Testigonan di Jehova Rond Mundu—Puerto Rico
ENTRE Laman Caribe i Océano Atlántico tin e isla tropical fértil di Puerto Rico. Cristofel Columbus a reclam’é como teritorio di Spaña na 1493 i a yam’é San Juan Bautista na memoria di Juan Bautista. Su stad di mas grandi pa hopi tempu a ser yamá Puerto Rico, of “Haf Ricu.” Cu tempu, e nomber aki a bin aplicá na henter e isla, miéntras e stad a bin ser yamá San Juan.
Puerto Rico a resultá di ta un haf ricu den hopi sentido. Hopi oro a ser mandá for di aki den e promé añanan di gobernacion spañó. E isla awor ta exportá caña di sucu, kofi, banana i frutanan manera lamunchi i apelsina, aunke e industria di fábrica i servicio ta forma un gran parti dje economia awe. Sin embargo, Puerto Rico a resultá di ta un haf ricu den un sentido muchu mas importante.
E bon nobo tocante e Reino di Dios a cuminsá ser predicá aki den añanan 1930. Awe, tin mas cu 25.000 publicador dje bon nobo na Puerto Rico. Na 1993 e personal n’e sucursal aki di Watch Tower Society a aumentá for di 23 na mas cu 100. E aumento aki tabata necesario di manera cu e sucursal por a supervisá e traduccion di literatura bíblico na spañó, haciendo tal publicacionnan disponibel pa rond di 350.000.000 hende di abla spañó rond mundu.
Un Campo Nobo
E oficina di sucursal ta informá tambe: “Un campo nobo a habri na Puerto Rico pasobra nos ta haciendo esfuerso pa hiba e mensahe di Reino p’e surdunan. Un ruman muher ta conta e siguiente experencia: ‘Mi tabata trahando entre e surdunan i mi a bishitá un señora cu dos yu chikitu. Ora el a realisá cu mi ta un Testigo, el a rechasá mi mesora pasobra su esposo, kende tambe ta surdu, no tabata gusta Testigonan di Jehova.
“ ‘Algun luna despues e mésun señora aki a bishitá un amiga kende tabata studiando Bijbel cu e Testigonan. El a participá den e studio i a disfrutá di dje masha hopi. Mi a bishitá e señora atrobe, i el a ripití cu su esposo no tabata gusta e Testigonan. Sin embargo, e tabata kier a comprendé Bijbel i tabata cansá di su iglesia pasobra nan no tabata siña nada. Nos a cuminsá studia, usando un tratado. Un dia el a bisá mi pa bini bek riba diasabra pasobra su esposo tambe lo tabatei. “Pero e no gusta nos, no ta berdad?” mi a puntra. El a contestá: “E tin gana di sa kico esaki ta come i bebe.”
“ ‘E siguiente dia nan tur dos a bin bati na mi porta! Ya cu e esposo tabatin hopi pregunta, mi a invitá nan na nos reunion pa hende surdu. E tabatei promé cu mi mes i no a falta un reunion for dje tempu ei. E ta predicando na otro personanan surdu, el a asistí na un asamblea, i e ta anticipando bautismo ansiosamente.’ ”
E informe di sucursal ta continuá: “Na nos congreso di distrito e aña aki, henter e programa a ser presentá den idioma di seña, di manera cu hopi hende surdu tabata presente cu nan famianan. Un momento masha emocional a presentá durante e discurso final ora e orador a mencioná e trabou cu ta ser hací entre e surdunan i a bisa cu tabatin rond di 70 di nan presente. Tabatin un gran aplauso, pero, manera e orador a remarcá, esnan surdu no por a tend’é. Pues pidiendo esnan surdu pa mira n’e auditorio, e orador a ripití e pregunta, ‘Boso ta contentu pa tin boso rumannan surdu aki huntu cu boso?’ i a pidi e auditorio pa aplaudí dor di zwai ámbos man. Tabata un bista maraviyoso pa mira 11.000 ruman homber i muher aplaudí dor di zwai nan mannan. Nos rumannan surdu tabata contentísimo i a sinti cu nan tabata un parti dje gran hermandad. Hopi a drama lágrima di goso.”
Segun cu Testigonan di Jehova ta participá den e trabou di cosecha na Puerto Rico, sin duda lo e sigui ta un haf ricu. E “carnénan” di Dios, kende e ta yama “e cosnan deseabel di tur e nacionnan,” lo sigui drenta paden di manera cu e cas di Jehova lo ta yená cu gloria.—Juan 10:16; Ageo 2:7.
[Kuadro na página 9]
DETAYENAN DJE PAIS
Aña di Sirbishi di 1994
CANTIDAD MAXIMO DI PUBLICADOR: 25.428
PROPORCION: 1 Testigo pa 139
ASISTENCIA NA MEMORIAL: 60.252
PROMEDIO DI PUBLICADOR PIONERO: 2.329
PROMEDIO DI STUDIO DI BIJBEL: 19.012
CANTIDAD BAUTISA: 919
CANTIDAD DI CONGREGACION: 312
OFICINA DI SUCURSAL: GUAYNABO