Centro Educacional di Watchtower Ta Manda Misioneronan pa Exterior

E SCOL Bíblico di Galad di Watchtower a organisá klasnan na un variedad di sitio. Entre 1943 i 1960, den e localidadnan na South Lansing, New York, Merca, 35 klas, formá pa studiantenan for di 95 pais, a ricibí entrenamentu special. Despues e scol a muda p’e sede mundial na Brooklyn, New York, unda el a funcioná pa casi 28 aña. For di 1988 te na principio di 1995, Scol di Galad a organisá klasnan na Wallkill, New York.

Durante e añanan aki e scol a amplia su campo di actividad. Bou di su direccion a duna un curso di instruccion di dies siman na tres klas na México; cincu dje klasnan ei a bini huntu na Alemania; dos na India. For di 1987 un scol subsidiario conocí como e Scol di Entrenamentu Ministerial a organisá klasnan den 34 pais, percurando un curso special di ocho siman di entrenamentu pa hombernan hóben cu ta cualificá. Sin embargo, e instruccion cu a ser duná n’e di 99 klas di Galad, n’e Centro Educacional di Watchtower recien construí na Patterson, New York, tabata un curso di 20 siman, unu cu a incluí un estudio profundo di henter e Bijbel, un consideracion dje historia i organisacion moderno di Testigonan di Jehova, i tambe conseho extenso riba trabou di misionero den estranheria.

Dia 2 di september, e di 99 klas ei a gradua. E programa di graduacion di tres ora a ser tené den e auditorio nobo n’e Centro Educacional di Watchtower. E tabata completamente yen. Auditorionan adicional n’e facilidadnan di Betel na Patterson, Wallkill i Brooklyn a ser conectá electrónicamente. Esaki tabata un dia excitante no solamente p’e klas cu a gradua, huntu cu nan parientenan i amigunan íntimo, sino tambe pa cientos di ruman cu a participá como boluntarionan den e construccion dje excelente facilidadnan nobo di scol.

Den su comentarionan di introduccion, Carey Barber dje Cuerpo Gobernante a enfocá atencion riba e nificacion di loke tabata tumando lugá. El a bisa: “Esaki mester ta e centro dje mayor actividad di educacion divino cu a yega di ser efectuá riba e tera aki.” El a splica cu nos ta acercando e culminacion dje guera entre e simia dje muher i e simia dje colebra. (Génesis 3:15) El a mustra cu e único personanan cu lo sobrebibí e confrontacion spantoso durante e binidero tribulacion grandi, lo ta esnan cu tin conocimentu exacto dje Palabra di Dios i cu ta obediente na dje.

“Nos programa educacional actual,” el a declará, “ta diseñá pa trece henter e pueblo di Jehova na tur parti den e condicion excelente di madures describí na Proverbionan 1:1-4—esun di conocé sabiduria i disiplina, siendo capas pa dicerní comprendimentu, ricibiendo e disiplina cu ta duna perspicacia, husticia, huicio, rectitud i abilidad di pensa.” Ta ki un proteccion pa tin tal recursonan spiritual!

Conseho n’e Klas cu A Gradua

E comentarionan di introduccion ei a ser siguí pa un seri di cincu discurso corticu dirigí n’e klas cu a gradua. Harold Jackson, anteriormente instructor di Galad i awor miembro di staf dje sede mundial na Brooklyn, a urgi e klas, “Pega Firmemente na Boso Contentamentu Piadoso.” Lloyd Barry, misionero di hopi tempu i awor miembro dje Cuerpo Gobernante, a papia riba “Sirbi Jehova cu Humildad.” El a splica cu e cualidad aki lo ta importante p’e graduadonan por ahustá nan mes na situacionnan nobo i tambe den nan relacion cu otro misioneronan, cu e congregacionnan den cua nan lo sirbi i cu e pueblo local.

Karl Adams, actualmente sirbiendo den e facultad di Galad, a razoná cu e klas riba e pregunta “Kico Fe lo Hibá Bo pa Haci?” El a animá nan pa no ser manera e israelitanan di pasado cu a keha tocante e condicionnan den e desierto i cu a anhelá pa bai bek na Egipto, sino, mas bien, pa ser manera Abraham, kende a spera riba e Reino di Dios en bes di un regreso na Ur dje caldeonan como e solucion pa problemanan. (Exodo 16:2, 3; Hebreonan 11:10, 15, 16) Ulysses Glass, e administrador dje scol, a usa e experencia di Asaf segun e registro di Salmo 73 pa spierta e klas cu a gradua, “Bolbe Conta Boso Bendicionnan.” I Albert Schroeder, miembro dje Comité di Siñansa dje Cuerpo Gobernante, a papia riba e tema “Jehova Ta Percurá.” Como evidencia di tal percuracion, el a señalá n’e Scol di Galad mes i su papel den efectuá e trabou grandi di predicacion i haci disipel.

Despues e auditorio a scucha cu sumo interes ora Milton Henschel, presidente dje Sociedad Watch Tower, a papia tocante “Miembronan cu Ta Pertenecé na Otro.” El a lesa i comentá extensamente riba Romanonan capítulo 12. Entre otro cosnan, el a bisa: “Nos mester tuma na consideracion cu nos tin un relacion masha íntimo cu nos co-sirbidornan den e congregacion.” El a agregá: “Ta bon pa nos semper pensa di otro como Jehova su propiedad, i en bes di ser crítico, en bes di piki pieu, laga nos semper yuda otro. Nos ta yudando nos mes ora nos ta mantené e unidad spiritual dje congregacion cristian.” El a mustra con tal disposicion di yuda por ser manifestá den preparacion di cuminda den casnan di misionero, tumando na consideracion e echo cu tur hende kisas no por come e mésun cos. Tambe el a animá e disposicion di yuda mas bien cu di criticá ora di participá den sirbishi di veld cu compañeronan cristian cu tin masha poco recurso material. Si nos berdaderamente ta gusta yuda, edificá i animá otro, Ruman Henschel a señalá, “Jehova lo stima nos pa esaki.” Ki un excelente amonestacion pa misioneronan cu pronto lo ta sirbiendo den paisnan cu ta bastante diferente for di esnan cu nan a laga atras!

Conociendo e Klas Mihó

E 48 studiantenan dje di 99 klas tabatin, como promedio, 32 aña di edad i a dedicá caba mas cu 11 aña den e ministerio di tempu completo.

Entrevistanan cu tabata parti dje programa di graduacion a duna e auditorio oportunidad pa conocé un par di nan mihó. Nikki Liebl, di Merca, i Simon Bolton, di Inglatera, a conta di incidentenan cu a pone nan fe cu Jehova lo percurá pa nan necesidadnan físico, na prueba. Nan a experenciá Jehova su cuido segun cu nan a mantené e ministerio di tempu completo na promé lugá.

Isabelle Kazan, kende su idioma nativo ta frances, a bisa cu el a siña arabir pa por duna testimonio na hende cu ta papia arabir den su pais natal. Ora el a cuminsá na 1987, e único grupo chikitu na Paris tabata consistí di solamente cuater ruman cu ta papia arabir, huntu cuné mes i un otro ruman muher cu tabata siñando e idioma. (No tabata fácil. Nan tabata dedicá ocho ora pa prepará nan les di Toren di Vigilancia tur siman pa asina por a duna comentario.) E esfuerso tabata bale la pena? Wel, awe tin Testigonan di abla arabir organisá den cincu circuito rond Francia. Un otro studiante, Miko Puro, a conta con e frances cu el a siña na scol a permitié predicá na refugiadonan africano den su pais natal, Finlandia, i esei tambe lo ta di balor den su asignacion di misionero na Benin. Bonny Bowes a conta di su lucha pa papia frances cu afluencia di manera cu e por a sirbi eficasmente na Quebec, Cánada. I Bjarki Rasmussen, di Dinamarca, a conta di experencianan cu e i su esposa tabatin caba durante añanan di sirbishi riba e islanan Feroe. Sí, e misioneronan nobo aki ta ministernan di tempu completo experenciá.

E graduadonan a ser asigná na 19 pais—na Africa, Central i Sur América, Oost Europa i Lehano Oriente. Graduadonan di klasnan mas promé ya caba a sirbi den mas cu 200 pais. Hopi dje graduadonan ei ta sirbiendo ainda den nan asignacionnan. E misioneronan nobo aki ta uniendo cu nan awor den sigui expandé e testimonio di Reino te n’e partinan mas lehano dje tera.—Echonan 1:8.

[Plachi na página 25]

Esenanan dje klas na Centro Educacional di Watchtower

[Plachi na página 26]

E di 99 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan ta mencioná di robes pa drechi den cada rij.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Plachinan na página 27]

Ketu bai den nan asignacion: (robes) Charles Leathco cu su esposa, Fern, na Brazil, graduadonan dje promé i dje di seis klas di Galad; (abou) Martha Hess, na Hapon, graduado dje di siete klas di Galad