Un Caminda Hanchu cu Poco Libertad

Un famia di tres—tata, mama i yu muher chikitu—tabata na cas na Sydney, Australia, ora e cas a pega candela. Nan a purba bula dor di bentana, pero esakinan tabatin hekwerk nan dilanti. Debí na e hekwerk di siguridad, e bomberonan no por a scapa nan. E mama i tata a muri den e huma i candela. E yu muher despues a muri na hospital.

KI TRISTU cu e famia aki a muri debí na instalacionnan di siguridad cu supuestamente mester a protehá nan! E echo cu e famia aki no ta e único cu tin su cas protehá cu baranan di heru i loknan di siguridad ta indicá indirectamente con malu nos tempu ta. Hopi dje bisiñanan tambe tin cas i propiedadnan cu ta parce fortinan. Pakico? Nan ta buscando siguridad i pas mental. Ki un frustracion pa un sociedad “liber” ora hende ta sinti nan a salbo solamente ora nan ta cerá manera prizonero den nan mes cas! Den un cantidad aumentante di becindario, muchanan no por hunga a salbo mas den un parke cercano of cana bai scol sin compaño di un mayor of un otro persona adulto. Den hopi aspecto di bida, libertad ta disparciendo manera serena di mainta.

Un Patronchi di Bida Cambiá

E tempu di nos welanan tabata distinto. Como mucha, nan generalmente por a hunga unda cu nan tabata kier sin miedu. Como adulto, nan no tabata obsesioná cu mecanismonan di siguridad den nan cas. Nan a sinti nan mes liber i te na cierto grado nan tabata liber. Pero nos welanan a mira e spiritu dje areglo social cambia durante e duracion di nan bida. El a bira mas friu, mas egoista; den hopi lugá amor pa próhimo a ser reemplasá cu miedu di próhimo, locual a contribuí na e suceso trágico mencioná ariba. Huntu cu e creciente falta di libertad aki tabatin un deterioro constante di balornan moral. Sociedad a namorá di un “moralidad nobo,” pero en realidad, nos a alcansá un situacion awor caminda ta difícil pa mira cualkier moralidad mes.

Un ex-profesor di educacion na e Universidad di Queensland, Dr. Rupert Goodman, ta skirbi: “Hóbennan ta ser exponé awor na un . . . estilo di bida distinto i hedonista, caminda e ‘ami’ ta central: complacencia propio, conciencia propio, satisfaccion propio, interes propio.” Tambe e ta bisa: “Balornan manera dominio propio, nenga bo mes, trabou duru, economia, respet pa autoridad, amor i onor pa mayornan . . . ta conceptonan desconocí pa hopi hende.”

En Berdad un Caminda Hanchu

Esnan familiarisá cu profecia bíblico no ta keda sorprendí cu e egoismo prevalente aki, pasobra Jesucristo a spierta su oyentenan: “Hanchu i espacioso ta e caminda cu ta hiba na destruccion i hopi ta esnan cu ta drenta dor di dje; miéntras cu smal ta e porta i pertá e caminda cu ta hiba na bida i poco ta esnan cu ta hañ’é.” (Mateo 7:13, 14) E promé caminda, cu lugá amplio pa hopi biahero, ta “hanchu” pasobra e no ta ser restringí dor di laga principionan bíblico dirigí moralidad i bida di tur dia. E ta atraé esnan cu ta gusta pensa manera nan kier i haci loke nan kier—sin reglanan, sin compromisonan.

Ta cierto cu hopi hende cu a scoge e caminda hanchu ta afirmá di ta disfrutando di nan libertad. Pero mayoria di nan ta ser impulsá dor di un actitud prevalente di egoismo. Bijbel ta bisa cu nan ta ser dominá dor di e “spiritu cu ta obra awor den e yunan di desobedencia.” E spiritu aki ta impulsá nan pa biba “na armonia cu e . . . carni, haciendo loke ta e boluntad dje carni,” sea cu esei ta inmoralidad, abusu di droga of siguimentu sin escrúpulo tras di rikesa, prestigio of poder.—Efesionan 2:2, 3.

E Caminda Hanchu Ta Hiba na Desaster

Ripará cu esnan cu ta biahando riba e caminda hanchu ta ser impulsá pa haci “loke ta e boluntad dje carni.” Esaki ta mustra cu nan absolutamente no ta liber—nan tin un doño. Nan ta esclabo dje carni. I sirbiendo e doño aki por hiba na hopi problema—pandemia di malesanan transmití sexualmente, famianan kibrá dor di divorcio of separacion, curpa i mentenan cu ta malu debí na abusu di droga i alcohol, pa mencioná djis un par di consecuencia. Asta actonan di violencia, ladronicia i violacion tin nan rais den e forma di pensa egoista cultivá riba e caminda hanchu permisivo aki. I, miéntras cu e ‘caminda aki cu ta hiba na destruccion’ ta sigui existí, su frutanan lo bira mas i mas perhudicial.—Proverbionan 1:22, 23; Galationan 5:19-21; 6:7.

Considerá dos ehempel di bida real for di Australia. Mary a sucumbí na tentacion, haciendo maluso di droganan adictivo i tambe cometiendo inmoralidad.a Pero e felicidad cu e tabata busca a keda slep bai for di dje. Asta despues di a haña dos yu, su bida tabata parce bashí. El a alcansá su pió depresion ora el a haña sa cu el a pega cu AIDS.

Tom a ser perhudicá den un manera distinto. “Mi a ser criá n’e centro misional di un misa na parti nort di Queensland,” e ta skirbi. “Cu 16 aña, mi a cuminsá bebe pisá. Mi tata, tionan i amigunan tur tabata bebedornan pisá, pues esei a parce e cos natural pa haci. Mi a yega na e punto cu mi tabata bebe cualkier cos, for di cerbes te alcohol metilá. Tambe mi a cuminsá pusta riba cabai, tin biaha perdiendo mayor parti di mi salario cu mi a traha duru p’e. Esaki no tabata un suma chikitu, ya cu mi trabou di corta caña tabata paga hopi bon.

“Despues mi a casa i nos a haña yunan. En bes di carga mi responsabilidadnan, mi a haci loke mi amigunan a haci—bebe, hunga wega di placa i bringa. Hopi bes mi a ser encarcelá den e prizon local. Pero asta esaki no tabatin ningun efecto riba mi. Mi bida tabata un bahada constante. E tabata yen di problema.”

Sí, dor di entregá na deseonan robes, Tom i Mary a perhudicá no solamente nan mes sino tambe nan famianan. Lástimamente, hopi otro hóben tin tendencia di ser seducí dor dje spiritu liberal i mal dirigí di libertad cu ta ser ofrecé riba e caminda hanchu. Si solamente hóbennan por a bira conciente dje aparencia engañoso dje libertad aki. Si solamente nan por a mira e realidadnan dje caminda hanchu—e consecuencianan severo cu tur cu ta biahando riba dje eventualmente mester paga. Ta cierto cu e caminda ta hanchu i fácil pa subi ariba. Pero su hanchura mes ta su maldicion. E curso di sabiduria ta pa tuma na pechu e echo innegabel cu “esun cu ta sembra cu su carni na bista lo cosechá corupcion for di su carni.”—Galationan 6:8.

Sin embargo, tin un mihó opcion. Esei ta e caminda smal. Pero con restrictivo, con pertá i smal e caminda aki ta? I na unda e ta hiba?

[Notanan]