Nan A Haci e Boluntad di Jehova

Moises i Aron—Proclamadornan cu Curashi dje Palabra di Dios

VISUALISA e esena: Moises di ochenta aña di edad i su ruman homber, Aron, pará dilanti e homber di mas poderoso riba tera—Fárao di Egipto. P’e egipcionan e homber aki ta mas cu un representante dje diosnan. Nan ta kere cu e mes ta un dios. E ta ser mirá como e encarnacion mes di Hórus, un deidad di cabes di falki. Huntu cu Isis i Osíris, Hórus a forma e trinidad principal entre e diosnan i diosanan di Egipto.

Cualkier hende cu a acercá Fárao no por a keda sin ripará e figura menasante dje cabes di un cobra cu tabata sali for di meimei di su corona. Supuestamente, e colebra aki por a scupi candela i destruccion riba cualkier enemigu di Fárao. Awor Moises i Aron a bini dilanti e dios-rey aki cu un peticion sin precedente—p’e manda e israelitanan sclabisá bai pa nan por tene un festival pa nan Dios, Jehova.—Exodo 5:1.

Ya Jehova a pronosticá cu Fárao su curason lo ta obstiná. P’esei, Moises i Aron no a keda sorprendí cu su contesta desafiante: “Ken ta Jehova, pa mi tin cu obedecé su bos pa manda Israel bai? Mi no conocé Jehova mes i, loke ta bini acerca, mi no ta manda Israel bai.” (Exodo 4:21; 5:2) Pues, e esena a ser prepará pa un confrontacion dramático. Durante e siguiente encuentro, Moises i Aron a presentá evidencia sorprendente na Fárao cu nan a representá e Dios berdadero i todopoderoso.

Un Milager Ta Sosodé

Riba instruccion di Jehova, Aron a efectuá un milager cu a proba Jehova su supremacia riba e diosnan di Egipto. El a tira su bara abou dilanti Fárao, i mesora el a bira un colebra grandi! Babucá dor dje milager aki, Fárao a manda yama su sacerdotenan practicante di magia.a Cu yudansa di podernan demoniaco, e hombernan aki tabata capas pa haci algu similar cu nan propio baranan.

Si Fárao i su sacerdotenan a broma, esei tabata solamente pa un ratu. Imaginá nan caranan ora e colebra di Aron a guli nan colebranan, un pa un! Tur e presentenan por a mira cu e diosnan falsu dje egipcionan no por a para banda die Dios berdadero, Jehova.—Exodo 7:8-13.

Sin embargo, asta despues di esaki, Fárao su curason a keda obstiná. Ta solamente despues cu Dios a trece dies golpi devastador, of plaga, riba Egipto cu Fárao finalmente a bisa Moises i Aron: “Lanta, sali for di meimei di mi pueblo, tantu boso como e otro yunan di Israel, i bai, sirbi Jehova, manera boso a declará.”—Exodo 12:31

Lesnan pa Nos

Kico a capacitá Moises i Aron pa acercá e Fárao poderoso di Egipto? Na promé instante, Moises a expresá un falta di confiansa den su abilidad, bisando cu e ta “lento di boca i lento di lenga.” Asta despues cu el a ser garantisá di Jehova su sosten, el a roga: “Por fabor, manda pa man di esun kende bo ta bai manda.” Cu otro palabra, Moises a roga Dios p’e manda un otro hende. (Exodo 4:10, 13) No obstante, Jehova a usa e homber mansu, Moises, dunand’e e sabiduria i e fortalesa necesario pa cumpli cu su asignacion.—Númeronan 12:3.

Awe, sirbidornan di Jehova Dios i di Jesucristo ta cumpliendo cu e mandamentu pa “haci disipel di hende di tur nacion.” (Mateo 28:19, 20) Pa haci nos parti den e cumplimentu die comision aki, nos mester haci uso optimal di conocimentu bíblico i di cualkier abilidad cu nos por ta poseé. (1 Timoteo 4:13-16) En bes di enfocá riba nos deficiencianan, laga nos aceptá cu fe cualkier asignacion cu Dios a duna nos. E por capacitá nos i fortalecé nos pa haci su boluntad.—2 Corintionan 3:5, 6; Filipensenan 4:13.

Siendo cu Moises mester a enfrentá oposicion humano i demoniaco, e siguramente tabatin mester di yudansa sobrehumano. Consecuentemente, Jehova a sigur’é: “Mira, mi a hací bo Dios pa Fárao.” (Exodo 7:1) Sí, Moises tabatin apoyo i autoridad divino. Cu Jehova su spiritu riba dje, Moises no tabatin motibu pa teme Fárao of e gobernante ei su compinchinan orguyoso.

Nos tambe mester dependé riba Jehova su spiritu santu, of forsa activo, pa cumpli cu nos ministerio. (Juan 14:26; 15:26, 27) Cu apoyo divino nos por resoná e palabranan di David, kende a canta: “Den Dios mi a pone mi confiansa. Lo mi no tin miedu. Kico hende terenal por hací mi?”—Salmo 56:11.

Den su compasion Jehova no a laga Moises su so den e asignacion. Mas bien, Dios a bisa: “Aron bo propio ruman lo bira bo profeta. Abo—abo lo papia tur loke mi a mandá bo; i Aron bo ruman lo hiba palabra cerca Fárao.” (Exodo 7:1, 2) Ki amoroso di parti di Jehova pa obra den e límitenan di loke Moises razonablemente por a atendé!

Dios ta duna nos un asociacion di compañeronan cristian cu ta aceptá e desafio di ser Testigonan di Jehova, e Haltísimo. (1 Pedro 5:9) P’esei, apesar die obstáculonan cu nos por encontrá, laga nos ser manera Moises i Aron—proclamadornan cu curashi dje palabra di Dios.

[Nota]

[Plachi na página 25]

Moises i Aron a representá Jehova cu curashi dilanti Fárao