Pa Cuantu Tempu Hende Pober Lo Tin cu Spera?

“Si un sociedad liber no por yuda e hopinan cu ta pober, e no por salba e poconan cu ta ricu.”—John F. Kennedy.

“LO MI kier p’e futuro ta briyante pa tur hende—sin pobresa, ningun hende sin cas, esta, un paradijs!” Asina un hobencito di 12 aña di edad di São Paulo, Brazil, a bisa. Pero ta posibel pa eliminá pobresa? Pa cuantu tempu hende pober lo tin cu spera?

Algun hende ta considerá nan mes pober pasobra nan no por cumpra e cosnan cu nan kier. Sin embargo, pensa dje miseria lamentabel di esnan cu ta berdaderamente pober. Bo por imaginá bo e sufrimentu i infelicidad extremo di hende asina? Algun tin cu competí cu meuchi i djaca segun cu nan ta rondia den basureronan en busca di cuminda! Pa cuantu tempu tal pobresa lo afligí humanidad? E súplica di Federico Mayor, director-general di UNESCO (Organisacion Educacional, Científico i Cultural di Nacionnan Uní), ta apropiado: “Laga nos bandoná e tolerancia dudoso ei cu ta permití nos tolerá loke ta intolerabel—e pobresa, hamber i sufrimentu di miyones di sernan humano.”

E soño di bienestar universal lo ser realisá? Ki speransa hende pober tin?

Ki Oportunidadnan Tin pa Hende Pober?

Lidernan cu bon intencion ta proponé mas empleo, mihó salario, mihó programa di bienestar social i redistribucion di tereno pa agricultura. Nan por ta di acuerdo cu e expresidente mericano John F. Kennedy: “Si un sociedad liber no por yuda e hopinan cu ta pober, e no por salba e poconan cu ta ricu.” Sin embargo, bon intencion no ta suficiente pa caba cu pobresa. Por ehempel, crecementu económico lo yuda hende pober en general? No necesariamente. E ex-lider di India, Jawaharlal Nehru, a declará: “Si e forsanan di un sociedad capitalista no ser controlá, nan tin e tendencia di haci e ricunan mas ricu i e pobernan mas pober.” Sin embargo, huntu cu sufrimentu i miseria, un sintimentu di indignidad ta aumentá e carga di hende pober. Lidernan humano por yuda hende pober vence sintimentu di impotencia i desesperacion?

Realmente, hopi di esnan cu ta desesperadamente pober a siña biba cu pobresa i vence sintimentu di poco respet propio meimei di dificultadnan grandi, manera inflacion haltísimo i desempleo. Mas ainda, hamber, falta di bibienda i miseria sin falta lo ser eliminá henteramente. Esaki ta sorprendé bo? Nos ta invitá bo pa lesa e siguiente artículo: “Pronto, Ningun Hende Lo Ta Pober!”