Bo Por Haci Bo Mes Disponibel?
1 Un suceso extraordinario a tuma lugá na aña 778 P.E.C. Den vision, profeta Isaías ta mira “Jehova, sintá riba un trono haltu i elevá.” Anto Isaías ta tende e serafinnan hala atencion na Jehova su gloria, bisando: “Santu, santu, santu ta Jehova di ehércitonan.” Ki impresionante esei lo mester tabata! Den e marco di circunstancia ei, Jehova ta lansa un pregunta desafiador: “Ken lo mi manda, i ken lo bai pa nos?” No a duna niun splicacion en cuanto ki clase di asignacion e ta ni si e persona cu ofrecé su mes lo tin ganashi cuné. Sin embargo, sin vacilá Isaías ta respondé: “At’ami akí! Manda mi.”—Isa. 6:1, 3, 8.
2 E spiritu aki di ta dispuesto pa haci loke sea Jehova ta pidi, ta caracterisá su pueblo. (Sal. 110:3) I awor ta sali un yamada special na esnan cu por haci nan mes disponibel. Abo ta cla pa respondé cu un spiritu dispuesto, similar na esun di Isaías?
3 Debí n’e gran potencial pa aumento cu tin den nos teritorio, tin un necesidad pa rumannan haci nan mes disponibel. Disponibel pa kico? Pa sirbi Jehova den sirbishi di tempu completo. Esaki ta rekerí un deseo intenso pa pone interesnan di Reino na promé lugá i pa ta dispuesto pa haci loke sea ta ser rekerí pa apoyá e trabou mundial di predicá. (Mat. 6:33) De echo, sirbishi di tempu completo ta un oportunidad único pa un persona sirbi Jehova di henter alma. Esei ta yuda nos siña conocé Jehova su organisacion mas djacerca.
4 Bendicionnan di Sirbishi di Betel: Sirbishi di Betel ta un posibilidad di sirbishi di tempu completo cu ta ser efectuá asta den e teritorio di nos sucursal. Con esnan cu ta sirbi na Betel ta sinti tocante nan privilegionan di sirbishi? Tuma nota dje siguiente comentarionan.
5 Un ruman homber, refleccionando riba e entrenamentu cu el a ricibí, ta bisa: “E echo cu mi a siña conocé mi mes i haña sa riba kico mi tin cu traha anto caba desaroyá e cualidadnan ei tabata un gran bendicion. Mi ta sinti cu awor mi por sirbi Jehova mas mihó. Mi ta haña cu mi tin un tiki mas pacenshi, un tiki mas dominio propio i mi por mustra mas amor.”
6 Un ruman muher ta pensa riba e bendicionnan cu el a ricibí te cu awor: “E programanan spiritual cu tin akinan a siña mi mas tocante Jehova i con mi por imit’é mihó den pensamentu, sintimentu i accion. I dor cu e entrenamentu ta continuo, e bendicion ta continuo.”
7 Un otro ruman homber a mencioná: “Nos ta logra hopi dor dje rutina di bida cu nos tin. . . . No tabatin ni un dia cu mi a bin trabou i no a disfrutá di loke mi a haci. Ademas nos tin e satisfaccion di sa cu ‘nos a haci loke nos tabatin deber di haci.’ ”—Luc. 17:10.
8 Un otro ruman, cu tin 62 aña den sirbishi di tempu completo, a bisa: “Nunca a duel mi ni pa un seconde cu mi a haci sirbishi di tempu completo e carera di mi bida. Esta un goso e tabata di por a mira i participá den e gran crecementu di Jehova su organisacion terenal!”
9 Rekisitonan pa Sirbishi di Betel: E rekisitonan básico pa esnan cu ta aplicá pa sirbishi di Betel ta den e cuadro na página 4. Ademas, ta masha importante pa nan ta dispuesto pa traha duru, i no ta “stimadó di placer.” (2 Tim. 3:4; 1 Cor. 13:11) Miembronan dje famia di Betel mester ta hende homber i hende muher spiritual cu a desaroyá bon custumbernan personal di studio i cu a entrená nan facultadnan perceptivo pa “distinguí tantu loke ta bon como loke ta malu.” (Heb. 5:14) Nan mester a desplegá madures cristian caba den tur área di bida, incluso pa loke ta nan bistí, areglo personal i escoho di música i entretenimentu. Miembronan di famia di Betel di curason dispuesto ta sirbi unda cu tin mester di nan. Por lo general ta duna miembronan mas hóben asignacionnan cu ta encerá trabou físico, manera entre otro prepará i manda carga di literatura, den mantenimentu, den limpiesa, labanderia i preparacion di cuminda. (Pro. 20:29) Cada asignacion ta duna gran satisfaccion pasobra e ta sirbishi sagrado cu ta duna gloria na Jehova.—Col. 3:23.
10 Necesidadnan Actual: Aunke esei no ta un rekisito, ta duna preferencia na rumannan cu ta pionero regular, ya cu nan ta den e trabou di tempu completo caba. Nos ta animá rumannan cu kisas ta un poco riba 35 aña di edad i cu tin abilidad i entrenamentu specialisá cu lo por ser usá na Betel, pa aplicá.
11 Si bo aplicá i no ser invitá pa sirbi na Betel, no desanimá. Bo por considerá pa renobá bo aplicacion un biaha pa aña. Algun ruman cu cierto entrenamentu i abilidad special cu kisas Betel tin mester, a haci nan mes disponibel pa sirbishi boluntario temporal.
12 Hóbennan, Prepará Boso Mes Awor pa Sirbishi di Pionero Regular of Sirbishi di Betel: Preparacion pa sirbishi di pionero regular of di Betel ta cuminsá hopi promé cu un persona yega un cierto edad rekerí. Kico hóbennan por haci pa prepará nan mes pa sirbishi di pionero regular of pa otro sirbishi di tempu completo? Jesus a bisa: “Cua di boso cu kier traha un toren no ta sinta promé i calculá e gastu?” (Luc. 14:28) Siendo cu preparacion i planificacion ta vital pa e éxito di cualkier proyecto di construccion, ta masha importante pa hóbennan considerá cuidadosamente con nan ta trahando riba nan futuro den Jehova su sirbishi! Mester pone un fundeshi sólido for di trempan den bida pa nan por alcansá metanan spiritual. Como hóben, con bon bo ta poniendo bo fundeshi? Si bo tin gana di sirbi Jehova den trabou di tempu completo, lo bo beneficiá si bo considerá lo siguiente cu sumo atencion.
13 “Traha Lugá” pa e Privilegio Special aki di Sirbishi: Manera ta pará skirbí na Mateo 19:12, Jesus a animá su disipelnan pa “traha lugá” pa un bida soltero. Di con? No pa motibunan personal, sino “pa causa dje reino di shelu.” Pablo tambe a animá e curso di ta “den sirbishi constante pa Señor sin distraicion.” (1 Cor. 7:32-35) Desafortunadamente, hopi hóben ta perde e privilegio di sirbi como pionero regular of como soltero na Betel dor cu nan ta casa yong. Nos kier animá nos rumannan yong pa usa nan energia den e ministerio di tempu completo tanten cu nan ta liber ainda di responsabilidadnan di famia. Anto si despues di un periodo di tempu nan dicidí di casa, nan lo ta un mihó casá dor cu nan a adkerí mas experencia den bida i den e ministerio cristian. Despues di a sirbi pa vários aña como pionero regular of na Betel, algun ruman a casa i por a sigui sirbi como pareha. I si despues nan haña otro privilegionan, manera e trabou di superintendente biahero of sirbishi di misionero, sigur nan lo no sinti duele dje tempu cu nan a apartá pa traha lugá p’e sirbishi di tempu completo.
14 No Laga Metanan Material Distraí Bo: Cada hóben ta haci bon di puntra su mes: ‘Mi meta despues di caba scol secundario ta pa sigui un carera seglar full-time of sirbi Jehova full-time?’ Ta cierto cu sirbi Jehova full-time lo rekerí sacrificio. Pero sigui un carera seglar tambe! Na final di cuenta, cua di nan dos lo tin un resultado duradero i beneficioso? Jesus a duna e contesta cla. Segun Mateo 6:19-21, el a bisa: “Stop di acumulá tesoronan pa bo mes riba tera, unda mòt i frus ta destruí, i unda ladron ta kibra drenta i horta. Mas bien acumulá tesoronan pa bo mes den shelu, unda ni mòt ni frus ta destruí, i unda ladron no ta kibra drenta i horta. Pasobra caminda bo tesoro ta, ei bo curason tambe lo ta.” Nunca laga nos curason hiba nos na sigui tras di un carera mundano of tras di cosnan material en bes di tras di sirbishi di henter alma na Jehova. Nos tur tin cu reconocé cu e único tesoro cu ta bal pa sigui tras di dje ta un bon relacion cu Jehova, di manera cu nos ta alegrá su curason. (Pro. 27:11) Dor di pone Jehova na promé lugá den nos bida ora nos ta yong ainda, nos ta mustra kico ta di balor pa nos i con importante e Reino ta pa nos. Corda, “e bendicion di Jehova—esei ta loke ta haci ricu, i e no ta agregá ningun dolor na dje.” (Pro. 10:22) Hóbennan tin un excelente oportunidad pa mustra unda nan curason ta dor di duna Jehova algu bon bek pa tur loke el a haci pa nan. Sirbishi di pionero regular ta permití bo haci e sirbishi di Jehova un carera! Sirbishi di Betel tambe ta permití un oportunidad maraviyoso pa esnan cu ta cumpli cu e cualificacionnan.
15 Esnan Cu Ta Sirbi na Betel Mester Ta Moralmente Limpi: Sea un persona ta sirbi como pionero regular of betelita, limpiesa moral ta vital. E salmista a puntra: “Con un hóben lo limpia su caminda?” El a contestá: “Dor di mantené su mes alerto conforme cu [Jehova su] palabra.” (Sal. 119:9) Esei ta encerá evitá cualkier cos cu tin di haber cu e corupcion moral di Satanas su sistema di cosnan. Pornografia riba Internet, conducta indecente cu e sexo opuesto, música i entretenimentu degradá, i bebementu siendo bou di edad legal, ta djis algun dje trampanan cu Satanas ta usa pa stroba nos hóbennan di alcansá metanan spiritual. Bo mester tin un determinacion fuerte pa resistí e tácticanan aki. Como un persona hóben, si bo ta hañando bo mes enbolbí den cualkier un dje cosnan aki, papia cu e ancianonan den bo congregacion i resolvé e asuntunan aki promé cu bo aplicá pa sirbishi di Betel. Un concenshi limpi ta vital pa sirbi Jehova plenamente.—1 Tim. 1:5.
16 Siña Bai Bon cu Otro Hende: Un rekisito importante pa haci sirbishi di Betel un éxito ta di siña bai bon cu otro hende. E famia di Betel na Merca ta consistí di miles di ruman for di tur gremio di bida. E famia di Betel di Kòrsou cu ta hopi mas chikitu, tambe tin miembronan di vários nacion i antecedente. Aunke e variedad aki di personalidad ta realsá e beyesa di Betel, tin biaha esei por trece desafionan tambe. Si bo ta pensa riba sirbishi di Betel, lo bo haci bon di puntra bo mes: ‘Mi ta sinti mi ofendí masha lihé ora otronan no ta compartí mi opinion? Otro hende ta haña cu ta fácil pa trata cu mi?’ Si bo tin cu mehorá den esei, cuminsá traha riba dje awor. Dor di haci esei, lo bira mas fácil pa bo ahustá na biba i traha cu miembronan dje famia di Betel.
17 Traha duru pa bo ta un persona spiritual dor di cultivá un relacion estrecho cu Jehova. Desaroyá un bon programa di studio personal, cu ta incluí lesamentu di Bijbel tur dia. Sea activo den compartí e bon nobo cu otronan. Dor di pone e cosnan aki na práctica, lo bo manifestá bo progreso spiritual. (1 Tim. 4:15) Ki prospectonan maraviyoso ta spera esnan cu prepará awor pa un carera den e sirbishi di tempu completo!
18 Mayornan, Entrená Boso Yunan: Kico mayornan por haci pa animá hóbennan drenta den e ministerio di tempu completo? Jesus a bisa: “Tur hende cu ta ser instruí perfectamente lo ta mescos cu su maestro.” (Luc. 6:40) Ta natural cu un alumno cabalmente entrená ta exhibí e cualidadnan excelente di su maestro dedicá. Mayornan cristian mester tene e principio aki na mente segun cu nan ta traha duru riba entrená nan yunan “cu debocion na Dios como [nan] meta.” (1 Tim. 4:7) Siendo cu yu ta incliná na reflehá e actitud cu nan mayornan tin pa cosnan spiritual, mayornan ta haci bon di puntra nan mes: ‘Nos mes personalmente ta balorá e trabou cu ta ser hací na Betel pa promové e interesnan di Jehova su adoracion berdadero? Nos ta reconocé Jehova su bendicion riba e areglo di Betel? Nos ta kere cu un bida den e sirbishi di Jehova ta e mihó carera cu nos yunan por scoge?’ Nos propio aprecio sincero p’e sirbishi di Betel i p’e trabou cu ta ser hací einan lo yuda nos inculcá un aprecio similar den nos yunan.
19 Elcana i Hana tabatin aprecio profundo pa adoracion berdadero. Nan a pone un ehempel remarcabel pa mayornan cristian djawe. Den antiguo Israel, a ser rekerí di hende homber israelita so pa tres biaha pa aña nan “presentá dilanti cara dje Señor berdadero, Jehova” n’e tabernáculo. No obstante, Elcana a biaha un 30 kilometer, muy probablemente na pia, cu henter su famia “aña tras aña” pa ofrecé sacrificio na e centro aki di adoracion di Jehova. (Éx. 23:17; 1 Sam. 1:3, 4, 9, 19; 2:19) Ta obvio cu e cabes di famia aki tabata kier pa henter su famia compartí su interes pa cosnan spiritual.
20 Hana tabata compartí su casá su interes den adoracion berdadero. El a sinti profundamente cu e tabatin e obligacion di yuda apoyá adoracion berdadero n’e tabernáculo. Hana a haci un voto cu si Jehova dun’é un yu homber, lo e pon’é disponibel pa sirbi n’e tabernáculo. (1 Sam. 1:11) E Ley di Moises a duna un esposo e derecho di anulá un voto inapropiado di su casá. (Núm. 30:6-8) Sin embargo, Elcana aparentemente a apoyá Hana su voto, mustrando asina cu e tambe a apoyá e manifestacion ei di adoracion berdadero!—1 Sam. 1:22, 23.
21 E aprecio i excelente spiritu cu nan a desplegá como mayor tabatin un influencia positivo riba nan yu homber Samuel? Sigur cu sí. Como mucha chikitu, Samuel a atendé su tareanan asigná di buena gana i fielmente, i el a ser entrená pa mas privilegionan special den e sirbishi di Dios. E interes cu Elcana i Hana a demostrá den Samuel su sirbishi n’e tabernáculo no a terminá una bes cu el asumí su responsabilidadnan einan. Nan a sigui bishit’é regularmente pa dun’é animacion i sosten segun cu el a sigui den su sirbishi di tempu completo.—1 Sam. 2:18, 19.
22 Esta un ehempel sobresaliente Elcana cu Hana a pone pa mayornan cristian djawe! Ora nos yunan ta tende nos expresionnan sincero di aprecio pa e privilegio di sirbishi di pionero regular of di Betel i nan ta mira e spiritu di sacrificio propio cu nos ta desplegá pa promové interesnan di Reino, nan tambe lo desaroyá un curason incliná na sirbi otro hende. Hopi mayor tin éxito den inculcá e inclinacion sano aki den nan yunan. Un mucha di shete aña a skirbi: “Ora mi bira grandi mi kier bai Betel, i tin un par di cos cu mi kier haci einan. (1) Tik e revistanan Toren di Vigilancia i Spierta!, (2) traha den boso seccion di arte, (3) dobla paña. Cualkier un dje trabounan aki cu tin. Mi no ta wori.” Esta conmovedor pa mira un spiritu asina dispuesto desaroyá den curason di nos yunan!
23 Hóbennan corda cu “mundu ta pasa bai i tambe su deseo, pero esun cu haci e boluntad di Dios ta permanecé pa semper.” (1 Juan 2:17) Sigui purba alcansá metanan spiritual, incluso esun di sirbishi di pionero regular of sirbishi di Betel. Mayornan, imitá e ehempel di personanan fiel di pasado cu a animá nan yunan cultivá debocion na Dios. (2 Ped. 3:11) I laga nos tur haci nos parti pa yuda nos rumannan hóben sirbi nos Magnífico Creador mas pleno posibel, ya cu esaki “ta encerá promesa dje bida djawor i di esun pa bini.”—1 Tim. 4:8; Ecl. 12:1.
[Box page 4]
Rekisitonan Básico pa Sirbishi di Betel
● Por lo ménos un aña bautisá
● Un persona spiritual cu un amor profundo pa Jehova i su organisacion
● Bon salú spiritual, mental, emocional i físico
● Ciudadano of residente permanente i legal di islanan ABC
● 19-35 aña di edad