Tradicion Mester Ta na Conflicto cu e Berdad?

MARTIN LUTHER tabata convencí cu e tabatin rason. El a sinti cu Bijbel tabata apoy’é. Na otro banda e astrónomo polaco Copérnicus, a haña cu e creencia tradicional dje tempu ei tabata incorecto.

Cua creencia? Cu e tera ta e centro dje universo i cu tur cos ta drei rond di dje. Copérnicus a bisa cu e berdad ta cu e tera mes ta drei rond di solo. Luther a rechasá esaki, bisando: “Hende ta scucha na un astrólogo pretendido cu a purba mustra cu ta e tera ta drei rond, no e cielu of e firmamentu, ni solo i luna.” —History of Western Philosophy.

CREENCIANAN tradicional hopi biaha tabata na conflicto cu echonan, cu e berdad. Nan asta por pone hende haci cosnan perhudicial.

Naturalmente, esaki no ta nificá cu tradicion semper ta na conflicto cu e berdad. En realidad, apostel Pablo a animá cristiannan di su dia pa continuá siguiendo e tradicionnan cu el a pasa pa nan: “Awor mi ta encomendá boso pasobra . . . boso ta tene firmemente gará e tradicionnan exactamente manera mi a pasa nan pa boso.”—1 Corintionan 11:2; mira tambe 2 Tesalonicensenan 2:15; 3:6.

Kico Pablo tabata kier men cu “tradicion”? Perspicacia para comprender las Escrituras, Volúmen 2, página 1148 [na ingles, Vol. 2, pág. 1118], ta mustra cu e palabra griego cu el a usa pa “tradicion,” pa·raʹdo·sis, ta nificá algu cu ta ser “transmití oralmente of por escrito.” E palabra spañó ta nificá “informacion, doctrina, of prácticanan cu a ser transmití for di mayor pa yu of cu a bira e manera establecí di pensa of actua.”a Debí cu e tradicionnan cu apostel Pablo a pasa pa nan a bini for di un bon fuente, cristiannan a haci bon pa pega firmemente na nan.

No obstante, obviamente tradicion por ta cierto of falsu, bon of malu. E filósofo británico Bertrand Russel, por ehempel, ta encomendá personanan manera Copérnicus di siglo 16 kendenan tabatin e onestidad i curashi pa cuestioná creencianan tradicional. Nan a desaroyá un “reconocimentu cu loke hende a kere for di tempunan antiguo por ta falsu.” Bo tambe ta mira e sabiduria den no sigui tradicion ciegamente?—Compará cu Mateo 15:1-9, 14.

Kico anto di creencianan i custumbernan religioso? Nos por djis asumí cu nan ta corecto i inofensivo? Con nos por sa? Kico nos mester haci si nos haña cu tradicionnan religioso realmente ta na conflicto cu e berdad? E siguiente artículo lo examiná e preguntanan aki.

[Nota]

[Plachi na página 2]

Kaft dilanti: Jean-Leon Huens © National Geographic Society

[Plachi na página 3]

Universität Leipzig