E Caminda Smal cu Ta Hiba na Libertad

POCO hende inteligente ta disputá cu e universo ta ser dirigí dor di leynan natural. E leynan aki ta controlá tur cos for di atomnan chikiritiku te na galaxianan inmenso conteniendo miles di miyones di strea. Si no tabatin leynan natural, lo no por tabatin planeamentu ni comprendimentu; bida mes lo no por a existí. Dor di comprendé leynan natural i cooperá cu nan, hende a logra haci hazañanan asombroso, manera cana riba luna i transmití imágennan na color for di cualkier lugá riba tera of asta mas ayá dje atmósfera dje tera te riba e pantayanan di television den nos cas.

Pero kico di leynan moral? Pegamentu na nan ta mésun probechoso i productivo? Ta parce cu hopi hende ta pensa cu no tin leynan moral i nan ta scoge un filosofia of religion permisivo cu ta cuadra cu nan mes deseonan.

Sin embargo, tin algun hende cu ta scoge un otro caminda, e ‘caminda smal cu ta hiba na bida’ manera e ta ser describí den Bijbel. Nos no mester keda sorprendí cu esaki ta e decision di solamente e minoria, pasobra Jesus a bisa di e caminda smal: “Poco ta esnan cu ta hañ’é.” (Mateo 7:14) Pakico solamente un poco?

Pasobra e caminda smal ta ser restringí dor dje leynan i principionan di Dios. Lo e atraé solamente un persona cu sinceramente ta deseá di conformá su bida na e normanan di Dios. Na contraste skerpi cu e caminda hanchu, cu ta duna e ilusion di libertad pero cu en realidad ta esclabisá hende, e caminda smal, cu ta parce restrictivo, ta libra un persona den tur aspecto importante. Su límitenan ta ser poné dor di “e ley perfecto cu ta pertenecé na libertad.”—Santiago 1:25.

Con e Caminda Smal Ta Libra

Ta cierto cu no ta semper fácil pa keda riba e caminda smal. Tur humano bibiente ta imperfecto i tin un tendencia heredá pa cometé malecho. Pues un persona por ta incliná na dualu un poco. No obstante, e beneficionan di pega na ‘e caminda pertá’ ta bal cualkier disiplina propio of ahuste necesario, pasobra Dios ‘ta siña nos beneficiá nos mes.’—Isaías 48:17; Romanonan 3:23.

Pa ilustrá: Mayornan sabí ta planea un ‘caminda pertá’ den forma di un dieta restringí pa nan yunan. Esaki tin biaha ta nificá ser firme na ora di come. Pero ora e muchanan bira grandi, nan lo apreciá e disiplina amoroso di nan mayornan. Como adulto, nan lo a adkerí caba un smak pa cuminda saludabel. I e variedad amplio di cuminda nutritivo disponibel lo evitá cu nan hamas lo sinti nan restringí.

Den un sentido spiritual, Dios ta haci mescos cu esnan riba e caminda smal cu ta hiba na bida. E ta cultivá den esnan mansu deseonan saludabel cu ta hiba na felicidad i berdadero libertad. Dios ta haci esaki dor di percurá su Palabra, e Bijbel. Ademas, e ta invitá nos pa pidi den oracion pa su spiritu yuda nos i e ta manda nos asociá cu compañeronan cristian, kendenan por animá nos pa permanecé riba e caminda smal. (Hebreonan 10:24, 25) Sí, Dios ta amor i e cualidad supremo aki ta e base di su obhetivonan i tur su métodonan.—1 Juan 4:8.

Ora amor, pas, bondad, dominio propio i otro frutanan di Dios su spiritu ta prevalecé, e caminda smal no ta parce restrictivo. Manera e texto bíblico ta bisa, “contra tal cosnan no tin ley.” (Galationan 5:22, 23) “Caminda e spiritu di Jehova ta, ei tin libertad.” (2 Corintionan 3:17) Asta awor, cristiannan berdadero ta purbando e libertad aki. Nan ta liber di hopi dje temornan cu ta afligiendo hende awe, tal como temor dje futuro i temor supersticioso di morto. Ki emocionante ta pa contemplá e futuro ora “e tera siguramente lo ta yen cu e conocimentu di Jehova mescos cu e awa ta cubriendo e laman mes”! (Isaías 11:9) E ora ei, asta temor di crímen lo no t’ei mas. Loknan i baranan di heru lo a disparcé pa semper. Tur hende lo sinti nan liber i a salbo—di dia i anochi, den cas i pafó. Esei lo ta libertad en berdad!

Nos Ta Ser Sigurá di Dios Su Yudansa

Ta berdad cu bibando segun e normanan di Dios ta rekerí esfuerso, sin embargo “su mandamentunan no ta pisá,” asta pa hende imperfecto. (1 Juan 5:3) Segun cu nos ta ahustá na e caminda smal i ta sinti e beneficionan di cana riba dje, nos ta desaroyá un creciente disgusto pa cu e accionnan i forma di pensa cu ta caracterisá esnan riba e caminda hanchu. (Salmo 97:10) Obedeciendo e ley di Dios ta apelá na e concenshi cu Dios a duna nos. En bes di “e dolor di curason” i “puru kebranto di spiritu” cu ta característica di hopi hende, Dios ta primintí: “Mira! Mi mes sirbidornan lo sclama gososamente debí n’e bon condicion di curason.” Sí, un curason entrená dor di Jehova ta gososo i liber.—Isaías 65:14.

Jesus a muri pa haci berdadero libertad posibel pa nos. Bijbel ta bisa: “Dios a stima mundu asina tantu cu el a duna su Yu unigénito, pa tur hende cu ehercé fe den dje no sea destruí sino haña bida eterno.” (Juan 3:16) Awor, como e Rey di Dios su Reino celestial, Jesus ta aplicando e beneficionan di e sacrificio ei. Aki poco tempu, despues di “e tribulacion grandi,” ora e caminda hanchu i esnan riba dje ser destruí, pacientemente lo e cuminsá guia humanidad obediente riba e resto dje caminda smal te na su final, perfeccion humano. (Revelacion 7:14-17; Mateo 24:21, 29-31) Por fin nos lo experenciá e realisacion dje promesa magnífico: “Creacion mes tambe lo ser librá for di sclabitud na corupcion i tin e glorioso libertad dje yunan di Dios.” E libertad aki cu Dios ta duna no por ser surpasá. Lo deshací asta di morto.—Romanonan 8:21; Revelacion 21:3, 4.

Dor di mira i comprendé claramente na unda e caminda smal ta hiba, un persona ta mihó capacitá pa scoge e caminda aki i sigui cana riba dje. Esnan hóben en particular ta ser yudá pa no demostrá falta di prudencia i pa no iritá na loke nan ta considerá como restriccionnan imponé dor dje normanan di Dios. Nan ta siña mira e cosnan aki como un prueba di e amor di Dios i como un proteccion contra e maldadnan dje caminda hanchu. (Hebreonan 12:5, 6) Naturalmente, un persona mester tin pacenshi, cordando cu ta tuma tempu pa desaroyá cualidadnan i deseonan piadoso, mescos cu ta tuma tempu pa un palu di fruta producí bon fruta. Pero e palu lo producí si e ser cultivá i muhá.

Pues studia e Palabra di Dios, asociá cu otro cristiannan i “haci oracion sin stop” pa spiritu santu. (1 Tesalonicensenan 5:17) Confia den Dios pa yudá bo “haci bo camindanan stret.” (Proverbionan 3:5, 6) Pero tur esaki ta práctico? Realmente e ta duna e resultado deseá? Sí, el a duna e resultado deseá pa tantu Tom como pa Mary, kendenan a ser mencioná den e artículo anterior.

Nan A Stop di Cana Riba e Caminda Hanchu

Tom ta skirbi: “Meimei di añanan ’70, nos a bini den contacto cu Testigonan di Jehova ora un di nan a bishitá nos cas. E combersacion a hiba na un studio di Bijbel. Gradualmente mi a cuminsá drecha mi bida. Mi a ser bautisá na 1982 i ta sirbiendo awor den e congregacion local. Nos yu homber tambe ta bautisá awor. Mi ta gradicí mi esposa cu el a soportá mi tur e añanan ei promé cu mi a siña e berdad. I riba tur cos mi ta gradicí Jehova i su Yu, Cristo Jesus, pa tur loke nan a duna nos i pa e speransa cu nos tin awor pa e futuro.”

I kico di Mary? Wel, el a sinti cu Dios nunca lo a pordon’é, pero e kier a siña tocante dje pa su yunan. Ora el a tende cu Testigonan di Jehova tabata siñando su bisiña e Bijbel, e tambe a pidi pa yudansa. Sin embargo, su custumbernan malu tabata hopi profundo den dje i nan tabata strob’é di haci progreso. E studio tabata pasa dor di periodonan di progreso i di cai bek atras. Sin embargo, su yu muher chikitu di siete aña, tabata sigui anim’é. “Ban, Mami. Mami por haci’é!” e tabata bisa. Anto Mary tabata haci mas esfuerso.

Ora Mary su compañero di bida, tambe un usador di droga, a bolbe cas, e tambe a uni n’e studio. Cu tempu ámbos a vence nan custumbernan malu. Anto, despues di a legalisá nan matrimonio i a ser bautisá, nan a experenciá gran felicidad i a sinti manera un berdadero famia pa promé biaha. Lástimamente, AIDS finalmente a tuma Mary su bida, pero el a muri cu su curason fihá riba e promesa bíblico di un resureccion i bida riba un tera paradísico, limpiá di tur rastro dje caminda hanchu maligno.

Sí, ta posibel pa baha for dje caminda hanchu i espacioso cu ta hiba na destruccion. Cristo Jesus a bisa: “Esaki ta nificá bida eterno, nan ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Pakico anto no dicidí pa cana riba e caminda smal cu ta hiba na bida? Dor di tuma na pechu i aplicá loke bo ta siña for dje Palabra di Dios, bo por experenciá personalmente e promesa alentador dje Bijbel: “Boso lo conocé e berdad i e berdad lo haci boso liber.”—Juan 8:32.