Graduacion di Studiantenan dje Palabra di Dios

IMITANDO e cristiannan di promé siglo, Testigonan di Jehova ta conocí rond mundu pa nan trabou di predicá di cas-pa-cas. E trabou aki a ser enfatisá den e comentarionan di apertura n’e programa di graduacion dje di 102 klas dje Scol Bíblico di Galad di Watchtower.

Dia 1 di mart, 1997, Albert Schroeder, miembro dje Cuerpo Gobernante di Testigonan di Jehova, a hala atencion na un artículo recien den e revista frances Le Point. El a mencioná e plannan di Iglesia Católico Romano pa cuminsá predicá di cas-pa-cas na Italia. “Pa [e misioneronan vaticano] no yega man bashí miéntras nan ta competí riba tereno di Testigonan di Jehova,” segun e artículo, “Vaticano a bai asta asina leu di laga imprimí un miyon ehemplar dje Evangelio di San Marco, pa nan agentenan confrontá e expertonan [e Testigonan] den e ‘distribucion’ di cas-pa-cas dje bon nobo.”

E 48 graduadonan ta entre esnan cu a imitá Jesus su métodonan ábil di predicacion pa plama e Palabra di Dios. Nan a bini for di ocho pais n’e Centro Educacional di Watchtower na Patterson, New York. Durante nan educacion di cincu luna largu, nan a studia Bijbel di kaft pa kaft. Den nan curso tabatin tambe e historia dje organisacion di Dios, aspectonan práctico di bida di misionero i e fruta di spiritu di Dios. Tur esaki tabata cu un solo meta na mente—prepará nan pa sirbishi di misionero den estranheria den e 17 paisnan na cua nan ta ser mandá. Na nan graduacion, un auditorio internacional di 5.015 persona a compartí e goso dje ocasion. Ki conseho final práctico e studiantenan di Galad ei a ricibí?

Animacion Oportuno pa Misioneronan Nobo

Despues dje comentarionan di apertura dje presidente, Ralph Walls, un asistente dje Comité di Personal dje Cuerpo Gobernante, a duna e promé discurso breve cu conseho práctico p’e misioneronan nobo. Su tema tabata “Corda Stima.” El a mustra cu Bijbel, na 2 Timoteo capítulo 3, a predicí cu e mundu lo carecé mas i mas di amor. El a ofrecé e recordatorio oportuno aki n’e misioneronan nobo, na armonia cu e descripcion di amor hañá na 1 Corintionan 13:1-7: “Como misioneronan, boso por surpasá boso cuota di ora. Boso por tin un conocimentu ricu for di boso entrenamentu na Galad. Of nos celosamente por traha ‘overtime’ na nos asignacion na sucursal. Pero tur nos esfuerso i sacrificionan lo no bal nada si nos lubidá amor.”

Siguientemente tabatin Carey Barber, dje Cuerpo Gobernante, riba e programa kende a considerá e tema “Jehova Ta Guiando Nos na Victoria.” For di nan cuminsamentu chikitu despues di Guera Mundial I, Jehova Dios a guia su fiel sirbidónan na victoria den e proclamacion dje bon nobo di su Reino, apesar di persecucion. Na 1931 e Studiantenan di Bijbel, manera nan tabata conocí e tempu ei, a adoptá e nomber Testigonan di Jehova, causando e rabia pisá di clero di cristiandad. “E di 102 klas di misioneronan entrená na Galad awor tin e privilegio magnífico di por tin un participacion amplio den e trabou glorioso di duna mas tantu hende posibel e oportunidad di siña e nomber sagrado ei,” Ruman Barber a declará. Nan ta ser agregá n’e lista largu di 7.131 misionero cu a ser entrená na Scol di Galad i cu a yuda extendé e predicacion dje Palabra di Dios for di 54 pais na 1943 te na 233 pais awe.

E siguiente orador, Lloyd Barry, tambe dje Cuerpo Gobernante, tabata un graduado dje di 11 klas di Galad i a sirbi como misionero na Hapon pa mas cu 25 aña. El a duna animacion cu su tema, “Persistí den e Cosnan Aki.” “Hopi di boso goso lo bini di awante,” el a bisa e studiantenan. Ki recompensanan ta bini for di wanta den e trabou di misionero of den cualkier asignacion teocrático? “Riba tur cos, nos awante ta haci Jehova su curason alegrá . . . Nos por haña gran satisfaccion den warda integridad bou di prueba . . . Haci sirbishi di misionero boso vocacion den bida . . . Boso recompensa lo ta un caluroso ‘bon hací.’” (Mateo 25:21; Proverbionan 27:11) Na conclusion di su presentacion, Ruman Barry a recomendá di curason p’e misioneronan nobo “persistí den e cosnan aki” dor di ser determiná pa haci e campo di misionero nan bida mes.—1 Timoteo 4:16.

“Kico Boso Lo Mira?” tabata e pregunta di Karl Adams, kende tambe a duna instruccion na hopi klas di Galad. El a mustra cu loke e misioneronan nobo lo mira den nan asignacion ta dependé no solamente di nan bista físico, sino tambe dje wowonan di nan curason. (Efesionan 1:18) El a ilustrá esaki cu loke e spionnan israelita a mira ora nan a inspeccioná e Tera Primintí. Tur e 12 spionnan a mira e mésun cosnan for di un punto di bista físico, pero solamente dos a mira e Tera Primintí for dje punto di bista di Dios. Misioneronan tambe por mira cosnan di un manera diferente. Den algun pais caminda nan lo sirbi, nan por mira pobresa, sufrimentu i desesperacion. Pero nan no mester reaccioná negativamente i bandoná nan asignacion. Ruman Adams a conta di un misionero for di un klas recien cu a bisa: “E experencianan aki a hací mi realisá cu mi tin cu keda aki. E hendenan aki mester di un speransa pa futuro. Mi kier haci un diferencia den nan bida.” Ruman Adams a concluí animando e misioneronan nobo pa mira e paisnan na cua nan ta ser mandá como áreanan cu Jehova a determiná pa haci parti di Su Paradijs mundial i pa mira e hendenan einan como miembronan prospectivo dje sociedad di mundu nobo.

Wallace Liverance, kende a sirbi pa un cantidad di aña den e campo di misionero promé cu el a bira un instructor di Galad, a duna e discurso final den e parti aki dje programa. “Actua cu Perspicacia den e Obranan Maraviyoso di Dios” tabata su tema. Actua cu perspicacia ta nificá actua cu prudencia, discrecion i sentido comun. Esei tabata algu cu Rey Saul di Israel no a haci.—1 Samuel 13:9-13; 15:1-22.

Un manera pa actua cu perspicacia ta di aceptá e desafionan di ahustá na un moda nobo di biba, incluyendo siña un idioma nobo i conocé e hendenan. E experencianan cu misioneronan tin den enfrentá desafionan i vence obstáculonan por fortalecé nan spiritualmente den e manera cu Hosué i Caleb a ser fortificá ora nan a conkistá e tera cu Dios a asigná na nan.

Entrevistanan

E siguiente parti dje programa a incluí un seri di entrevista. Harold Jackson a entrevistá Ulysses Glass, secretario general i instructor pa hopi tempu di Scol di Galad, kende awor tin 85 aña di edad. Hopi misionero cu ta den e campo ainda ta corda bon e añanan cu el a duna siñansa i entrenamentu fielmente. Despues a bini Mark Noumair, un instructor di Galad cu a dedicá 11 aña como misionero na Africa promé cu el a djoin e cuerpo di instructor di Scol di Galad. El a entrevistá studiantenan tocante nan ministerio durante e cincu lunanan di nan siñansa. Nan experencianan a demostrá claramente cu tin hende interesá den e Palabra di Dios den e teritorio local.

Despues Robert Ciranko i Charles Molohan a papia cu hombernan experenciá cu tabata asistiendo na un otro scol n’e facilidadnan, un scol pa personal di sucursal. Den nan conseho n’e klas di graduadonan nan a incluí e necesidad pa ser humilde i contribuí n’e unidad dje congregacion. Nan a sugerí e graduadonan pa no forma ideanan di antemano di loke lo sosodé den e trabou di misionero, sino, mas bien, simplemente keda dispuesto pa aceptá kico cu nan topa den nan caminda. Aplicando e conseho aki indudablemente lo yuda e misioneronan nobo cumpli cu nan asignacionnan como maestronan dje Palabra di Dios.

Finalmente, Theodore Jaracz, miembro dje Cuerpo Gobernante, a dirigí su mes n’e auditorio riba e tema “Kico Ta Influenciando Ken?” El a splica cu ora nos como cristiannan desplegá e fruta di spiritu, nos por ta un bon influencia riba otro hende. “Misioneronan cu ta ser mandá dor dje organisacion di Jehova a producí un registro encomendabel di influenciá hende den un manera saludabel i spiritual,” el a bisa. Anto el a cita algun comentario cu individuonan a haci kendenan a ser yudá pa sirbi Dios como resultado dje bon ehempel cu misioneronan a pone. “Ohalá boso mantené e reputacion cu Jehova su pueblo a haña i sigui yama na casnan den boso asignacion den estranheria en busca di esnan merecedor . . . Tambe, pa medio di boso conducta recto i limpi, resistí e spiritu dje mundu aki, i sea un influencia p’e bienestar di otronan p’e gloria i onor di Jehova,” el a concluí.

Den e parti final dje programa, e presidente a compartí saludonan for di tur parti di mundu i despues a presentá e diplomanan i anunciá e asignacionnan di misionero. Despues di esei, un dje graduadonan a lesa un resolucion dje klas cu a expresá gratitud p’e instruccion cu a ser suministrá. Claramente, e programa di graduacion dje di 102 klas a haci tur persona den e auditorio mas determiná pa sigui padilanti den publicá e Palabra di Dios.

[Plachi na página 31]

E di 102 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan di robes pa drechi den cada rij.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.