Sufrimentu Humano

Lo e caba un dia?

ESENANAN horibel despues cu un bom a explotá riba un plasa yen di hende na Sarajevo; masacrenan i violencia sin sentido na Ruanda; muchanan hambrá sclamando pa cuminda na Somalia; famianan tolondrá revisando nan pérdidanan despues di un temblor na Los Angeles; víctimanan desampará di Bangladesh ruiná pa diluvio. Esenanan asina di sufrimentu humano ta confrontá nos diariamente na television of den revista i corant.

Un efecto lamentabel di sufrimentu humano ta cu e ta pone algun hende perde fe den Dios. “E existencia di maldad semper a proveé e obstáculo mas principal pa fe,” segun un declaracion publicá dor di un comunidad hudiu na Merca. E escritornan ta referí n’e mortonan den camponan di concentracion nazista manera Auschwitz i di bomnan manera esun cu a explotá riba Hiroshima. “E pregunta di con un Dios hustu i poderoso por permití e destruccion di asina tantu bida inocente ta molestiá e concenshi di un persona religioso i ta causa confusion,” e autornan ta bisa.

Lamentablemente, e fluho interminabel di informe di tragedia por laga emocionnan humano bira insensitivo. Tanten cu amigu i famianan no ta enbolbí, hopi hende apénas ta keda conmoví p’e sufrimentu di otronan.

Sin embargo, e echo cu nos ta capas pa sinti compasion, por lo ménos pa nos mes sernan stimá, mester bisa nos algu tocante nos Formador. Bijbel ta bisa cu hende a ser creá “den imágen di Dios” i “segun [su] semehansa.” (Génesis 1:​26, 27) Esaki no kier men cu hende ta mescos cu Dios den aparencia. No, pasobra Jesucristo a splica cu “Dios ta un Spiritu,” i “un spiritu no tin carni ni wesu.” (Juan 4:24; Lucas 24:39) Siendo trahá den e semehansa di Dios ta referí na nos potencial pa manifestá cualidadnan piadoso. P’esei, ya cu hende normal ta sinti compasion pa cu esnan cu ta sufri, nos mester concluí cu e Creador di hende, Jehova Dios, ta compasivo i cu e ta sinti profundamente pa su creacion humano cu ta sufriendo.​—⁠Compará cu Lucas 11:13.

Un manera den cua Dios a mustra su compasion ta dor di duna humanidad un splicacion skirbí dje causa di sufrimentu. El a haci esaki den su Palabra, e Bijbel. Bijbel ta mustra claramente cu Dios a crea hende pa disfrutá di bida, no pa sufri. (Génesis 2:​7-9) E ta revelá tambe cu e promé hendenan a trece sufrimentu riba nan mes dor di a rechasá Dios su gobernacion hustu.​—⁠Deuteronomio 32:​4, 5; Romano 5:12.

Apesar di esaki, tog Dios ta sinti compasion pa humanidad cu ta sufriendo. Esaki ta ser mustrá claramente den su promesa pa trece un fin na sufrimentu humano. “Mira! E tent di Dios ta cu humanidad, i lo e biba cu nan, i nan lo ta su pueblonan. I Dios mes lo ta cu nan. I lo e seca tur lágrima di nan wowo, i morto lo no existí mas, ni lamento ni sclamacion ni dolor lo no existí mas. E cosnan anterior a pasa forbij.”​—⁠Revelacion 21:​3, 4; mira tambe Isaías 25:8; 65:​17-25; Romano 8:​19-21.

E promesanan maraviyoso aki ta proba cu Dios ta masha conciente di sufrimentu humano i cu e ta determiná pa pone un fin na dje. Pero, pa cuminsá, kico exactamente a causa sufrimentu humano, i pakico Dios a permiti’é sigui te na nos dia?

[Caption on page 3]

Kevin Frayer/Sipa Press