Un Mundu Sin Guera—Na Ki Tempu?

E STATUTO di Nacionnan Uní a drenta na vigor dia 24 di october, 1945. E ta e strategia di mas amplio pa pas mundial cu a yega di ser diseñá dor di hende. Cu su 51 Estadonan miembro original, Nacionnan Uní a bira e organisacion internacional di mas grandi den historia di mundu. Tambe, pa promé biaha, un organisacion internacional lo tabatin acceso na un ehército pa imponé pas i siguridad i producí un mundu sin guera.

Awe, cu 185 Estado miembro, Nacionnan Uní ta mas fuerte cu nunca promé. Pakico, anto, e organisacion internacional di mas poderoso den historia a faya pa cumpli completamente cu su metanan noble?

Religion—Un Gran Strobansa

Un complicacion principal ta e papel cu religion ta hunga den asuntunan di mundu. Ta cierto cu for dje cuminsamentu di Nacionnan Uní, e religionnan principal dje mundu a primintí nan apoyo n’e organisacion ei. Refiriendo na su di 50 aniversario, Papa Juan Pablo II a papia di Nacionnan Uní como “e instrumento pa excelencia pa promové i salbaguardiá pas.” Su sintimentunan ta ser compartí dor di un comunidad mundial di lidernan religioso. Pero e vínculo diplomático aki entre religion i gobiernu no por sconde e echo cu religion tabata un strobansa i un molester pa Nacionnan Uní.

Pa siglonan religion a hunga un papel primordial den promové of sostené odio nacionalístico, guera i genocidionan [exterminacion di rasa]. Den añanan recien, bou dje pretexto di celo religioso, próhimonan a mata un e otro. E término “purificacion étnico” a ser usá ampliamente en coneccion cu e guera den e paisnan di Balkan. Sin embargo, e odio violento cu hopi persona aya tin un pa cu otro ta basá mas riba afiliacion religioso cu riba rasa, ya cu mayoria di nan tin e mésun orígen étnico. Sí, religion mester aceptá hopi dje responsabilidad p’e baño di sanger na ex-Yugoslavia, i Nacionnan Uní no tabata capas pa stop’e.

Apropiadamente, un profesor universitario di religion recientemente a declará cu “den un mundu despues di guera friu di militancia religioso aumentante, un examinacion di religion i genocidio por ta un di nos prioridadnan mas urgente, apesar dje incomodidad cu e ta crea.” Un conciencia nobo di con religion ta strobando e esfuersonan pa pas mundial ta bisto awe.

Un declaracion di NU na 1981 a declará: “Preocupá p’e manifestacionnan di intolerancia i p’e existencia di discriminacion den asuntunan di religion of creencia evidente ainda den algun área dje mundu, Determiná pa adoptá tur medida necesario p’e eliminacion rápido di tal intolerancia den tur su forma i manifestacionnan i pa prevení i combatí discriminacion riba e base di religion of creencia.”

Na armonia cu nan declaracion, Nacionnan Uní a declará 1995 como e Aña pa Tolerancia. No obstante, realísticamente mirá, lo ta posibel pa hamas alcansá pas i siguridad den un mundu dividí pa religion?

E Futuro di Religion

Un profecia den e buki bíblico di Revelacion ta percurá e contesta. E ta papia di un ‘gran muher simbólico di mala bida’ cu ta sinta como “un reina” i cu tin “un reino riba e reynan dje tera.” E muher di mala bida aki ta biba “den luho sin bergwensa” i tin relacion cu e gobiernunan dje mundu. E gobiernunan aki ta ser describí como “un bestia salbahe di color scarlata,” riba cua e muher di mala bida ta core cómodamente. (Revelacion 17:1-5, 18; 18:7) Conocí como “Babilonia e Grandi,” e muher poderoso i inmoral aki debe su nomber na Babilonia di antigwedad, e cuna di religion idolatrá. Apropiadamente, awe e muher di mala bida ta representá tur e religionnan di mundu, cuanan a mescla den e asuntunan di gobiernunan.

E relato ta sigui bisa cu, cu tempu, Dios lo hinca den curason dje componentenan militarista dje bestia salbahe pa tuma accion. Esakinan “lo odia e muher di mala bida i lo hacié desolá i sunú, i lo come su partinan carnal i lo kim’é completamente cu candela.” (Revelacion 17:16)a Asina Jehova Dios mes lo a tuma e iniciativa maniobrando nacionnan poderoso den un campaña pa eliminá religion falsu. E sistema religioso mundial, cu su tempel i santuarionan luhoso, lo ser desolá completamente. E strobansa religioso pa establecé pas i siguridad e ora ei lo ta kitá for di e políticonan su caminda. Pero asta n’e tempu ei, lo tin berdadero pas i siguridad riba tera?

Naturalesa Humano Imperfecto

Tin cualkier garantia cu eliminando religion realmente lo habri caminda pa un mundu sin guera? No. Nacionnan Uní lo sigui enfrentá un situacion irónico. Na un banda, hende ta deseá pas i siguridad. Tog, na otro banda, ta hende mes ta plantea e mayor menasa pa pas i siguridad. Odio, orguyo, egotismo, egoismo i ignorancia ta rasgonan humano cu ta e causa di tur conflicto i guera.—Santiago 4:1-4.

Bijbel a profetisá cu den nos tempu hende lo ta “stimador di nan mes, stimador di placa, halsá, arogante, blasfemador, desobediente na mayornan, malagradecidu, desleal, sin cariño natural, no dispuesto pa ningun acuerdo, calumniador, sin dominio propio, feros, sin amor pa bondad, traidor, cabesura, hinchá cu orguyo.”—2 Timoteo 3:1-4.

Secretario General Boutros Boutros- Ghali a reconocé cu “e mundu ta sufriendo di un crísis social i moral cu, den hopi sociedad, ta di proporcionnan inmenso.” Ningun cantidad di maniobra diplomático por neutralisá e rasgonan dañino di naturalesa humano imperfecto.—Compará cu Génesis 8:21; Jeremías 17:9.

Jesucristo—E Prins di Pas

Claramente, Nacionnan Uní no tin e abilidad pa trece pas mundial. Su miembronan i apoyadornan tur ta hende imperfecto, apesar di nan metanan elevá. Bijbel ta bisa cu “na hende terenal no ta pertenecé su caminda. No ta pertenecé na hende cu ta canando pa sikiera dirigí su paso.” (Jeremías 10:23) Ademas, Dios ta spierta: “No pone bo confiansa den noblenan, ni den e yu di hende terenal, na ken ningun salbacion ta pertenecé.”—Salmo 146:3.

Bijbel ta profetisá loke Jehova lo logra mediante su Yu, e “Prins di Pas.” Isaías 9:6, 7 ta declará: “Un yu a nace na nos, un yu a ser duná na nos; i e gobiernu di prins lo yega di ta riba su scouder. I su nomber lo ser yamá Maraviyoso Consehero, Dios Poderoso, Tata Eterno, Prins di Pas. N’e abundancia dje gobiernu di prins i na pas lo no tin fin.”

E nacionnan dje mundu a ser fadá pa 50 aña di esfuersonan frustrá. Masha pronto nan lo destruí e organisacionnan religioso parecido na muher di mala bida. E ora ei Jesucristo, e “Rey di reynan i Señor di señornan,” i su ehército di guerero celestial lo disolvé tur gobiernu humano i mata tur cu ta rechasá e soberania di Dios. (Revelacion 19:11-21; compará cu Daniel 2:44.) Usando e medio aki Jehova Dios lo producí un mundu sin guera.

[Notanan]

[Kuadro na página 7]

E PUNTO DI BISTA CRISTIAN DI NACIONNAN UNI

Den profecia di Bijbel, gobiernunan humano hopi biaha ta ser simbolisá dor di bestianan salbahe. (Daniel 7:6, 12, 23; 8:20-22) P’esei, pa hopi década e revista Toren di Vigilancia a identificá e bestianan salbahe di Revelacion capítulo 13 i 17 cu e gobiernunan mundano djawe. Esaki ta incluí Nacionnan Uní, cu ta ser describí den Revelacion capítulo 17 como un bestia di color scarlata cu siete cabes i dies cachu.

Sin embargo, e posicion bíblico aki no ta dispensá ningun forma di falta di respet pa cu gobiernunan of nan funcionarionan. Bijbel ta declará claramente: “Laga tur alma keda sumiso na autoridadnan superior, pasobra no tin autoridad sino dor di Dios; e autoridadnan existente ta pará den nan posicionnan relativo dor di Dios. P’esei, ken cu oponé e autoridad a tuma un posicion contra e areglo di Dios; esnan cu a tuma un posicion contra dje lo ricibí huicio pa nan mes.”—Romanonan 13:1, 2.

Di acuerdo cu esei, Testigonan di Jehova, kendenan ta estrictamente neutral den asuntunan político, no ta interferí cu gobiernunan humano. Nan nunca ta fomentá revolucion of participá den actonan di desobedencia civil. Mas bien, nan ta reconocé cu algun forma di gobiernu ta necesario pa mantené ley i ordu den sociedad humano.—Romanonan 13:1-7; Tito 3:1.

Testigonan di Jehova ta mira e organisacion di Nacionnan Uní mescos cu nan ta mira otro institucionnan gubernamental dje mundu. Nan ta reconocé cu Nacionnan Uní ta sigui existí cu permit di Dios. Na armonia cu Bijbel, Testigonan di Jehova ta rindi debido respet na tur gobiernu i ta obedecé nan tanten cu tal obedencia no ta rekerí pa nan peca contra Dios.—Echonan 5:29.