28:​19, nota abou) Sí, Betel ta representá un cas bon-organisá, of ‘un cas construí cu sabiduria,’ cu Dios i su boluntad siendo e centro di atencion. (Proverbio 24:⁠3) “E ta manera biba den un famia. Nos tin un rutina diario bon-organisá,” Herta ta bisa apreciativamente. E ta sirbiendo n’e mésun Betel cu Helga pa mas cu 45 aña. Cada miembro dje famia grandi aki tin su funcion i su lugá, permitiendo e pa sinti’é felis i sigur. Consistente cu e nomber Betel, bon areglo i organisacion ta caracterisá cada un dje departamentonan. Esaki ta promové pas, ta haci predicacion eficas dje bon nobo posibel, i ta duna e congregacionnan bon motibu pa apreciá e “Cas di Dios” profundamente.​—⁠1 Corintio 14:​33, 40.

Pakico tal facilidadnan ta necesario? E revista aki, por ehempel, a ser producí den un imprenta di Betel. E predicacion dje mensahe di Reino i e distribucion di alimento spiritual, ámbos premirá dor di Jesucristo, ta haci areglo organisacional manera Betel indispensabel​—⁠apoyá dor di trahadornan boluntario i apreciá mashá dor di tur adorador di Jehova.​—⁠Mateo 24:​14, 45.

Lo bo kier siña mas tocante e rutina di trabou di un dia aki na Betel? Caminda Helga i Herta ta biba, un bel melodioso ta zona den tur e edificionan di habitacion 6:30 a.m., aunke hopi dje mas cu 800 trahadornan regular ta lanta asta mas trempan pa prepará p’e dia. Pa 7:00 a.m., di djaluna te djasabra, e famia ta reuní den e comedornan pa un consideracion dje texto di dia, of adoracion di mainta. Un desayuno nutritivo ta sigui. Cada dia di trabou ta cuminsá 8:00 a.m. i ta dura ocho ora, interumpí solamente pa un pausa pa cuminda di merdia. (Normalmente e famia ta traha mitar dia riba djasabra.) Sea ta den cushina, imprenta, labanderia, oficina, shop, fábrica di buki, of cualkier otro departamento, tin hopi trabou.

Durante anochi i den fin di siman, miembronan dje famia ta asociá cu e congregacionnan local na reunionnan i den predicacion público. Hopi ruman homber betelita ta anciano of sirbidor ministerial den e congregacionnan aki. E Testigonan local berdaderamente ta apreciá e cooperacion aki, ámbos grupo trahando huntu armoniosamente como un cuerpo, cu respet i comprendimentu mutuo. (Colosense 2:19) Cada trahador di Betel sa cu su asignacion den e “Cas di Dios” tin prioridad riba otro actividadnan. Sin embargo, entusiasmo pa predicacion i enbolbimentu cu e congregacion, combiná cu un actitud balansá, ta fortalecé spiritualidad dje trahador di Betel, ta aumentá su goso i ta haci’é un miembro mas productivo dje famia. Ki crucial e cualidadnan aki ta ora di traha den un “cas” cua su nomber ta ligá cu debocion di henter alma!

Haciendo Sirbishi di Betel un Exito

Kico a yuda numeroso Testigo di Jehova haci sirbishi di Betel un éxito? Miembronan di famia di Betel na Francia cu hopi aña di experencia ta comentá lo siguiente: “Amor pa Jehova. Tene e determinacion pa perseverá unda cu e pone nos; humildad, sumision i obedencia n’e direccion cu e Sociedad ta duna nos.” (Denise) “Mi a ripará ki importante ta pa respetá e principio cu Pablo a mencioná na Romano 12:10: ‘Den mustra onor un na otro, hiba delantera.’ E texto aki ta mustra nos e importancia pa no insistí pa nos opinion personal ser aceptá, sino, mas bien, tuma e opinion di otronan na consideracion. Cu otro palabra, no buscando superioridad.” (Jean-Jacques) “Nos respet pa sirbishi di Betel lo por ser ruiná si nos mira cosnan for di un punto di bista carnal i humano,” Barbara ta bisa, “pasobra esaki por hiba nos na perde bista dje echo cu Jehova ta dirigiendo su organisacion. Un respet asina por bai perdí si nos trompecá riba e imperfeccionnan di otronan.”

Tur hende na Betel ta imperfecto, pues mester tene cuidou cu asociacion. Hóbennan of esnan cu a drenta recientemente ta haci bon di no limitá nan asociacion solamente na nan pareunan. Esnan cu kisas ta manifestá un tendencia di keha of pensa negativamente no ta compania edificante den Betel of den e congregacion. Na otro banda, imitando e “sabiduria djariba,” describí na Santiago 3:​17, ta trece bendicion. Esaki ta “primeramente decente, anto pacífico, razonabel, cla pa obedecé, yen di misericordia i bon fruta, no haciendo distincion parcial, no hipócrita.” Tal cualidadnan, huntu cu gran pacenshi i bondad, ta notabel den e “Cas di Dios,” haciendo un persona su permanencia ei agradabel i stimulante. Asta bishitantenan no-Testigo hopi biaha ta expresá admiracion p’e bon conducta, amabilidad i spiritu gososo dje trahadornan.

Anny, kende tin mas cu 70 aña di edad i ta un miembro dje famia di Betel na Alemania desde 1956, ta splica con e ta mantené su prontitud pa sirbi: “Pa mi bienestar spiritual, mi ta haci hopi esfuerso pa tené mi na haltura dje publicacionnan dje Sociedad, pa asistí n’e reunionnan regularmente, i pa participá regularmente den predicacion. Tambe mi ta purba keda den bon condicion físico dor di haci ehercisio tur mainta, dor di evitá di usa lift mayoria bes i dor di cana mas tantu posibel, specialmente den sirbishi di veld.”

Hopi ruman cu experencia den bida na Betel lo ta di acuerdo cu Anny. Nan nunca ta caba di siña, nunca ta stop di traha. Salú físico ta exigí pa nan haña suficiente soño i algun ehercisio, i ser moderá den comementu i bebementu. Mas importante cu tur, nan no ta neglishá oracion personal i studio di Bijbel.

Respet Haltu pa Sirbishi Sagrado den Betel

“Unda bo ta traha?” ta un pregunta generalmente hací na miembronan di Betel. Asignacionnan di trabou ta varia, pero cada un ta merecé e respet haltu di tur persona. Pakico? Pasobra cada asignacion​—⁠sea ta trahando na un mashin cu ta imprimí alimento spiritual, labando paña, cushinando i limpiando p’e famia of haciendo trabou di oficina​—⁠ta constituí un sirbishi sagrado. Manera a ser mencioná ariba, cristiannan no ta haci distincion parcial. Corda cu tur deber necesario efectuá dor dje sacerdotenan i levitanan n’e tempel, den su pationan i comedornan, a ser considerá sirbishi sagrado na Jehova. Esei a incluí matamentu i preparacion di bestia pa sacrificio, yena lampi di zeta, asta limpiamentu i efectuá debernan di vigilante. Di igual manera, cada asignacion na Betel ta un actividad satisfaciente i balapena “den e trabou di Señor,” pues un privilegio excepcional.​—⁠1 Corintio 15:⁠58.

Considerá brevemente un cualidad cu por prevení nos di mira cu aprecio n’e “Cas di Dios.” Hende cristian tantu den Betel como pafó mester vigilá contra envidia i yaluzí, cuanan ta “putrimentu na wesu.” (Proverbio 14:30) Ningun persona tin motibu pa envidiá privilegionan di sirbishi di trahadornan di Betel. Ademas, no tin lugá den un famia di Betel pa yaluzí, cua ta un dje obranan di carni. Spera humildemente​—⁠esei ta conseho sano pa un persona cu por parce di a ser pasá por haltu miéntras otronan ta ricibí mayor privilegionan. Loke ta mas, personanan cu antecedencia financiero masha diferente for di otro ta biba cerca otro huntu den Betel. Ta ki frustrante si un persona ta mira su circunstancianan “den comparacion cu e otro persona”! Kedando satisfecho cu “di come i bisti” a yuda hopi persona pa sigui fielmente pa décadanan den e “Cas di Dios.”​—⁠Galatio 5:​20, 26; 6:4; 1 Timoteo 6:⁠8.

Testigonan di Jehova i miyones di otronan ta saca masha beneficio for dje servicionan sin pago grátis, pornada cu ta ser efectuá na Betel​—⁠trabou cu ta ser hací inegoistamente debí na amor pa Dios i próhimo. E casnan di Betel i imprentanan dje Sociedad Watch Tower, mescos cu otro facilidadnan teocrático, ta ser financiá dor di contribucionnan boluntario. (2 Corintio 9:⁠7) Mescos cu Rey David i e prinsnan i hefenan di Israel, nos por mustra nos admiracion i aprecio p’e “Cas di Dios” dor di duna sosten moral i financiero n’e Sociedad. (1 Crónica 29:​3-7) Laga nos mira awor con ta posibel pa “contemplá e agradabilidad di Jehova” na Betel.

Bendicionnan den e “Cas di Dios”

Ora bo ta asistí na un asamblea, bo no ta sinti un contentamentu profundo, cu adoradornan felis di Jehova rond di bo? Djis imaginá, un trahador di Betel tin e privilegio di sirbi Jehova meimei di un grupo di ruman tur dia! (Salmo 26:12) Ki un excelente prospecto pa crecementu spiritual esei ta ofrecé! Un ruman homber a remarcá cu el a siña mas pa yud’é forma su personalidad den un aña na Betel cu den tres aña otro caminda. Pakico? Pasobra ningun otro caminda e tabatin e oportunidad pa observá i imitá e fe di asina tantu personalidad cristian maduro.​—⁠Proverbio 13:⁠20.

Na Betel un persona ta rondoná dor di conseheronan experenciá, na moda di papia. Ademas, tin e beneficio di tende comentarionan bon-prepará presentá durante adoracion di mainta i n’e studio di famia di Betel dje Toren di Vigilancia i ora di scucha na discursonan riba djaluna anochi. Esnan cu a caba di drenta Betel ta haña instruccion den e Scol di Admision na Betel i ta ser asigná pa lesa henter e Bijbel den e promé 12 lunanan.

Informenan i experencianan di bishitantenan di otro paisnan ta ofrecé mas animacion. Ademas, miembronan dje Cuerpo Gobernante of nan representantenan ta bishitá e oficinanan di sucursal. Helga ta refleccioná: “Aunke e rumannan tin hopi di haci, semper nan ta saca tempu pa un palabra amigabel of un sonrisa.” Ki un animacion pa contemplá personalmente e manera refrescante i modesto di hendenan leal asina!

Specialmente na Betel bo por observá djacerca con e organisacion di Dios ta funcioná i con su spiritu santu ta stimulá curasonnan i mannan boluntario na accion. “Na Betel bo ta sintí bo mas cerca di ‘e candela di cushina,’ ” un ruman ta splica, kende ta sirbiendo na Betel na Francia desde 1949. E ta sigui: “Mi por bisa berdaderamente cu pa mi, Betel ta e forma di sirbishi di tempu completo cu ta permití mi dedicá e máximo cantidad di tempu i fortalesa n’e sirbishi di Jehova i pa sirbi e mayor cantidad di rumannan.” I no ta esei ta nos berdadero propósito den bida​—⁠pa haci e boluntad di Dios? Na Betel bo por “ofrecé alabansa henter dia.” Ki un bendicion!​—⁠Salmo 44:⁠8.

Manera nos a descubrí, un persona cu ta traha den un cas di Betel por contemplá e agradabilidad di Jehova i haña un gran variedad di bendicion. (Hebreo 6:10) Sirbishi n’e “Cas di Dios” por ta algu balapena pa bo? Esnan entre Testigonan di Jehova cu ta por lo ménos 19 aña di edad, kendenan ta disfrutá di bon salú spiritual i físico, i kendenan, manera Timoteo, tin “bon informe dje rumannan” por aplicá pa sirbi na Betel. (Echo 16:⁠2) Hopi persona a haci sirbishi na Betel e trabou di nan bida, manera esnan cu nos a cita anteriormente. Pa nan e anhelo profundo dje salmista​—⁠pa ‘biba den e cas di Jehova tur e dianan di su bida’​—⁠a bira realidad.

Testigonan di Jehova tin hopi respet p’e spiritu di sacrificio propio cu nan rumannan homber i muher ta demostrá na Betel, kendenan ta cumpli cu asignacionnan tantu boluntariamente como gososamente. Sea cu nos ta sirbi Jehova na Betel of otro caminda, cada un di nos tin bon motibu pa sinti mescos cu Rey David a sinti​—⁠pa mira cu aprecio, of deleite, n’e “Cas di Dios.”

[Caption on page 31]

E cristiannan aki a haña deleite den sirbishi sagrado na Betel na Alemania pa décadanan