Haci Declaracion Publico Di Jehova Su Nomber
“Laga nos semper ofrecé Dios un sacrificio di alabansa, esta, fruta di lipnan cu ta haci declaracion público di su nomber.”—HEBREO 13:15.
JEHOVA su profeta Oséas tabatin un mensahe vital pa su compañénan israelita. Den siglo ocho promé cu e Era Comun, el a spierta su contemporáneonan desobediente pa nan repentí. El a insta: “Tuma palabranan cu boso i bolbe na Jehova. Bisa na dje, boso tur, ‘Pordoná eror; i aceptá loke ta bon, i nos lo ofrecé en cambio e toronan hóben di nos lipnan.’ ” (Oséas 14:2) Instando e pueblo pa ofrecé Jehova ‘e toronan hóben di nan lipnan,’ Oséas su profecia tabata animando e israelitanan pa repentí i rindi sacrificio di alabansa sincero na Dios.
2 Testigonan di Jehova ta ofrecé ‘e toronan hóben di nan lipnan’ awe. Tambe nan ta tuma e spiertamentu di apostel Pablo na pechu, kende a referí n’e palabranan ei den Oséas su profecia ora el a skirbi: “Mediante [Jesucristo] laga nos semper ofrecé Dios un sacrificio di alabansa, esta, fruta di lipnan cu ta haci declaracion público di su nomber.” (Hebreo 13:15) Pues, Dios su sirbidornan ta alabá Jehova gososamente, manera den nan actividad di predicacion di Reino.—Mateo 24:14.
3 Hacimentu di declaracion público di Jehova su nomber ta un privilegio inmerecí pa hende imperfecto. Ki contentu nos ta pa conta otronan tocante nos Dios, ofreciendo Jehova asina “un sacrificio di alabansa,” “e toronan hóben di nos lipnan”! Pa nos haña animacion den predicá e bon nobo di Reino públicamente awe, laga nos examiná loke Bijbel ta bisa nos tocante e profetanan di Dios i otro sirbidornan di Jehova. For di nan curso di bida, nos por siña hopi cos cu lo yuda nos disfrutá di nos actividad di predicá.—Romano 15:4.
E Papel dje Profetanan
4 Jehova su profetanan tabatin e privilegio di proclamá su mensahe públicamente. E nificacion original dje palabra hebreo pa “profeta” (na·viʼʹ) no ta muchu conocí pa nos, pero su uso den Bijbel ta indicá cu e berdadero profetanan tabata boceronan pa Jehova, hombernan di Dios cu mensahenan inspirá. E palabra griego traducí como “profeta” (pro·pheʹtes) ta nificá literalmente “un proclamador,” bisa algu “enfrente di” of “dilanti” un persona. Un profeta ta un persona cu ta proclamá mensahenan cu ta ser atribuí na un fuente divino. Hopi bes, pero no semper, e berdadero profetanan di Dios a pronosticá futuro sucesonan.
5 Relacioná cu e papel notabel dje profetanan den e areglo di Dios, Cyclopædia di M’Clintock i Strong ta declará: “Tin bes nan conseho a ser puntrá . . . Pero hopi mas frecuente nan a sinti nan mes impulsá di paden pa papia cu e pueblo sin cu nan conseho a ser puntrá, i nan no tabatin miedu di papia cu curashi i determinacion na lugarnan unda nan aparencia, talbes, a producí indignacion i teror.” (Volúmen VIII, página 640) Considerá algun ehempel di loke a impulsá e profetanan pa tuma un posicion di curashi asina.
Sintimentu i Motivacion
6 Promé cu e destruccion di Jerusalem na 607 P.E.C., Jehova a papia cu e exiliadonan hudiu na Babilonia mediante su profeta Ezekiel. Jehova a bis’é: “Yu di hende, loke bo haña, come. Come e rol aki, i bai, papia cu e cas di Israel.” Ezekiel a obedecé. El a bisa: “Pues mi a habri mi boca, i gradualmente el a hací mi come e rol aki. I el a pasa na bisá mi: ‘Yu di hende, bo mester causa pa bo propio barica come, pa bo por yena bo mondongonan mes cu e rol aki cu mi ta dunando bo.’ I mi a cuminsá com’é, i el a yega di ta den mi boca manera miel pa e dulsura.”—Ezekiel 3:1-3.
7 Nos curpa ta saca substancianan nutritivo for dje cuminda cu nos ta come, i den un sentido esakinan ta bira parti di nos. Di igual manera, e “rol” cu Ezekiel a come—e mensahe di Jehova cu e profeta tabatin cu declará—mester a bira parti di dje, afectando su emocionnan. E palabranan di Dios a conmové Ezekiel su sintimentunan interior asina tantu cu declarando nan den público tabata un deleite p’e. Si bo ta un Testigo di Jehova, bo tin goso den haci declaracion público dje mensahe di Dios?
8 Considerá, tambe, profeta Amos. Bibando den siglo nuebe P.E.C., e tabata entre e promé profetanan hebreo cu a skirbi un buki di Bijbel yamá na su mes nomber. Mescos cu Ezekiel, Amos tabata un proclamador franco dje palabra di Jehova. Sí, e expresion “esaki ta loke Jehova a bisa” ta ser ripití 11 biaha atraves dje buki cu ta carga su nomber! (Amos 1:3, 6, 9, 11, 13; 2:1, 4, 6; 3:12; 5:4; 7:17) Amos a sinti e necesidad pa declará e palabranan di Dios públicamente.
9 Como profeta di Dios, Amos a reaccioná riba declaracionnan divino tumando accion mesora. Mediante Amos, Dios a bisa: “Tin un leon cu a gruña! Ken lo no tin miedu? E Señor Soberano Jehova mes a papia! Ken lo no profetisá?” (Amos 3:8) E profeta a ser motivá irestitiblemente pa declará e mensahe di Jehova.
10 Manera un leon Jehova ta gruña mensahenan di huicio riba e mal sistema di cosnan di mundu actual. Mescos cu Amos, Jehova su sirbidornan di tempu moderno ta sinti nan impulsá pa declará e palabranan di Dios públicamente. Asta ora nan ser menasá dor di opositornan, nan ta sigui e ehempel di apostelnan Pedro i Juan, kendenan a declará enérgicamente: “En cuanto nos, nos no por stop di papia dje cosnan cu nos a mira i tende.” Tambe e apostelnan a afirmá: “Nos mester obedecé Dios como gobernante mas bien cu hende.” (Echo 4:20; 5:29) Kico, anto, di nos? Ta bon pa examiná nos sintimentunan tocante haci declaracion público dje nomber di Jehova.
“For di Abundancia di Curason”
11 No por tin duda cu Jehova su profetanan tabata agradicidu pa nan privilegionan. Gratitud similar na Jehova mester impulsá nos pa haci declaracion público di su nomber. Salmo 145:1, 2 ta declará: “Lo mi halsá bo, O mi Dios e Rey, i lo mi bendicioná bo nomber pa tempu indefiní, asta pa semper. Henter e dia largu lo mi bendicioná bo, i lo mi alabá bo nomber pa tempu indefiní, asta pa semper.” E palabranan ei ta reflehá bo actitud? Studio regular di Bijbel ta yuda nos profundisá nos aprecio pa loke Jehova a haci, ta haciendo i lo haci ainda pa nos. I ora nos ta studia Bijbel huntu como famia, nos no ta haña cu e Palabra di Dios ta ehercé poder, dunando nos gana di papia tocante su propósitonan? (Hebreo 4:12) Afin di ta eficas den haci declaracion público dje nomber di Jehova, nos mester haci pleno uso tambe dje publicacionnan cristian cu Jehova Dios a percurá mediante e “esclabo fiel i discreto” ungí.—Mateo 24:45-47.
12 Pa nos alabá Jehova for di un curason agradicidu, nos mester asistí na reunion cristian regularmente. Henter e pueblo di Jehova mester tuma e spiertamentu di apostel Pablo na pechu: “Laga nos considerá un e otro pa incitá otro na amor i obranan excelente, sin bandoná nos reunimentu huntu, manera algun tin pa custumber, sino animá un e otro, i tantu mas segun boso ta contemplá e dia yegando cerca.” (Hebreo 10:24, 25) Bo ta regularmente presente na reunionnan cristian? Bo ta papia frecuentemente tocante e berdadnan bíblico, e experencianan excelente i e noticianan excitante di expansion teocrático cu bo ta tende n’e reunionnan dje pueblo di Dios? Si bo no ta incliná pa expresá bo mes tocante Jehova i su propósitonan, permití tempu pa meditacion riba su Palabra pa su pensamentunan penetrá profundamente den bo curason. (Salmo 77:12; 143:5) Sí, tantu reunionnan cristian como meditacion regular riba e Palabra di Dios mester yudá bo apreciá e privilegio maraviyoso di haci declaracion público dje nomber di Jehova.
13 Cu un curason yen di gratitud na Jehova, nos ta producí bon cosnan. “Un bon hende ta producí loke ta bon for dje bon tesoro di su curason,” Jesus a razoná, “pero un mal hende ta producí loke ta malu for di su mal tesoro; pasobra for di abundancia di curason su boca ta papia.” (Lucas 6:45) Por tin un mihó manera pa ‘producí loke ta bon’ cu haci declaracion público di Jehova su nomber i papia tocante su propósitonan cu nos próhimo, nos famia—en berdad, cu tur persona cu nos topa?
Resultado di Declaracion Público
14 E profetanan di Dios a haña goso den nan sirbishi, i loke nan a bisa a beneficiá oyentenan receptivo. Di igual manera, declaracion público dje mensahe di Reino ta trece gran goso pa su proclamadornan. (Echo 20:35) I cuantu e ta beneficiá oyentenan apreciativo! Aceptando e bon nobo ta yuda hende vence depresion of enfrent’é cu éxito. Esnan cu a perde un ser kerí ta alegrá riba e speransa di resureccion. Adictonan ta ser librá di sclabitud na nicotina, heroina i otro substancianan adictivo. Hopi ta ser elevá moralmente i tur persona cu ta aceptá berdad di Bijbel ta gana libertad spiritual. (Juan 5:28, 29; 8:32) Proclamando e Reino como humanidad su único speransa tambe ta sirbi pa spierta e malbadonan, miéntras e ta producí un reaccion gososo den curason di hende onrado. Asina hende ta ser separá sea pa “cortamentu eterno” of pa “bida eterno” ora huicio divino ta ser ehecutá riba e mundu malbado aki. (Mateo 24:14; 25:31-46; Ezekiel 33:1-9; 1 Timoteo 2:3, 4) Nos trabou di predicacion ta un operacion di rescate sin precedente, e declaracion di mas extenso i ampliamente publicá cu a yega di ser efectuá riba tera!
15 Como Jehova su Testigonan di tempu moderno, nos ta traha gustosamente i obedientemente como esclabo pa nos Tata celestial. (Romano 12:11) P’esei, nos ta contentu pa apartá tempu regularmente pa participá den e trabou di predicá e bon nobo públicamente i di cas pa cas. (Echo 5:42; 20:20) Informenan mundial ta indicá cu ainda tin algun persona merecedor den nos teritorionan. Segun cu circunstancianan den e mundu ta cambia, hende ta ser afectá den varios manera. Hopi a bira refugiado inesperadamente, stranhero den un otro pais. Talbes tin algun dje hendenan aki den nos teritorio di duna testimonio. Si ta asina, laga nos haci loke nos por pa yuda nan spiritualmente segun cu nos ta perseverá den “e obra santu dje bon nobo.” (Romano 15:16) Algun cristian a siña un otro idioma pa por declará e bon nobo di Reino na hende asina.
16 Hopi profeta di Dios tabatin asignacionnan masha difícil. No tabata fácil pa nan declará mensahe divino na hende no-receptivo. Di igual manera, no tur persona dedicá na Jehova ta haña ta fácil pa haci declaracion público di Su nomber, specialmente den teritorionan caminda e gran mayoria no ta scucha. Sin embargo, dor di tene confiansa cu ta resultá for di studio dje Palabra di Dios huntu cu oracion, combiná cu e fortalesa cu Jehova ta suministrá, nos por perseverá den declará e mensahe di Reino. (Filipense 4:13; Revelacion 14:6) Relacioná cu esaki, kico mas nos por siña for di Jehova su profetanan i su otro sirbidornan di tempu antiguo?
Compañerismo den e Ministerio di Veld
17 Pa cumpli cu su asignacion, Dios su profeta Moises inicialmente tabatin e yudansa di Aron, su ruman mayor. Jehova a bisa Moises: “[Aron] mester papia pa bo n’e pueblo; i mester sosodé cu lo e sirbi como un boca pa bo.” (Éxodo 4:16) Considerá tambe, e dianan dje profetanan Elías i Eliseo, ora “e yunan dje profetanan” a prosperá. Esakinan aparentemente tabata gruponan di sirbidor di Dios cu a traha huntu, indudablemente disfrutando di compañerismo placentero un cu otro. (2 Rey 2:3-5; 4:38; compará cu 1 Samuel 10:5, 10.) Naturalmente, Moises i Aron i “e yunan dje profetanan” no tabata enbolbí den declará e bon nobo di Reino. No obstante, nan asociacion tabata beneficioso pa nan tur. Siglonan despues Jesucristo a manda 70 disipel den e ministerio “dos-dos,” i sin duda esakinan a beneficiá dje compañerismo cu nan a haña asina.—Lucas 10:1-16; compará cu Echo 17:10, 11; 20:20.
18 Na aña 1953, Testigonan di Jehova a cuminsá un programa den cua proclamadornan di Reino a traha huntu den e ministerio di veld. Naturalmente, esaki no a ser hací puramente pa motibu causa di compañerismo. E programa di entrenamentu aki a ser diseñá pa haci Dios su sirbidornan maestronan i predicadornan mas eficas dje bon nobo. Cu e meta ei na mente, publicadornan di Reino mas experenciá a participá den e ministerio cu esnan mas nobo. E programa di entrenamentu di cas-pa-cas aki tabata sumamente beneficioso i a yuda Jehova su pueblo mehorá den haci declaracion público di su nomber. (1 Timoteo 4:16) Awe, siguridad ta un otro factor mas pakico ta consehabel pa hende cristian participá den e ministerio “dos-dos,” specialmente den algun área.
19 Sea cu bo ta trahando cu un compañé creyente den e ministerio of bo ta bayendo na un porta bo so, haci esfuerso pa alcansá algun meta of obhetivo personal. E mester ta realístico, alcansabel. Bo mester di yudansa pa adaptá bo introduccion pa asina lanta e interes dje hendenan den bo teritorio? Si ta asina, talbes bo por compañá un pionero, un proclamador di Reino di tempu completo of un publicador kende kisas ta specialmente eficas den usa bon introduccionnan. Bo compañé kisas por yudá bo prepará i usa e introduccionnan describí den Nos Ministerio di Reino of e buki Razonamiento a partir de las Escrituras. Na cierto ocasion ora boso ta duna testimonio huntu di cas pa cas, scucha cuidadosamente n’e presentacionnan di bo compañé. Despues purba un presentacion similar bo mes te ora bo bira ábil den e aspecto aki di bo ministerio.
20 Kico di si bo mester di yudansa pa haci rebishita eficas cu e meta pa cuminsá un studio di Bijbel di cas? Talbes mediante bo conductor di Studio di Buki di Congregacion, por haci areglo pa bo traha den sirbishi di veld cu un publicador di Reino kende ta basta eficas den cuminsá studionan bíblico. No sea un partner silencioso ora boso ta haci rebishita huntu. Mas bien, despues cu bo compañé demostrá con e ta manehá asuntunan durante un bishita, bo por haña ta probechoso pa haci un presentacion similar ora di haci e siguiente rebishita. Bo compañé lo tei pa yuda i ofrecé conseho despues.—Compará cu Galatio 6:6.
21 Tal asistencia amoroso di un compañé di sirbishi di veld por yudá bo alcansá bo metanan den e ministerio. E yudansa aki i bo aprecio profundo pa Jehova su bondad amoroso den permití bo haci e trabou privilegiá aki lo capacitá bo pa ta asta mas eficas den bo actividadnan di predicacion di Reino. I atesorá bo privilegio di bendicioná Jehova dor di semper papia bon di dje i dor di haci declaracion público di su nomber regularmente.—Salmo 145:1, 2, 9-13.
22 Como Testigonan di Jehova, nos ta haci bishita bes tras bes den nos ministerio di cas-pa-cas. Hopi ta scuchando e bon nobo cu aprecio profundo. Sin embargo, algun kisas no ta incliná na scucha e mensahe di Reino. Kico nos mester haci bou dje circunstancianan ei? Con nos por perseverá den e trabou cu Jehova a asigná na su pueblo? Ki ehempelnan bíblico por yuda of guia nos? E preguntanan aki lo ser contestá den e siguiente artículo.
[Study Questions]
1. Kico e profeta Oséas a insta su compañénan israelita pa haci?
2. Ki clase di sacrificio apostel Pablo a animá cristiannan pa ofrecé?
3. Con nos por ofrecé Jehova “un sacrificio di alabansa,” i ken su actividadnan nos lo examiná awor?
4, 5. (a) Den e idiomanan original di Bijbel, kico ta e nificacion básico dje palabranan traducí como “profeta”? (b) Kico ta indicá cu e profetanan tabatin un papel notabel den e areglo di Dios?
6, 7. Kico Jehova a laga su profeta Ezekiel come, i ki efecto esaki tabatin?
8, 9. Kico a motivá Amos pa profetisá?
10. Con Jehova su sirbidornan di tempu moderno ta reaccioná ora nan trabou di predicá ta ser oponé?
11. Kico mester impulsá nos pa perseverá den haci declaracion público di Jehova su nomber?
12. Con tantu reunionnan cristian como meditacion por yuda nos haci declaracion público?
13. Con nos ta ‘producí bon cosnan’ for di nos curason?
14. (a) Kico esun cu ta declará i esun cu ta tende e mensahe di Reino por experenciá? (b) Kico ta ser lográ mediante e trabou di predicacion di Reino?
15. Kico nos por haci pa yuda merecedornan prospectivo den nos teritorio di duna testimonio?
16. Kico por yuda nos perseverá den declará Jehova su nomber?
17. Cua ta algun ehempel bíblico di compañerismo beneficioso den sirbishi di Dios?
18. Con compañerismo den e ministerio a sirbi un propósito útil awe?
19. Kico nos mester tene na mente relacioná cu metanan personal den e ministerio?
20, 21. Kico por haci compañerismo den e ministerio di veld specialmente probechoso?
22. Cua preguntanan nos siguiente studio lo yuda nos contestá?
[Caption on page 13]
Compañerismo significativo por yuda nos mehorá den e ministerio
[Caption on page 14]
Bo A Capta e Puntonan Aki?
◻ Kico tantu Oséas como apostel Pablo a bisa tocante sacrificionan na Dios?
◻ Kico a motivá Ezekiel i Amos pa profetisá?
◻ Con nos mester considerá nos trabou di predicacion di Reino?
◻ Ki beneficionan nos por saca for di compañerismo den e ministerio di veld?