Tuma Como Modelo E Profetanan Di Dios

“Rumannan, tuma como modelo di sufri maldad i di ehercé pacenshi e profetanan, cu a papia den e nomber di Jehova.”​—⁠SANTIAGO 5:10.

JEHOVA su sirbidornan ta briya di goso apesar dje atmósfera di depresion plamá mundialmente den e último dianan aki. Esaki ta asina pasobra nan sa cu nan ta agradá Dios. Tambe Testigonan di Jehova ta mantené nan mes firme bou di persecucion i oposicion na nan ministerio público pasobra nan ta realisá cu nan ta sufriendo pa causa di husticia. Jesucristo a bisa su siguidornan: “Felis boso ta ora hende ta reprochá boso i ta persiguí boso i cu mentira ta papia tur sorto di cos malu contra boso pa mi causa. Alegrá i salta di goso, ya cu boso recompensa lo ta grandi den cielu; pasobra den e manera ei nan a persiguí e profetanan promé cu boso.” (Mateo 5:​10-12) En berdad, ki ora cu sirbidornan di Dios enfrentá pruebanan di fe, nan ta considerá esakinan un goso.​—⁠Santiago 1:​2, 3.

² Disipel Santiago a skirbi: “Rumannan, tuma como modelo di sufri maldad i di ehercé pacenshi e profetanan, cu a papia den e nomber di Jehova.” (Santiago 5:10) W. F. Arndt i F. W. Gingrich ta definí e palabra griego aki traducí “modelo” (hy·poʹdeig·ma) como “ehempel, modelo, patronchi, den un bon sentido como algu cu ta stimulá of mester stimulá un persona pa imit’é.” Manera Juan 13:15 ta mustra, “esaki ta mas cu un ehempel. E ta un prototipo definí.” (Theological Dictionary of the New Testament) Pues, anto, Jehova su sirbidornan di tempu moderno por tuma su fiel profetanan como un modelo en cuanto “sufri maldad” i “ehercé pacenshi.” Kico mas nos por dicerní ora nos ta studia nan bida? I con esaki por yuda nos den nos actividad di predicá?

Nan A Sufri Maldad

³ Jehova su profetanan hopi biaha a sufri maldad of maltrato. Den siglo nuebe P.E.C., por ehempel, e sacerdote adorador di bisé Amasías a oponé profeta Amos den un manera perverso. Amasías a pretendé falsamente cu Amos a conspirá contra Jeroboam II dor di profetisá cu e rey lo muri dor di spada i cu Israel lo bai den exilio. Cu desprecio, Amasías a bisa Amos: “O homber di visionnan, bai, core p’e tera di Huda, i come pan ei, i ei bo por profetisá. Pero na Betel ya bo no mester profetisá mas, pasobra e ta e santuario di un rey i e ta e cas di un reino.” Sin ser desanimá dor dje atake verbal aki, Amos a contestá: “Mi no tabata profeta, tampoco mi tabata yu di profeta; sino mi tabata cuidadó di bestia i recogedor di figu di palu di sicamor. I Jehova a pasa na tumá mi di sigui tras dje tou, i Jehova a pasa na bisá mi, ‘Bai profetisá na mi pueblo Israel.’ ”​—⁠Amos 7:​10-15.

⁴ Jehova su spiritu a duna Amos poder p’e profetisá cu curashi. Imaginá Amasías su reaccion segun cu Amos a bisa: “Tende e palabra di Jehova, ‘Bo ta bisando: “Bo no mester profetisá contra Israel, i bo no mester laga ningun palabra cai contra e cas di Isaac”? P’esei esaki ta loke Jehova a bisa: “Pa loke ta bo esposa, den e stad lo e bira un prostituta. I pa loke ta bo yu hombernan i muhernan, mediante spada nan lo cai. I pa loke ta bo suela, mediante cabuya di midi lo e ser repartí. I pa loke ta bo mes, riba suela impuru lo bo muri; i pa loke ta Israel, sin falta lo e bai den exilio for di su propio suela.” ’ ” E profecia ei a cumpli. (Amos 7:​16, 17) Ki pasmá Amasías apóstata mester a keda!

⁵ Esaki ta similar cu e situacion di Jehova su pueblo awe. Nos ta sufri maldad como esnan cu ta declará e mensahenan di Dios, i hopi hende ta papia cu desprecio tocante nos actividad di predicá. Ta cierto cu nos autorisacion pa predicá no ta bini di un seminario teológico. Mas bien, Jehova su spiritu santu ta impulsá nos pa proclamá e bon nobo dje Reino. Nos no ta cambia ni reducí e forsa dje mensahe di Dios. En bes di esei, mescos cu Amos, obedientemente nos ta declar’é sin importá e reaccion di nos oyentenan.​—⁠2 Corintio 2:​15-17.

Nan A Ehercé Pacenshi

⁶ Dios su profetanan a ehercé pacenshi. Por ehempel, Isaías, kende a sirbi como Jehova su profeta den siglo ocho P.E.C., a manifestá pacenshi. Dios a bis’é: “Bai, i bo tin cu bisa n’e pueblo aki, ‘Tende bes tras bes, O hombernan, pero no comprendé; i mira bes tras bes, pero no haña ningun conocimentu.’ Haci e curason dje pueblo aki indispuesto pa ricibí, i haci asta nan oreanan indispuesto pa respondé, i plak asta nan wowonan cera, pa nan no mira cu nan wowonan i pa nan no tende cu nan oreanan, i pa nan propio curason no comprendé i pa nan realmente no bolbe bek i haña curacion pa nan mes.” (Isaías 6:​9, 10) E pueblo en berdad a reaccioná e manera ei. Pero esaki a haci Isaías stop? No. Mas bien, cu pacenshi i cu celo el a declará Jehova su mensahenan di spiertamentu. E structura hebreo dje palabranan di Dios cu nos a caba di cita ta apoyá e idea dje “continuacion largu” di proclamacion dje profetanan, locual e pueblo a tende “bes tras bes.”​—⁠Gesenius’ [Pron: gezenʹēu̇s] Hebrew Grammar.[3]

⁷ Awe hopi ta reaccioná n’e bon nobo net manera hende a reaccioná na Jehova su palabranan transmití dor di Isaías. Sin embargo, mescos cu e fiel profeta ei, nos ta ripití e mensahe di Reino “bes tras bes.” Nos ta haci esei cu celo i pacenshi persistente pasobra esaki ta e boluntad di Jehova.

“Nan A Haci Exactamente Asina”

⁸ Profeta Moises tabata ehemplar den pacenshi i obedencia. El a scoge pa tuma su posicion cu e israelitanan sclabisá, pero e tabatin cu spera cu pacenshi riba e tempu di nan liberacion. Pa 40 aña el a biba na Madian te ora Dios a us’é pa guia e pueblo di Israel for di sclabitud. Ora Moises i su ruman Aron tabata dilanti e gobernador di Egipto, obedientemente nan a bisa i haci loke Dios a manda. Realmente, “nan a haci exactamente asina.”​—⁠Éxodo 7:​1-6; Hebreo 11:​24-29.

⁹ Cu pacenshi Moises a soportá 40 aña rigoroso den e desierto. Tambe el a sigui obedientemente direccion divino den e construccion dje tabernáculo di Israel i e trahamentu di otro cosnan usá den adoracion di Jehova. E profeta a sigui instruccion di Dios asina cuidadosamente cu nos ta lesa: “Moises a pasa na haci conforme cu tur loke Jehova a mand’é. El a haci exactamente asina.” (Éxodo 40:16) Cumpliendo cu nos ministerio den asociacion cu Jehova su organisacion, laga nos recordá e obedencia di Moises i aplicá e conseho di apostel Pablo pa ‘ser obediente na esnan cu ta hiba delantera entre nos.’​—⁠Hebreo 13:17.

Nan Tabatin un Actitud Positivo

¹⁰ E profetanan mester tabatin un actitud positivo segun cu nan a transmití mensahenan di huicio i tambe profecianan cu a reflehá Dios su interes amoroso pa esnan fiel plamá rond den Israel. Esaki tabata e caso cu Oséas, kende tabata un profeta pa no ménos cu 59 aña. Den un manera positivo, el a sigui transmití Jehova su mensahenan i a concluí su buki profético cu e palabranan: “Ken ta sabí, p’e por comprendé e cosnan aki? Discreto, p’e por sa nan? Pasobra e camindanan di Jehova ta recto, i e hustunan ta esnan cu lo cana den nan; pero e violadornan di ley ta esnan cu lo trompecá den nan.” (Oséas 14:​9) Tanten Jehova permití nos duna un testimonio, laga nos mantené un actitud positivo i sigui busca esnan cu sabiamente lo aceptá Dios su bondad inmerecí.

¹¹ Pa ‘busca e merecedornan,’ nos mester perseverá i mira asuntunan positivamente. (Mateo 10:11) Por ehempel, si nos no sa unda nos a pone nos yabinan, nos por cana bai bek i busca n’e varios lugarnan unda nos a pasa. Nos por haña nan solamente despues di haci esaki repetidamente. Di igual manera, laga nos perseverá den busca esnan semehante di carné. Ki un goso nos tin ora nan ta respondé n’e bon nobo den teritorio trahá frecuentemente! I cuantu nos ta alegrá cu Dios ta bendicionando nos trabou den paisnan unda anteriormente restriccionnan a limitá nos ministerio público!​—⁠Galatio 6:10.

Fuente di Animacion

¹² E palabranan di Jehova su profetanan por ta di gran animacion pa nos den nos ministerio. Por ehempel, considerá e profecia di Joël. E ta contené mensahe di huicio cu a ser dirigí na israelita apóstata i otronan den siglo nuebe P.E.C. Sin embargo, Joël a ser inspirá tambe pa profetisá: “Mester sosodé cu ami [Jehova] lo drama mi spiritu riba tur clase di carni, i bo yu hombernan i muhernan siguramente lo profetisá. En cuanto bo ancianonan, soñonan nan lo soña. En cuanto bo hóbennan, visionnan nan lo mira. I asta riba e criánan, homber i muher, den e dianan ei lo mi drama mi spiritu.” (Joël 2:​28, 29) Esaki a resultá di ta e caso cu e siguidornan di Jesus desde Pentecoste di 33 E.C. padilanti. I ki un gran cumplimentu dje profecia aki nos ta mira den e siglo 20 aki! Awe nos tin miyones di hende cu ta “profetisá,” of proclamá Jehova su mensahe​—⁠entre nan mas cu 600.000 den e sirbishi di pionero di tempu completo.

¹³ Hopi proclamador di Reino ta hende hóben. No ta semper fácil pa nan papia cu esnan di mas edad tocante Bijbel. Tin biaha hende ta bisa sirbidornan hóben di Jehova: ‘Bo ta perdiendo bo tempu predicando,’ i ‘bo mester tin otro cos di haci.’ Cu tacto Testigonan hóben di Jehova por contestá cu nan ta haña ta lástima cu e persona ta pensa asina. Un hóben predicador dje bon nobo ta haña ta probechoso pa agregá: “Mi ta pensa cu mi ta saca berdadero beneficio for di papia cu hende di mas edad manera meneer, i mi ta disfrutá di dje.” Naturalmente, predicando e bon nobo siguramente no ta perdementu di tempu. Bida di hende ta den e wega. Mediante Joël, Dios a declará mas aleu: “Mester sosodé cu tur persona cu inbocá e nomber di Jehova lo scapa sano i salbo.”​—⁠Joël 2:32.

¹⁴ Yunan cu ta compañá nan mayornan den e actividad di predicacion di Reino ta apreciá yudansa di nan mayornan den fiha metanan personal. Paso-pa-paso hóbennan asina ta progresá for di lesamentu di un texto te cu splicacion di nan speransa basá riba Bijbel i ofreciendo literatura apropiado na hende interesá. Segun cu nan ta mira nan mes progreso i Jehova su bendicion, publicadornan hóben di Reino ta haña gran goso den predicá e bon nobo.​—⁠Salmo 110:3; 148:​12, 13.

Celo cu un Actitud di Spera

¹⁵ Dios su profetanan tabata ehemplar tambe den manifestá tantu celo como un actitud di spera​—⁠característicanan cu nos mester den nos ministerio awe. Ora cu na principio nos a siña e berdad dje Palabra di Dios, probablemente el a yena nos cu celo cu a impulsá nos pa papia cu curashi. Pero kisas a pasa añanan desde esei, i kisas nos a cubri nos teritorio di duna testimonio hopi biaha. Kisas awor ménos hende ta aceptando e mensahe di Reino. Esaki a mengua nos celo? Si ta asina, considerá e profeta Ezekiel, kende su nomber ta nificá “Dios Ta Fortalecé.” Aunke Ezekiel a enfrentá hende di curason duru den Israel di antigua, Dios a fortalec’é i figurativamente a haci su frenta mas duru cu piedra di candela. Asina, Ezekiel tabata capas pa efectuá su ministerio pa hopi, hopi aña sea cu e pueblo a scucha of no. Su ehempel ta mustra cu nos por haci mescos, i e por yuda nos rebibá nos celo p’e trabou di predicá.​—⁠Ezekiel 3:​8, 9; 2 Timoteo 4:⁠5.

¹⁶ Miqueas, kende a profetisá den siglo ocho P.E.C., tabata notabel pa su pacenshi. “En cuanto ami,” el a skirbi, “ta pa Jehova lo mi mantené mi mes vigilante. Lo mi mustra un actitud di spera p’e Dios di mi salbacion. Mi Dios lo tend’é mi.” (Miqueas 7:⁠7) Miqueas su confiansa tabatin rais den su fe fuerte. Mescos cu e profeta Isaías, Miqueas tabata sa cu loke Jehova proponé lo e haci sigur. Nos tambe sa esaki. (Isaías 55:11) P’esei laga nos cultivá un actitud di spera pa cu e cumplimentu dje promesanan di Dios. I laga nos predicá e bon nobo cu celo, asta den áreanan unda hende ta mustra poco interes den e mensahe di Reino.​—⁠Tito 2:14; Santiago 5:​7-10.

Eherciendo Pacenshi Awe

¹⁷ Algun profeta di Jehova cu pacenshi a persistí den nan asignacion pa añanan largu pero no a mira e cumplimentu di nan profecianan. Sin embargo, nan perseverancia cu pacenshi, hopi biaha miéntras nan tabata sufriendo di maltrato, ta yuda nos realisá cu nos por cumpli cu nos ministerio. Tambe nos por saca beneficio for dje ehempel di e fiel ungínan den e promé décadanan di siglo 20. Aunke nan speransa celestial no a ser realisá mes lihé cu nan a spera, nan no a laga desapunte riba un aparente tardansa mengua nan celo pa hacimentu dje boluntad di Dios segun cu el a revel’é na nan.

¹⁸ Pa añanan largu, hopi dje cristiannan aki a distribuí regularmente E Toren di Vigilancia i su revista compañé, ¡Despertad! (antes yamá The Golden Age i despues Consolation). Celosamente nan a haci e revistanan balioso aki disponibel na hende riba caya i na nan casnan riba loke nos ta yama awe ruta di revista. Ora un ruman muher di edad avansá a terminá su curso terenal, esnan cu tabatin custumber di cana pasa i mir’é dunando testimonio riba caya, a sinti su falta masha lihé. Ki un testimonio el a duna durante su hopi añanan di fiel sirbishi, manera e comentarionan apreciativo di esnan cu a observá su ministerio público a mustra! Como un proclamador di Reino, bo ta lagando regularmente E Toren di Vigilancia i ¡Despertad! den man di esnan cu bo topa den bo ministerio?

¹⁹ Considerá tambe, e pacenshi i fiel sirbishi dje rumannan cu ta sirbi como miembro dje Cuerpo Gobernante di Testigonan di Jehova. Varios di nan awor ta den e di nuebe of dies década di nan bida, pero ainda nan ta proclamadornan di Reino cu celosamente ta percurá pa nan tareanan asigná. (Hebreo 13:⁠7) I kico dje otronan di edad avansá cu e speransa celestial i asta algun entre e “otro carnénan” cu ta avansando na edad? (Juan 10:16) Nan por ta sigur cu Dios no ta inhustu p’e lubidá nan obra i e amor cu nan ta mustra pa su nomber. Huntu cu compañénan creyente mas hóben, hopi Testigo di Jehova di edad ta perseverá den haci loke nan por, eherciendo fe i mustrando pacenshi den sirbishi di Dios. (Hebreo 6:​10-12) Anto, sea mediante resureccion, manera cu e profetanan di antaño, of mediante sobrebibencia dor dje binidero “tribulacion grandi,” nan lo cosechá e recompensa ricu di bida eterno.​—⁠Mateo 24:21.

²⁰ Ki un modelo excelente Dios su profetanan a laga pa nos! Debí cu nan a soportá sufrimentu, a ehercé pacenshi i a manifestá otro cualidadnan piadoso, nan a ser privilegiá pa papia den Jehova su nomber. Como su Testigonan di tempu moderno, laga nos ser manera nan i ser mes determiná cu e profeta Habacuc, kende a declará: “Na mi puesto di guardia lo mi keda pará, i lo mi mantené mi mes stacioná riba e baluarte; i lo mi vigilá, pa mira kico [Dios] lo papia mediante mi.” (Habacuc 2:⁠1) Laga nos tin un determinacion similar segun cu nos ta ehercé pacenshi i gososamente ta sigui haci declaracion público dje nomber ilustre di nos Gran Creador, Jehova!​—⁠Nehemías 8:10; Romano 10:10.

[Study Questions]

1. Kico ta yuda Jehova su sirbidornan ser gososo asta ora nan ta ser persiguí?

2. Segun Santiago 5:​10, kico por yuda nos ehercé pacenshi?

3, 4. Con profeta Amos a reaccioná rib’e oposicion di Amasías?

5. Ki paralelo nos por mira entre e situacion di Jehova su sirbidornan di tempu moderno i esun dje profeta Amos?

6, 7. (a) Kico a caracterisá Isaías su profetisamentu? (b) Con Jehova su sirbidornan di awendia ta actua mescos cu Isaías?

8, 9. Den ki maneranan Jehova su profeta Moises ta un ehempel excelente?

10, 11. (a) Kico ta indicá cu e profeta Oséas tabatin un punto di bista actitud positivo? (b) Con nos por mantené un actitud positivo ora nos ta acercá hende den nos teritorionan?

12. Cua profecia di Joël ta hañando un cumplimentu den siglo 20, i con?

13, 14. Kico por yuda hóbennan cristian haña goso den e ministerio di veld?

15. Con Ezekiel su ehempel por yuda nos rebibá nos celo p’e trabou di predicacion di Reino?

16. Cua actitud di Miqueas nos mester cultivá?

17, 18. Ki ehempelnan antiguo i moderno por yuda nos ehercé pacenshi?

19. Ki animacion Hebreo 6:​10-12 ta duna nos?

20. (a) Kico bo a siña for dje “modelo” dje profetanan? (b) Con pacenshi manera e profetanan a manifestá por yuda nos?

[Caption on page 16]

Jehova su spiritu a duna Amos poder p’e profetisá cu curashi apesar di Amasías su oposicion furioso

[Caption on page 18]

E fiel ungínan a pone un ehempel excelente eherciendo pacenshi den Jehova su sirbishi

[Caption on page 20]

Bo A Capta e Puntonan Aki?

◻ Ki ehempel di curashi profeta Amos a pone?

◻ Den ki maneranan e profeta Moises tabata ehemplar?

◻ Con Jehova su Testigonan di tempu moderno por actua manera Amos i Isaías?

◻ Kico ministernan cristian por siña for dje conducta di Oséas i Joël?

◻ Con nos por saca beneficio for dje ehempelnan di Ezekiel i Miqueas?