Graduadonan di Galad—“Berdadero Misioneronan!”

“KICO ta un misionero?” E pregunta ei a ser planteá dor di un editorial di corant casi cuater década pasá. E escritor a razoná cu berdadero misioneronan tabata instrumentonan di reforma social i económico. Sin embargo, riba diadomingo, 5 di mart, 1995, n’e Salon di Asamblea di Testigonan di Jehova na Jersey City, un contesta completamente diferente a ser duná enfáticamente. E ocasion? E graduacion di klas 98 dje Scol Bíblico di Galad di Watchtower—un scol cu a manda misionero na tur parti di mundu!

Despues dje cantica i oracion di apertura, Albert D. Schroeder dje Cuerpo Gobernante a yama tur e 6.430 personanan cu tabata presente un caluroso bon biní. Den su comentarionan di introduccion, Ruman Schroeder a splica claramente pakico graduadonan di Galad ta diferente for di otronan cu a yama nan mes misionero. El a bisa: “Bijbel ta e buki principal di instruccion pa Galad.” Graduadonan di Galad ta ser entrená pa ta, no trahadornan social, sino maestronan dje Palabra di Dios. Pues nan ta cualificá di un manera único pa percurá p’e necesidadnan spiritual di hende den camponan den stranheria.

E oradornan cu a sigui despues a considerá un cantidad di otro áreanan den cua graduadonan di Galad ta duna prueba di ta “berdadero” misioneronan. Charles Molohan a papia cu nan riba e tema “Sigui Producí Fruta Excelente Como Misionero.” Comentando riba e palabranan di apostel Pablo na Colosensenan 1:9, 10, Ruman Molohan a recordá e graduadonan cu nan último cincu lunanan na Galad a yuda nan crece “den e conocimentu exacto di Dios.” Esaki lo yuda nan producí fruta den dos manera: manifestando e fruta di spiritu di Dios i compartiendo berdadnan di Bijbel cu otro hende.

Daniel Sydlik dje Cuerpo Gobernante a sigui cu e tema serio “No Negoshá cu Bo Bida.” El a mencioná e pregunta di Jesus: “Kico un hende lo duna a cambio pa su alma?” (Mateo 16:26) Ruman Sydlik a comentá: “Hende a negoshá cu nan alma pa un moda di biba mas fácil i mas suave.” Sin embargo, esnan cu tin un fe bibu no por haci compromiso ora nan ser confrontá cu prueba. Jesus su palabranan ta indicá cu un hende mester ta dispuesto pa “duna,” esta, haci sacrificio, afin di gana su alma of bida. E misioneronan nobo a ser instá pa duna Jehova henter nan alma, lo mihó cu nan por, den su sirbishi!

Siguientemente, Willem Van de Wall dje Departamento dje Comité di Sirbishi a papia riba e tema “Apostel Pablo—Un Ehempel Digno di Imitacion.” Ruman Van de Wall a splica: “Pablo a encabesá e trabou di misionero den e promé siglo.” Anto, apropiadamente, cuater área a ser resaltá den cua apostel Pablo a pone un bon ehempel pa misioneronan awe: (1) Pablo su interes i amor sincero pa hende, (2) su eficacia den e ministerio, (3) su nengamentu modesto pa promové su mes, (4) su confiansa indiscutibel den Jehova.

“Laga Jehova Scudriñá Bo den Bo Asignacion Nobo” tabata e tema cu Lyman A. Swingle dje Cuerpo Gobernante a considerá. Usando e texto di dia, Salmo 139:16, Ruman Swingle a bisa cu e sa cu, como misionero nobo, nan lo encontrá problema den nan asignacion i cu Jehova tin e solucionnan. “Busca su yudansa,” el a insta, “papia cuné ora bo tin un problema. Purba dicerní kico ta su boluntad.”

John E. Barr dje Cuerpo Gobernante a papia despues riba e tema “Bo Fe Ta Creciendo Extraordinariamente.” (2 Tesalonicensenan 1:3) Na Lucas 17:1, nos ta lesa cu Jesus a bisa: “Ta inevitabel cu ta bini causanan di tropieso.” Algun a trompecá debí na problemanan di personalidad di compañé misioneronan. Pero Ruman Barr a animá e misioneronan pa tene e fe necesario pa ser pordonador. En berdad, tabata den e contexto aki cu Jesus su disipelnan a roga: “Duna nos mas fe.” (Lucas 17:2-5) E fe dje misioneronan tambe por ser poní na prueba dor di vários ahuste organisacional. “Nos tin e fe pa aceptá esakinan,” ruman Barr a puntra, “of nan lo bira obstáculonan manera ceru?”

Siguientemente a bini algun conseho dor di dos instructor di Galad. Jack Redford a insta e graduadonan pa mantené un actitud positivo. El a conta di un misionero cu a bandoná su asignacion dor cu otro misioneronan tabata tent’é. Sin embargo, e Scritura ta spierta nos contra tumamentu di ofensa innecesario. (Eclesiástes 7:9) “Tene e actitud corecto,” el a insta. “Pordoná eror i imperfeccion di otro hende rond di bo.”

U. V. Glass, administrador di Galad, a puntra e ora ei: “Bo ta prepará pa lucha cu ‘tempu i sosodimentu imprevisto’ ”? (Eclesiástes 9:11) “Nos patronchi di bida semper ta sometí na cambio,” Ruman Glass a señalá, “i algun por ta masha traumático.” Cierto misioneronan a haña nan mes enfrentá inesperadamente cu kebranto di salú, malesa i problema di famia, forsando algun pa bandoná nan asignacion. “Sin importá kico e sosodimentu imprevisto por ta,” Ruman Glass a bisa, “nos sa cu Jehova ta conciente di dje i ta interesá. Si nos pone nos confiansa den dje, nos sa cu nos lo sali victorioso!”

Un discurso titulá “Apartá pa Sirbishi di Misionero” a culminá e seri di discurso parti mainta. Theodore Jaracz dje Cuerpo Gobernante a trata e pregunta mencioná den e introduccion, esta, “Kico ta un misionero?” Como contesta, el a considerá Echonan capítulo 13 i 14 tocante e trabou di misionero di Pablo i Barnabas. Claramente, e trabou ei a concentrá, no riba curamentu di problemanan social, sino riba ‘declará e bon nobo.’ (Echonan 13:32) Ruman Jaracz a puntra: “Bo no ta di acuerdo cu Pablo i Barnabas a demostrá loke un berdadero misionero mester ta?” E misionero veterano Robert Tracy di México a ser puntrá e ora ei pa compartí cu e auditorio algun di su experencianan animador como evangelisador.

E programa di parti mainta a alcansá su culminacion ora Ruman Schroeder a parti diploma p’e 48 graduadonan. E auditorio tabata emocioná pa tende nomber dje 21 paisnan na cua e misioneronan a ser asigná: Barbados, Benin, Bolivia, Costa Rica, Côte d’Ivoire (Costa di Marfil), Ecuador, Estonia, Guinea-Bissau, Guinea Ecuatorial, Hondúras, Islanan Sotavento, Latvia, Maurítius, Mozambique, Nicaragua, Paraguay, Perú, República Centroafricano, Senegal, Taiwan, i Venezuela.

Despues di un pausa pa almuerso, e auditorio a bolbe reuní i a disfrutá di un studio animá di E Toren di Vigilancia, conducí dor di Robert P. Johnson dje Departamento di Sirbishi. Miembronan di klas 98 a contestá e preguntanan. Despues a sigui un seri deleitabel di entrevista conducí dor dje instructornan di Galad. E auditorio a ricibí hopi animacion segun cu e graduadonan a compartí nan experencianan den e campo i a expresá nan sintimentunan tocante nan asignacion den stranheria.

Pa seis aña i mei, Galad tabata situá n’e facilidadnan di Watchtower Society na Wallkill, New York. Sin embargo, den april di 1995, e scol a muda p’e Centro Educacional nobo di Watchtower na Patterson, New York. Con e famia di Betel na Wallkill a sinti tocante e cambio aki? N’e graduacion aki un cantidad di ruman di Wallkill a ser entrevistá. Nan expresionnan conmovedor a haci claro cu studiantenan di Galad a laga un impresion duradero riba nan. Claramente, e homber i muhernan boluntario aki ta berdadero misioneronan—humilde, cu spiritu di sacrificio propio, profundamente interesá den yuda otronan.

Segun cu e programa di graduacion a yega na su fin, tur persona den auditorio tabata yen di confiansa cu Scol di Galad lo sigui haci cu éxito loke el a haci pa mas cu 50 aña—producí berdadero misioneronan!

[Kuadro na página 18]

Estadísticanan dje Klas:

Cantidad di pais representá: 8

Cantidad di pais asigná na dje: 21

Cantidad di studiante: 48

Promedio di edad: 32,72

Promedio di aña den e berdad: 15,48

Promedio di aña den e ministerio di tempu completo: 10,91

[Plachi na página 18]

Klas 98 di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan ta mencioná di robes pa drechi den cada rij.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.