Testigonan di Jehova Rond Mundu—Brazil

BRAZIL ta un pais gigantesco den hopi sentido. Na tantu tamaño como poblacion, e ta e di cincu pais mas grandi na mundu. E ta cubri casi mitar dje área di tera di Sur América i su poblacion ta mas grandi cu di tur e otro paisnan dje continente ei contá huntu. Brazil tin tambe e selva di yobida di mas grandi di mundu. Dor dje selva ei ta pasa e riu di mas poderoso riba tera—Riu Amazona.

Brazil ta un gigante tambe den un otro sentido. E cantidad di su publicadornan dje bon nobo dje Reino di Dios ta yegando 400.000, i aña pasá mas cu 1.000.000 persona a asistí n’e Memorial dje morto di Cristo. P’esei e pais aki ta sobresalí specialmente pa loke ta e trabou di predicacion di Reino. Experencianan recien ta ilustrá e punto aki.

Sirbiendo Caminda e Necesidad Ta Mas Grandi

Antonio i su esposa a tuma e decision difícil di bandoná nan famianan i un trabou sigur i bon pagá na São Paulo pa sirbi caminda e necesidad pa proclamadornan di Reino tabata mas grandi den e estado di Minas Gerais. Nan teritorio a incluí un colonia di trahadornan na un refineria di sucu. E promé dia cu nan a duna testimonio ei, nan a cuminsá nuebe studio di Bijbel. Dentro di 18 luna, nan tabata conduciendo mas cu 40 studio!

Na principio, reunionnan tabata ser tené den e refineria mes. Sin embargo, e publicadornan nobo kier a mira un berdadero Salon di Reino. P’esei, e rumannan a huur un bus pa hiba 75 persona n’e congregacion di mas cerca. Despues tabatin un congreso; 45 dje studiantenan di Bijbel nobo a asistí i a ser entrevistá. Diescincu di esakinan a ser bautisá n’e ocasion ei. Innecesario pa bisa cu lágrimanan di goso a basha libremente!

E mésun compania di bus a ser usá pa biahenan similar, i e funcionarionan a percurá pa un tarifa reducí. Como aprecio, Antonio a regalá e doño dje compania un buki pa studio di Bijbel. El a bai di acuerdo pa cuminsá studia Bijbel e mésun anochi ei i a ser bautisá despues di vários luna di estudio diligente. Na principio su esposa a oponé e studio, pero cu tempu, su actitud a suavisá. Awe e tambe ta un Testigo bautisá di Jehova.

Na februari di 1992 un congregacion cu 22 publicador activo a ser formá. Pa 1994 e cantidad aki a aumentá na 42, cu 4 pionero regular, of predicador di tempu completo dje bon nobo. Como resultado, Antonio a concluí: “Ami i mi esposa a mira cu si nos ‘pone Jehova na prueba,’ manera Malakías 3:10 ta declará, lo e ‘basha riba nos un bendicion te cu no tin falta mas.’ ”

Ofreciendo Literatura Bíblico

Tal bes un otro motibu pakico e trabou di predicacion ta dal stapnan asina gigantesco na Brazil ta cu e Testigonan ta ofrecé literatura bíblico na tur oportunidad. Por ehempel, un congregacion a skirbi e oficina di sucursal dje Sociedad Watch Tower pidiendo 250 ehemplar dje buki Loke hovenan sa puntra—contesta práctica. Pakico un pedido asina grandi?

E carta a splica: ‘Un dje scolnan den e pueblo a dicidí di usa e buki aki como material di siñansa den un dje vaknan. E decision dje autoridadnan di scol ta debí n’e testificacion informal cu a ser hací dor di mayornan dje studiantenan kendenan ta Testigo di Jehova i dor di un dje supervisornan dje scol. Cu Jehova sigui bendicioná su sirbidornan segun cu nan ta percurá instruccion excelente cu e buki aki.’ Sí, i cu Jehova sigui bendicioná e progreso excelente dje trabou di predicacion di Reino den e pais gigantesco di Brazil.

[Kuadro na página 8]

DETAYENAN DJE PAIS

Aña di Sirbishi di 1994

MAXIMO CANTIDAD DI PUBLICADOR: 385.099

PROMEDIO: 1 Testigo pa 404

ASISTENCIA NA MEMORIAL: 1.018.210

PROMEDIO DI PUBLICADOR PIONERO: 38.348

PROMEDIO DI STUDIO DI BIJBEL: 461.343

CANTIDAD BAUTISA: 24.634

CANTIDAD DI CONGREGACION: 5.928

OFICINA DI SUCURSAL: CESÁRIO LANGE

[Plachi na página 9]

Un auto cu sistema di zonidu na São Paulo rond di 1940

[Plachi na página 9]

Dunando Testimonio den e Hardin Botánico na Rio de Janeiro

[Plachi na página 9]

Oficina di Sucursal na Cesário Lange