Nan Lus No A Paga
DEN tempunan bíblico, tabatin fiel Testigonan di Jehova cu a experenciá contratempu i dificultadnan. Nan a enfrentá oposicion i aparente fracasonan. Tog, nan no a entregá debí na desanimacion. En efecto, nan lus no a paga.
Por ehempel, profeta Jeremías a haña un comision pa ta e profeta di Dios p’e nacion apóstata di Huda. El a proclamá e spiertamentu tocante e binidero destruccion di Jerusalem. (Jeremías 1:11-19) Como resultado, Jeremías tabatin hopi confrontacion cu su paisanonan, cu a consider’é como un gritadó di calamidad.
E sacerdote Pashur, e comisionado principal den e cas di Dios, un biaha a golpea Jeremías pa motibu di loke el a profetisá i a pon’é den cepa. Cu e aparente contratempu aki, Jeremías a bisa: “Mi a bira un obheto di harimentu henter dia; tur hende ta haciendo bofon di mi. Pasobra cada bes cu mi papia, mi ta sclama. Violencia i plundermentu ta loke mi ta sclama. Pasobra e palabra di Jehova a bira pa mi un causa di reproche i di mofa henter dia.” E profeta tabata desanimá asta te n’e punto di bisa: “Mi no ta bai haci mencion di dje [Jehova], i lo mi no papia mas den su nomber.”—Jeremías 20:1, 2, 7-9.
Sin embargo, Jeremías no a sucumbí na desanimacion. Papiando di “e palabra di Jehova,” el a declará: “Den mi curason el a resultá di ta manera un candela ardiente cerá den mi wesunan; i mi a cansa di contené, i mi no por a want’é.” (Jeremías 20:8, 9) Motivá fuertemente pa papia e pronunciacionnan di Dios, Jeremías a ser sostené dor di spiritu santu i a cumpli cu su comision.
Apostel Pablo tambe tabatin hopi motibu pa bira desanimá, si el a entregá na nan. El a wanta desasternan natural, naufragio, persecucion i sota. Ademas, ‘loke a bini riba dje dia tras dia tabata e ansiedad pa tur e congregacionnan.’ (2 Corintionan 11:23-28) Sí, diariamente Pablo mester a trata cu problemanan, preocupando tocante congregacionnan nobo cu el a yuda establecé. Ademas, e tabata imperfecto i mester a lucha cu “un sumpiña den carni,” posiblemente mal bista. (2 Corintionan 12:7; Romanonan 7:15; Galationan 4:15) Algun asta a papia contra Pablo tras di su lomba, i esaki a yega na su orea.—2 Corintionan 10:10.
No obstante, Pablo no a permití desanimacion aplast’é. No, e no tabata un ‘superman.’ (2 Corintionan 11:29, 30) Kico a tene su ‘candela interno’ cendí? Pa cuminsá, e tabatin compañeronan cu tabata un sosten p’e, algun asta compañand’e na Roma unda el a ser tené bou di aresto di cas. (Echonan 28:14-16) Na di dos lugá, e apostel a considerá su situacion den un manera balansá. Su persiguidornan i opositornan tabata culpabel, no Pablo. Cerca e fin di su bida terenal, el a evaluá su ministerio den un manera positivo i a bisa: “For dje tempu aki padilanti tin reservá pa mi e corona di husticia, cu e Señor, e hues hustu, lo duná mi como un recompensa.”—2 Timoteo 4:8.
Riba tur cos, Pablo tabata acercá Jehova Dios regularmente den oracion, i ‘e Señor a para cerca dje i a dun’é poder.’ (2 Timoteo 4:17) “Pa tur cos,” Pablo a bisa, “mi tin e forsa den birtud di esun cu ta duná mi poder.” (Filipensenan 4:13) Comunicacion cu Dios i compañeronan cristian, huntu cu un evaluacion positivo di su ministerio, a yuda Pablo keda activo den Jehova su sirbishi.
Dios a inspirá Pablo pa skirbi: “Laga nos no bandoná e hacimentu di loke ta excelente, pasobra n’e debido tempu nos lo cosechá si nos no cansa.” (Galationan 6:7-9) Cosechá kico? Bida eterno. Pues, anto, sea manera Jeremías, Pablo, i e hopi otro fiel testigonan di Jehova mencioná den e Scritura. Sí, sea manera nan, i no sucumbí na desanimacion. No laga bo lus paga.—Compará cu Mateo 5:14-16.
[Plachinan na página 25]
Pablo i Jeremías no a laga nan lus paga