Aña di esfuersonan frustrá

“NOS, COMO PUEBLONAN DI NACIONNAN UNI, A DETERMINA pa salba e futuro generacionnan for dje castigu di guera, cua dos biaha den transcurso di nos bida a trece tristesa incontabel pa humanidad, i pa reafirmá fe den derechonan humano fundamental, den e dignidad i balor dje persona humano, den e derechonan igual di homber i muher i di nacionnan grandi i chikitu, . . .”—Preámbulo dje statuto di Nacionnan Uní.

BINTICUATER di october, 1995, ta marca e di 50 aniversario di Nacionnan Uní. Tur e actual 185 Estadonan miembro ta comprometé n’e principionan i metanan original dje organisacion manera nan ta ser expresá den e statuto ei: pa mantené pas i siguridad internacional; pa caba cu actonan di agresion cu ta menasá pas mundial; pa animá relacionnan amistoso entre nacionnan; pa protehá e libertadnan fundamental di tur pueblo sin discriminacion basá riba rasa, sexo, idioma of religion; i pa alcansá cooperacion internacional den solucioná problemanan económico, social i cultural.

Pa 50 aña e organisacion di Nacionnan Uní a haci esfuerso notabel pa producí pas i siguridad mundial. Bo por argumentá cu kisas e por a prevení un tercer guera mundial, i e destruccion na gran escala di bida humano mediante e uso di bom nuclear no a ser ripití. Nacionnan Uní a percurá cuminda i remedi pa miyones di mucha. El a contribuí na mihó normanan di salú den hopi pais, percurando, entre otro cosnan, awa di bebe mas limpi i inmunisacion contra malesanan peligroso. Miyones di refugiado a ricibí yudansa humanitario.

Como reconocimentu di su logronan, e organisacion di Nacionnan Uní a ser otorgá e Premio Nobel di Pas cincu biaha. Sin embargo, e realidad lamentabel ta cu ainda nos no ta biba den un mundu sin guera.

Pas i Siguridad—Metanan cu No A Ser Alcansá

Despues di 50 aña di esfuerso, pas i siguridad ta metanan cu no a ser alcansá ainda. Den un discurso recien n’e Asamblea General di Nacionnan Uní, e presidente di Merca a expresá su frustracion bisando cu “e siglo aki cu asina tantu speransa i oportunidad i logro tabata tambe un época di destruccion i desesperacion profundo.”

Ora aña 1994 a caba, The New York Times a comentá: “Casi 150 guera of bataya menor ta andando den cua miles di hende ta muriendo—mas civil cu soldat segun mayoria cálculo—i cientos di miles ta birando refugiado.” E Departamento di Nacionnan Uní di Informacion Público a informá cu desde 1945 mas cu 20 miyon hende a perde nan bida como resultado di conflictonan armá. E embahador mericano na Nacionnan Uní, Madeleine Albright, a remarcá cu “conflictonan regional den hopi manera awor ta mas brutal.” Violacion di derechonan humano i discriminacion ta aparecé den noticia riba un base diario. Hopi nacion ta parce di tolerá un e otro mas bien cu bira amigu di otro.

Señor David Hannay, embahador británico na Nacionnan Uní, a admití cu “Nacionnan Uní tabata, te cu añanan 80, basta cerca di ser un fracaso bon intencioná.” E secretario general di Nacionnan Uní, Boutros Boutros-Ghali, a lamentá cu tin un creciente indiferencia i cansancio entre Estadonan miembro ora ta toca operacionnan pa mantené pas. El a concluí cu pa hopi dje miembronan, “Nacionnan Uní no ta un prioridad number un.”

Influencia di Medionan di Comunicacion

Mes poderoso cu Nacionnan Uní por parce di ta, su esfuersonan hopi biaha ta ser frustrá dor di política i medionan di comunicacion. Nacionnan Uní ta sin poder si e falta e sosten di su miembronan. Pero sin e aprobacion público, hopi miembro di NU lo no sostené Nacionnan Uní. Por ehempel, segun The Wall Street Journal, e “fracasonan spectacular na Somalia i Bosnia a pone hopi mericano kere cu e organisacion no ta solamente malgastador, sino en realidad peligroso.” E actitud aki dje público, en buelta, a persuadí algun político mericano pa proponé un reduccion dje sosten financiero cu Merca ta duna na Nacionnan Uní.

Organisacionnan di noticia no ta vacilá ora di criticá Nacionnan Uní severamente. Términonan manera “incompetencia total,” “problemático,” “ineficiente” i “paralisá” a ser usá sin reserva ora di describí vários aspecto dje operacionnan di Nacionnan Uní. The Washington Post National Weekly Edition recientemente a declará cu “Nacionnan Uní ta keda un burocracia di movecion lento cu ta lucha pa adaptá n’e mundu actual.”

Un otro corant a cita e Secretario General Boutros Boutros-Ghali expresando su frustracion cu e masacrenan na Ruanda. El a bisa: “E ta un fracaso no solamente pa Nacionnan Uní; e ta un fracaso p’e comunidad internacional. I nos tur ta responsabel p’e fracaso aki.” Un popular edicion special di noticia na television na 1993 a declará cu Nacionnan Uní “a faya na stop e mayor menasa pa pas—e plamamentu di armanan nuclear.” E programa di television a papia di un Nacionnan Uní cu “pa décadanan tabata por lo general papiamentu sin muchu nificacion.”

E sintimentu extenso di desapunto aki ta motibu di hopi preocupacion p’e funcionarionan di Nacionnan Uní i ta agregá na nan frustracion. Tog, apesar dje frustracionnan, n’e di 50 aniversario di Nacionnan Uní, hopi ta parce di tin optimismo renobá i ta sperando riba un comienso frescu. Aunke embahador Albright ta reconocé e limitacionnan di Nacionnan Uní, el a resoná e sintimentunan di hopi hende ora el a bisa: “Nos tin cu stop di papia tocante unda nos tabata, i nos tin cu papia tocante unda nos ta bayendo.”

Sí, unda e mundu ta bayendo? Lo yega di existí un mundu sin guera? Si ta asina, ki papel Nacionnan Uní lo hunga den dje? Ademas, si bo ta temeroso di Dios, bo mester puntra, ‘Ki papel Dios lo hunga den dje?’

[Kuadro na página 4]

ESFUERSONAN FRUSTRA

Pas i siguridad no por existí tanten cu tin guera, pobresa, crímen i corupcion. Nacionnan Uní recientemente e publicá e siguiente estadísticanan.

Gueranan: “Dje 82 conflictonan armá entre 1989 i 1992, 79 tabata batayanan interno, di cua hopi tabata di un grupo étnico contra un otro; 90 porciento dje víctimanan tabata civilnan.”—Departamento di Informacion Público di Nacionnan Uní (UNDPI)

Armanan: “E ICRC [Comité Internacional di Crus Corá] ta calculá cu mas cu 95 fabricante den 48 pais ta produciendo entre 5 pa 10 miyon mina diseñá pa usa contra personal militar cada aña.”—Alto Comisario di Nacionnan Uní pa Refugiadonan (UNHCR)

“Na Africa, tin rond di 30 miyon mina plamá riba 18 pais.”—UNHCR

Pobresa: “Mundialmente, un di cada cincu hende—na tur mas cu mil miyon—ta biba bou dje nivel di pobresa, i un cálculo di 13 pa 18 miyon hende ta muri tur aña di causanan relacioná cu pobresa.”—UNDPI

Crímen: “Crímennan cu ta ser denunciá a aumentá na un promedio mundial di 5 porciento cada aña for di añanan 80; na Merca so, 35 miyon crímen ta ser cometé tur aña.”—UNDPI

Corupcion: “Corupcion público ta birando comun i coriente. Den algun pais segun cálculonan fraudenan financiero ta costa e ekivalente di 10 porciento dje pais su producto nacional bruto pa aña.”—UNDPI