Tempu A Cambia

KI UN goso lo mester tabata pa biba den Israel di antigwedad bou dje glorioso reinado di fiel Rey Sálomon! Tabata un era di pas, prosperidad i felicidad. Durante e tempu cu Sálomon a apoyá adoracion berdadero lealmente, Jehova a bendicioná e nacion abundantemente. Dios a duna Rey Sálomon no solamente gran rikesa, sino tambe “un curason sabí i cu comprendimentu” pa Sálomon goberná den husticia i amor. (1 Reynan 3:12) Bijbel ta declará: “Tur e reynan dje tera tabata busca e cara di Sálomon pa tende su sabiduria, cua e Dios berdadero a pone den su curason.”—2 Crónicanan 9:23.

Na e pueblo, Jehova a duna siguridad, pas i un abundancia di cos bon. E Palabra di Dios ta bisa: “Huda i Israel tabata hopi, manera e pipitanan di santu cu tin cant’i laman di hopi cu nan tabata, comiendo i bebiendo i alegrando.” Tantu literalmente como figurativamente, e pueblo “a sigui biba den siguridad, cada un bou di su mes ramada di wijndruif i bou di su mes palu di figu . . . tur e dianan di Sálomon.”—1 Reynan 4:20, 25.

Tempu a cambia. Bida awe ta masha diferente di e dianan felis ei di hopi tempu pasá. Distinto dje tempu di Sálomon, un problema principal awe ta pobresa. Asta den nacionnan ricu, tin pobresa. Por ehempel, tantu na Merca como na paisnan dje Union Europeo, casi 15 porciento dje pueblo ta biba den pobresa, segun e Programa di Desaroyo di Nacionnan Uní.

Relacioná cu e cuadro global, The State of the World’s Children 1994, un informe di UNICEF (Fondo di Nacionnan Uní pa Mucha) ta remarcá cu un kinta parti dje poblacion di mundu ta biba den pobresa absoluto, agregando cu bida pa mayoria hende pober di mundu ta “birando mas i mas duru i desesperante.”

Den algun pais, inflacion cu ta subi rápidamente ta aumentá e dificultadnan di hende pober. Un señora den un pais africano a bisa: “Bo ta mira algu na plasa i bo ta bisa, ‘OK, lagá mi bai cas bai coge placa pa cumpr’é.’ Bo ta bolbe bek un ora despues i nan ta bisá bo cu bo cen no ta yega pasobra e prijs a caba di subi. Kico un hende tin cu haci? Esei ta basta frustrante.”

Un otro señora n’e pais ei a bisa: ‘Pa sobrebibí, nos ta lubidá tocante otro necesidadnan cu no ta cuminda. Con pa haña cuminda ta nos preocupacion awor.’

Segun Nacionnan Uní, e futuro ta poco prometedor. UNICEF, por ehempel, ta calculá cu si e actual crecementu di poblacion continuá, e cantidad di hende pober mundialmente lo bira cuater biaha mas tantu “den un solo duracion di bida.”

Sin embargo, apesar di condicionnan económico i social cu ta empeorando, sirbidornan di Dios tin motibu pa sinti nan mes optimista. Aunke nan ta biba meimei di esnan cu ta mira e futuro cu mas i mas pesimismo, sirbidornan di Dios ta wak e futuro cu goso i confiansa. E siguiente artículo lo analisá e motibunan pakico.

[Plachi Rekonosementu na página 3]

De Grunne/Sipa Press