Pakico Miedu Ta Gara e Mundu?

KEN kier biba den miedu? E persona averahe ta deseá siguridad, sin menasa pa su bida of posesionnan. P’esei, hopi ta muda for di áreanan asotá pa crímen. Tog, causanan pa miedu ta existí tur caminda.

Peliger for di armanan nuclear i accidentenan di reactor nuclear ta lanta miedu di desolacion pa humanidad. Aumento rápido di violencia ta promové miedu. Hopi hende ta teme cu AIDS lo bira e epidemia mas mortífero di siglo. Destruccion di nos medio ambiente ta entre otro causanan di miedu. E miedunan aki ta specialmente significante? I nos por spera pa biba un dia den un mundu liber di tal miedu?

Miedu Mundial Ta Significante

E miedu plamá djawendia ta significante debí na loke a ser pronosticá den Bijbel. Den su profecia tocante e último dianan, Jesucristo a cita condicionnan cu lo causa miedu. El a bisa: “Nacion lo lanta contra nacion i reino contra reino, i lo tin scarcedad di cuminda i temblor den un lugá tras di otro.” Tambe Jesus a papia di “e aumento di maldad.” Desde 1914, guera, hamber, temblor i maldad sin igual, a resultá den gran miedu i pérdida di bida.​—⁠Mateo 24:​7-14.

Asta actitud di hende ta causa miedu awe. Na 2 Timoteo 3:​1-4, nos ta lesa apostel Pablo su palabranan profético: “Den e último dianan lo presentá tempu crítico, duru pa trata cuné. Pasobra hende lo ta stimador di nan mes, stimador di placa, presumido, arogante, blasfemadó, desobediente na mayornan, malagradicí, desleal, sin cariño natural, no dispuesto pa ningun acuerdo, calumniador, sin dominio propio, feros, sin amor pa bondad, traidor, cabesura, hinchá cu orguyo, stimador di placer mas bien cu stimador di Dios.” Siendo cu nos ta rondoná cu hende asina den e último dianan aki, nada straño cu tin asina tantu miedu!

Loke e Mundu Aki Por Spera

Jesus a compará e periodo aki cu e último dianan dje mundu den tempu di Noe. Sin duda, tabatin gran miedu e tempu ei, pasobra e registro histórico di Bijbel ta bisa: “E tera a yega di ta ruiná den bista dje Dios berdadero i e tera a bira yená cu violencia.” P’esei, “Dios a bisa Noe: ‘E fin di tur carni a yega mi dilanti, pasobra e tera ta yen di violencia.’ ” (Génesis 6:​11, 13) E mundu malbado ei tabata asina violento cu Dios a pone un fin na dje mediante e Diluvio global. Sin embargo, impulsá pa amor, Jehova Dios a preservá hustu Noe i su famia.​—⁠2 Pedro 2:⁠5.

P’esei kico e mundu violento actual por spera? Wel, Dios ta odia e falta di respet violento p’e bienestar di otronan. Esaki ta bisto for dje palabranan dje salmista: “Jehova mes ta examiná e hustu i tambe e malbado, i cualkier persona cu ta stima violencia Su alma ta odia siguramente.” (Salmo 11:⁠5) Jehova a trece un fin n’e mundu violento di dia di Noe. Pues, anto, nos no mester spera pa Dios trece un fin n’e mundu aki plagá cu violencia inspirador di temor?

Apostel Pedro tabata divinamente inspirá pa papia dje presencia di Cristo i pa profetisá calamidad p’e mundu malbado actual. El a skirbi: “Den e último dianan lo presentá mofadornan cu nan mofa, andando segun nan mes deseonan i bisando: ‘Unda e presencia primintí di dje ta? Sí, desde e dia cu nos antepasadonan a bai drumi den morto, tur cos ta sigui exactamente manera desde principio dje creacion.’ ” Anto Pedro a usa e palabra “cielu” pa representá e sistema di gobiernu imperfecto riba humanidad i e palabra “tera” pa sociedad humano inhustu. El a bisa: “Pasobra, conforme cu nan deseo, e echo aki ta scapa for di nan atencion, cu tabatin cielu desde antigua i un tera firmemente mantené for di awa i meimei di awa pa medio dje palabra di Dios; i pa medio di eseinan e mundu dje tempu ei [dia di Noe] a sufri destruccion ora el a ser inundá cu awa. Pero mediante e mésun palabra cielu i tera cu ta existí awor ta ser wardá pa candela i ta ser reservá p’e dia di huicio i di destruccion di hende malbado.”​—⁠2 Pedro 3:​3-7.

Den e mésun liña di pensamentu, Pablo a mustra cu Cristo i su angelnan poderoso lo trece “vengansa riba esnan cu no conocé Dios i esnan cu no ta obedecé e bon nobo tocante nos Señor Jesus. Esakinan mes lo sufri e castigu hudicial di destruccion eterno.” (2 Tesalonicense 1:​6-9) E último buki di Bijbel ta papia dje reunimentu dje nacionnan pa “e guera dje gran dia di Dios e Todopoderoso” i ta sigurá nos cu Jehova lo “causa ruina na esnan cu ta ruinando e tera.”​—⁠Revelacion 11:18; 16:​14-16.

Un Tempu pa Goso, No Miedu

En bes di spanta pa loke Bijbel ta pronosticá p’e mundu aki, hende recto tin motibu pa goso. Pronto Jehova lo trece un fin n’e mundu malbado aki, pero esaki lo ser hací p’e bienestar di esnan cu ta stima husticia. Kico lo sigui e terminacion divino dje mal sistema actual di cosnan? Wel, un sistema nobo bou dje Reino celestial di Dios, pa cua Jesus a siña su siguidornan pidi den oracion! El a bisa: “Boso mester resa, anto, asina’ki: ‘Nos Tata cu ta den cielu, laga bo nomber sea santificá. Laga bo reino bini. Laga bo boluntad tuma lugá, mescos cu den cielu, tambe riba tera.’ ” (Mateo 6:​9, 10) Ki cambionan nos por spera ora e boluntad di Dios ta ser hací riba tera?

Guera i su terornan lo a terminá. Salmo 46:9 ta bisa: “E [Jehova Dios] ta haciendo guera stop te n’e extremidad dje tera. E ta kibra e arco i ta corta e lansa na pida; e garoshinan [di guera] e ta kima den candela.” Anto e pueblo “realmente lo sinta, cada un bou di su palu di wijndruif i bou di su palu di figu, i lo no tin ningun cu ta haci nan tembla.”​—⁠Miqueas 4:⁠4.

Malesanan mortal lo no causa miedu mas i reclamá bida di hende. E promesa divino ta: “Ningun habitante lo bisa: ‘Mi ta malu.’ ” (Isaías 33:24) Ki un causa pa goso!

Miedu asociá cu crímen i violencia tambe lo ta cos di pasado. Salmo 37:​10, 11 ta primintí: “Solamente un poco tempu mas, i e malbado lo no tei mas; i abo siguramente lo duna atencion na su lugá, i lo e no tei. Pero e mansunan mes lo poseé e tera, i nan di berdad lo haña nan deleite exkisito den e abundancia di pas.”

Con miedu di nos dia lo ser reemplasá cu berdadero pas i siguridad? Pa medio di un gobiernu hustu​—⁠e Reino di Dios. En cuanto nos tempu, Daniel 2:44 ta declará: “Den e dianan dje reynan ei e Dios di cielu lo establecé un reino cu nunca lo ser reducí na ruina. I e Reino mes lo no ser pasá pa ningun otro pueblo. Lo e aplastá i pone un fin na tur e reinonan aki, i e mes lo keda para pa tempu indefiní.” Jehova su Rey nombrá, Jesucristo, ‘mester goberná te ora Dios pone tur enemigu bou di su pia.’ (1 Corintio 15:25) Jesus su Reino di Mil Aña lo cumpli cu e propósito original di Dios di tin un paradijs terenal habitá eternamente pa hende gososo.​—⁠Lucas 23:43; Revelacion 20:6; 21:​1-5.

Den e Paradijs terenal ei, lo tin un solo temor saludabel. Esei lo ta “e temor di Jehova.” (Proverbio 1:⁠7) En realidad, nos mester tin e temor aki asta awor, pasobra e ta un reverencia i respet profundo combiná cu un miedu di desagradá Dios debí cu nos ta apreciá su bondad amoroso i husticia. E temor aki ta exigí confiansa absoluto den Jehova i fiel obedencia na dje.​—⁠Salmo 2:11; 115:11.

Sucesonan spantoso ta marca e último dianan aki. Sin embargo, si nos duna prueba di nos amor pa Dios, nos por alegrá en bes di tene miedu. Profecianan di Bijbel ta mustra cu e terminacion divino dje mundu aki ta cerca. Lo e ser reemplasá pa Jehova Dios su mundu nobo primintí di husticia. (2 Pedro 3:13) En berdad, bou dje gobernacion di Reino pronto lo tin un mundu sin temor insaludabel.

[Box on page 6]

E PODER DI UN SOLO COPIA

TOMASZ, un yoncuman di Polonia, a haña su mes den dificultad legal cu a pon’é hui dje pais. Pa seis luna largu el a biaha cu cabe’i boto rond Europa, drumiendo den un tent i cogiendo varios djob. Entre tantu, un pregunta tabata constantemente den su mente: Kico ta e propósito di bida?

E pregunta di Tomasz a ser contestá ora el a haña un copia di E Toren di Vigilancia na polaco. El a les’é varios biaha i a reconocé cu e revista aki a contené e berdad cu e tabata buscando. Cu cabe’i boto Tomasz a biaha 200 kilometer p’e oficina di sucursal di Watch Tower na Selters/ Taunus, Alemania. Yegando un djaluna anochi, el a saca su revista Toren di Vigilancia i a bisa: “Lo mi kier haña un persona splicá mi mas tocante loke tin den e revista aki. Kico mi mester haci?”

E anochi ei, dos Testigo di Jehova a papia cu Tomasz tocante e propósito di bida, usando Bijbel como base pa nan combersacion. Ansioso pa siña mas, Tomasz a regresá n’e oficina di sucursal tur dia dje siman ei, studiando Bijbel i e buki Bo por biba pa semper den Paradijs riba tera.

Tomasz a dicidí na regresá Polonia, aunke e por a encontrá problema aya. Asina, riba djabierne, net cuater dia despues cu el a yega n’e oficina di sucursal na Selters, Tomasz a bolbe pa su pais natal. Inmediatamente el a cuminsá studia cu Testigonan di Jehova na Polonia. Tomasz a progresá rápidamente i celosamente a cuminsá papia cu otronan tocante loke e tabata siñando. Na october 1993, solamente cuater luna despues di su bishita inicial na Selters, el a ser bautisá como Testigo di Jehova.

Djis un solo copia di E Toren di Vigilancia a yuda e yoncuman aki investigá e propósito di bida!

[Caption on page 7]

Bou dje gobernacion di Reino mediante Jesucristo, nunca mas miedu lo gara e mundu