Un Bida Yen Di Proposito

MANERA MELVA A. WIELAND A CONT’E

Na mart 1940, algun luna despues cu mi a bautisá, mi ruman muher Phyllis a bini cerca mi i a puntrá mi: “Pakico bo no ta bai traha pionero?” “Traha pionero?” mi a puntra. “Bo kier men predicá tempu completo, casi tur dia?”

‘CON mi por ta un pionero,’ mi a pensa, ‘cu mi conocimentu limitá di Bijbel i asta ménos placa di spar na banco?’ No obstante, e pregunta di Phyllis a poné mi cuminsá pensa. Tambe mi a haci hopi oracion tocante dje.

Finalmente mi a razoná, ‘Pakico mi no por confia den Dios ora e ta primintí di percurá pa nos si nos busca promé su Reino?’ (Mateo 6:33) Pues na juni 1940, mi a entregá mi retiro como costurera. Anto mi a skirbi Watch Tower Society na Australia, solicitando un asignacion di pionero.

Mi Asignacion pa Bida Largu

Un par di siman despues, mi a ricibí un contesta, informando mi cu lo mi a haña un asignacion despues cu mi a asistí n’e congreso cu mester a ser tené riba e tereno perteneciendo n’e sede di Testigonan di Jehova na Strathfield, un suburbio di Australia su stad di mas grandi, Sydney. E mainta despues dje congreso, mi a meldu n’e oficina pa mi haña mi asignacion.

E persona den e oficina a splica: “Nos ta masha ocupá den e labanderia awor aki. Lo bo por keda i yuda nos pa un par di siman?” Esei tabata na augustus di 1940​—⁠i ainda mi ta trahando den e labanderia! E tempu ei tabatin solamente 35 ruman den e famia dje sede; awor tin 276.

Pero kisas bo ta puntra bo mes pakico mi ta considerá trahamentu den un labanderia “un bida yen di propósito,” specialmente siendo cu esaki ta mi trabou pa mas cu 50 aña caba. Promé cu mi splica, laga mi conta tocante mi promé interesnan den bida.

Deporte a Bira mi Bida

Mi a nace na Melbourne dia 1 di januari, 1914, e primogénito di cincu yu. Nos tabatin mayornan amoroso kendenan a biba segun principionan noble i a duna disiplina ora tabata necesario. Tambe nos tabatin loke bo por yama un criansa religioso casual, pasobra nos mayornan no tabata baidó di misa. No obstante, nan a insistí pa nos como mucha asistí na ‘zondagschool’ dje Iglesia Anglicano.

Ora mi a caba scol na 1928 i a cuminsá traha como costurera, mi a dicidí na dedicá mayoria di mi tempu liber na haci deporte, keriendo cu esaki lo por a yudá mi vence mi timides. Mi a drenta un club di tenis i a hunga tenis henter aña sin stop. Durante winter tambe mi a hunga basketball i baseball, i durante zomer mi a hunga den e ekipo femenino di cricket. Cricket a bira mi berdadero amor, i mi a traha duru pa perfeccioná mi abilidad como un lansador rápido afin di cualificá pa weganan entre otro estadonan.

Un Propósito Diferente For di Deporte

Trempan den bida, e siñansa di cu un Dios di amor tabatin un lugá yamá fiernu unda esnan cu a haci mal cosnan lo wordu tormentá pa eternidad, a molestiá mi. Esaki simplemente no tabatin sentido pa mi. Pues imaginá mi alegria ora inesperadamente mi a siña for di Bijbel e berdadero nificacion di “fiernu.” Esei a sosodé asina aki:

Mi ruman muher Phyllis, kende ta cincu aña mas yong cu mi, tambe tabata gusta haci deporte, i nos tabata den e mésun ekipo femenino di cricket. Na 1936, un compañera di ekipo a introducí Phyllis na un yoncuman yamá Jim kende tabata conocí como un hende masha religioso. Pronto Jim a cuminsá papia cu Phyllis tocante e siñansanan di Bijbel. Phyllis su curiosidad a lanta. “E siñansanan ta asina lógico i razonabel,” e tabata bisá mi.

E tempu ei ami cu Phyllis a compartí un kamber na cas, i el a purba lanta mi interes den loke Jim tabata contand’e tocante e Reino di Dios. “Lo e bai haci loke gobiernu humano no a logra haci,” el a bisá mi entusiasmá. Sin embargo, mi a argumentá cuné, bisando cu esaki tabata simplemente un otro religion mas pa confundí nos i cu ningun hende realmente a conocé e futuro. Pero Phyllis tabata persistente i a laga literatura tur rond den e kamber, sperando cu kisas lo mi lesa nan.

Mi tabata curioso pa sa pakico Phyllis tabata asina entusiasmá tocante e creencia nobo aki, pues un dia mi a coge un foyeto chikitu. E tabatin e título interesante Hereafter [Mas Ayá di Morto]. El a capta mi atencion ora mi tabata blader dor di su páginanan i a mira e palabra “fiernu.” Pa mi sorpresa, mi a haña sa cu e palabra bíblico pa “fiernu” en realidad ta referí n’e graf comun di humanidad i cu tantu bon como mal hende ta bai ei. Tambe mi a siña cu fiernu no ta un lugá di tormento; e mortonan ta inconciente i no por sinti nada.​—⁠Eclesiastes 9:​5, 10; Salmo 146:​3, 4.

Esaki sí tabatin sentido pa mi, specialmente ora e foyeto chikitu a splica cu un Dios amoroso i poderoso a primintí di trece bek e mortonan mediante un milager yamá e resureccion. (Juan 5:​28, 29) Awor mi tambe kier a sa mas dje cosnan cu Jim tabata contando Phyllis. Mi a haña e Bijbel King James Version chikitu cu mi tata a duná mi ora mi tabata mucha i mi a busca e textonan mencioná den e foyeto chikitu. Esaki a confirmá loke a ser bisá tocante fiernu i e condicion dje mortonan.

Un otro sorpresa fasinante pa mi tabata pa haña sa cu Dios tin un nomber personal, Jehova. (Salmo 83:18) Mi por a mira tambe cu Dios tabatin un propósito, of motibu, pa tur loke el a haci of a permití pa sosodé. Esaki a poné mi puntra mi mes, ‘Kico realmente ta mi propósito den bida?’ For dje tempu ei mi a cuminsá puntra mi mes si a cumbiní mi pa tuma deporte asina na serio​—⁠casi te n’e grado cu tur otro cos den bida a ser neglishá.

Actuando Segun Determinacion

Jim i Phyllis no tabata sa mes cu mi punto di bista riba bida a cambia, pero nan a descubrí esei ora nos famia a ser invitá na e fiesta di un amigu. Den e dianan ei, na ocasionnan asina tur presente tabata lanta para i brinda n’e Rey di Inglatera, i tur hende tabata hisa nan glas pa bebe e bríndis na onor dje rey. Sin embargo, mi a dicidí pa keda sintá huntu cu Jim i Phyllis. Nan no por a kere nan bista ora nan a mirá mi sintá ketu bai! Naturalmente, no tabata nos intencion pa mustra ningun falta di respet, pero como cristiannan nos a sinti cu nos mester tabata neutral i no participá den tal ceremonianan nacionalista.​—⁠Juan 17:⁠16.

No obstante, mi mayornan i e resto dje famia tabata hopi disgustá. Nan a bisa cu nos tabata desleal, of loco​—⁠of ámbos! Anto, ora ami cu Phyllis a asistí n’e presentacion anual di premio p’e ekipo femenino di cricket, algu similar a sosodé durante un ceremonia nacionalista. E resultado final tabata cu nos tur dos a retirá for dje ekipo. Esaki no tabata mes difícil manera mi a pensa cu lo e ta, pasobra mi a bin realisá cu mi fidelidad i lealtad tabata na Cristo Jesus, Rey dje Reino celestial di Dios.

Phyllis a splica awor cu mi mester a asistí n’e reunionnan di Testigonan di Jehova regularmente pa edificá mi fe cu mas conocimentu di Bijbel. N’e tempu ei tabatin solamente un congregacion den Melbourne, pues mi a cuminsá asistí n’e reunionnan ei tur diadomingo atardi. Pronto mi tabata convencí cu esaki tabata Dios su organisacion terenal berdadero.

No a tarda mashá cu mi a ser invitá pa participá den e actividad dje congregacion di predicá di cas-pa-cas. Na promé instante mi tabata dudoso, pero riba un diadomingo mainta mi a dicidí di bai huntu cu e rumannan djis pa mira con el a ser hací. Mi tabata contentu ora mi a ser asigná pa compañá un Testigo experenciá kende a papia cu confiansa n’e promé porta i a ricibí un reaccion agradabel for dje doño di cas. Mi a pensa den mi mes, ‘Wel, esei no tabata muchu difícil, pero lo mi mester di basta práctica promé cu mi por haci’é mescos asina.’ Pues imaginá mi asombro ora, despues dje promé porta, e Testigo a bisá mi, “Lo bo por bai riba bo mes awor.”

“Riba mi mes?” mi a puntra, turdí! “Ruman no por ta serio! Kico lo mi bisa si un hende haci un pregunta i mi no sa e contesta?” Pero mi compañera tabata insistente. Pues, temblando literalmente, mi a sigui riba mi mes miéntras cu el a sigui duna testimonio na hende n’e otro banda di caya. Di un of otro manera mi a sobrebibí e promé mainta ei.

For dje tempu ei mi a cuminsá participá den e trabou di predicá tur diadomingo mainta. Ora un hende na porta a hací mi un pregunta cu mi no por a contestá, mi tabata bisa, “Lo mi busca e contesta i bini bek cerca bo.” Felismente, Jehova a sigui duná mi forsa i curashi pa sigui mi bida nobo yen di propósito. Mi a haci un dedicacion di mi bida na dje, i na october 1939, mi a ser bautisá den e pisina público di Melbourne. Pronto despues di esei Phyllis, kende p’e tempu ei tabata casá cu Jim, a puntrá mi pakico mi no ta cuminsá traha pionero.

Sirbishi n’e Sucursal

Na januari 1941, djis despues cu mi a cuminsá traha na Betel, manera nos tabata yama e oficina di sucursal, un prohibicion a ser poné riba e trabou di Testigonan di Jehova na Australia. Despues e militarnan a apoderá di nos Cas di Betel na Strathfield, i mi a ser mandá p’e hacienda dje Sociedad na Ingleburn, rond di 48 kilometer pafó dje stad di Sydney. Na juni 1943 corte a exonerá Watch Tower Society i a anulá e prohibicion. Pa fin dje aña ei, 25 di nos a ser invitá bek n’e Betel na Strathfield. Ei mi a sigui traha den e labanderia, i tambe haci otro trabounan di cas.

E siguiente década a parce di a pasa lihé. Anto na 1956, mi a casa cu un co-trahador di Betel, Ted Wieland. Ted tabata un homber masha calmu i paciente, i nos tabata masha contentu ora nos a ricibí aprobacion pa sigui biba den Betel como esposo i esposa. Nos tur dos a atesorá nos bida yen di propósito, felis p’e privilegio di sirbi n’e sucursal di Australia. Naturalmente, ademas di nos trabou na Betel, nos tabatin e goso di traha huntu pa yuda otronan bira disipel di Cristo. Como ehempel, bo por lesa tocante famia Weekes den e edicion di ¡Despertad!, di 22 di october, 1993.

E crecementu continuo dje predicacion di Reino a rekerí un ampliacion di nos personal cu solamente 10 of 12 persona durante mi promé 30 añanan na Betel. Pero e situacion a cambia rápidamente den añanan setenta ora nos a cuminsá imprimí e revistanan Toren di Vigilancia i ¡Despertad! aki. Na januari 1972 a cuminsá cu construccion di un facilidad di imprenta nobo. Pronto un mashin di imprenta di 40 ton a yega for di Hapon, i pa 1973 nos tabata imprimiendo casi 700.000 revista pa luna. Nos famia di Betel awor sí a cuminsá crece di berdad.

Añanan setenta tambe a trece tristesa personal pa mi. Promé, mi kerido esposo, Ted, a muri na 1975 na edad di 80 aña. Anto, ménos cu un aña despues, mi tata di edad avansá tambe a bai drumi den morto. Mi a saca hopi consuelo for di Jehova i su Palabra, e Bijbel, i for di mi rumannan spiritual. E echo cu mi a keda ocupá na Betel cu mi actividad yen di propósito durante e tempu masha tristu di mi bida aki tambe a yuda hopi.

No obstante, bida ta sigui, i atrobe mi a cuminsá experenciá satisfaccion i bendicion, awor como biuda. Na 1978, mi a asistí n’e congreso na Londen, Inglatera, i despues mi a bishitá e sede mundial di Watch Tower Society na Brooklyn, New York. Mirando cientos di mi rumannan trahando felismente aya den Betel di Brooklyn a sirbi como un inspiracion pa mi te n’e dia djawe.

Segun cu añanan setenta a yega na un fin, nos a haña sa cu mas expansion a ser planeá p’e compleho di Betel di Australia. Sin embargo, e expansion no tabata pa tuma lugá na Strathfield, caminda nos no tabatin mas espacio rib’e tereno. Mas bien, un compleho nobo i muchu mas grandi mester a ser construí riba nos propiedad na Ingleburn, unda mi a traha durante e prohibicion na cuminsamentu di añanan cuarenta.

Un Bida Duradero Yen di Propósito

Ki un entusiasmo tabatin na januari 1982 ora nos a muda pa nos facilidadnan nobo! Ta cierto cu na promé instante tabata un poco tristu pa bandoná un ambiente familiar, pero pronto nos tabata encantá cu nos cas nobo di 73 cuarto precioso. Awor en bes di wak pafó murayanan di bloki i cayanan di suburbio, nos ta wak camponan i palunan berde, bacanan comiendo yerba i salimentu i bahadanan magnífico di solo​—⁠un ambiente sumamente agradabel.

Dia 19 di mart, 1983, nos tabatin un dedicacion encantador dje compleho nobo den un bunita weer di otoño. Lloyd Barry dje Cuerpo Gobernante di Testigonan di Jehova a duna un discurso di dedicacion conmovedor. Personalmente ami a apreciá di por tabatin e i su esposa presente p’e programa di dedicacion, siendo cu mi a traha cu nan na Betel di Strathfield tempu nos tur tabata hopi mas yong.

Crecementu continuo dje actividad di predicacion di Reino a haci mas expansion di nos facilidadnan aki na Ingleburn necesario. Na 1987 e oficina a ser expandé. Anto, dia 25 di november, 1989, un edificio di residencia nobo di cincu piso i un fábrica nobo di tres piso adicional a ser dedicá. Cuantu nos a crece​—⁠for di ménos cu 4.000 minister na Australia ora mi a cuminsá mi ministerio te na rond di 59.000!

Mas recientemente e sucursal di Australia a ser hací un dje tres Oficinanan Regional di Ingenieria dje Sociedad huntu cu Hapon i Alemania. Esaki a haci asta mas expansion dje compleho di Betel necesario. Un edificio mas di oficina di tres piso ta completo awor, i e trabou riba un edificio di residencia di cincu piso cu lo tin 80 cuarto mas pa acomodá nos famia cu ta creciendo constantemente, ta cerca di ser completá.

Den e labanderia nos tin un personal grandi pa atendé e carga di trabou, pero hopi bes mi ta corda e dia aya den augustus na 1940 ora mi a ser invitá pa yuda den e departamento aki pa dos siman. Mi ta asina gradicidu cu e dos simannan ei a extendé na mas cu 50 aña i cu Jehova Dios a guia mi pasonan na un bida asina yen di propósito.

[Caption on page 21]

Tempu mi tabatin 25 aña di edad

[Caption on page 23]

Nos dia di casamentu na 1956

[Caption on page 24]

Na 1938 ami i mi ruman muher tabata basta enbolbí cu deporte, pero awor mi bida ta muchu mas productivo