Sea Alerto pa Haña Hende Surdu den Bo Teritorio
1 Jehova ta extendiendo e invitacion: “ ‘Bin!’ . . . Laga ken cu kier tuma e awa di bida grátis.” (Rev. 22:17) Tin un cantidad creciente di hende surdu entre esnan cu ta reaccioná riba e yamada aki. Como resultado, durante e último 13 añanan a forma 27 congregacion i 43 grupo di idioma di seña na Merca.
2 Aunke congregacion i gruponan di idioma di seña ta concentrá tur nan esfuerso di predicá riba haña contacto cu hende surdu i cu impedimentu di oido den nan respectivo teritorionan, rond mundu ainda tin hopi hende asina cu mester ser hañá i duná un testimonio, kisas asta den nos teritorio.
3 Con Abo Por Yuda? Bo a yega di observá hende ta usa idioma di seña ora bo ta den lugánan público? Bo conocé un persona na trabou of na scol cu tin un miembro di famia surdu? Sea alerto pa haña esnan cu ta surdu ora bo ta efectuá bo actividadnan diario. Pero con bo por haci sigur cu nan lo ricibí un testimonio di Reino?
4 Dunando un Testimonio: Hopi hende surdu ta progresá mas rápido den siña e berdad ora nan por asociá cu Testigonan surdu na reunionnan di congregacion cu ta ser conducí na idioma di seña mericano. Sin embargo, como cu no tin niun grupo pa duna yudansa spiritual na hende surdu den nos comunidad, con abo kisas por yuda? Di con bo no ta haci un rebishita i papia cu cualkier miembro di famia di cas cu sí ta tende? Ofrecé pa mustra un video na idioma di seña pa stimulá e interes dje persona surdu. Tin publicadó cu a asta siña idioma di seña mericano pa asina nan por alcansá e surdunan mas eficasmente. (Echo. 16:9, 10) E foyeto Rekerí i e buki Conocimentu ta disponibel riba video na idioma di seña mericano. Hopi ruman ya caba tabatin resultadonan positivo conduciendo studionan bíblico cu e videonan aki.
5 Dor di ta alerto pa haña hende surdu den bo área, bo por duna nan e oportunidad di tuma e awa di bida grátis.—Mat. 10:11.