Informe di Proclamadornan di Reino

“Briyando Como Iluminadornan den e Mundu”

TESTIGONAN DI JEHOVA ta resaltá como peculiar i hopi bes ta ricibí mal publicidad debí cu nan no ta aceptá transfusion di sanger. Sin embargo, e posicion aki ta sólidamente basá riba Bijbel. Bijbel ta mustra cu Dios ta condená maluso di sanger, ya cu sanger ta precioso den su bista. (Génesis 9:3, 4; Levítico 17:14) Despues di examiná e Scritura riba e tópico aki, Testigonan di Jehova ta concluí cu e instruccion bíblico pa ‘abstené for di sanger’ claramente lo mester incluí e práctica moderno di transfusioná sanger.—Echonan 15:19, 20, 28, 29.

Den añanan recien miembronan dje comunidad médico, como tambe e cortenan den algun pais, a bin ta apoyá Testigonan di Jehova riba e cuestion aki. Por ehempel, na Dinamarca un mama hóben kende tabata conocí cu e punto di bista bíblico di sanger a muri a consecuencia di un desgracia di auto. Debí na su rechaso pa aceptá un transfusion di sanger, su dokternan pa un luna largu a stimulá un campaña di hostilidad via medionan di comunicacion contra Testigonan di Jehova.

E muher hóben su mayornan a haci peticion pa un investigacion, i na april 1994 e Comision di Kehonan di Pashent di Dinamarca a anunciá un decision. El a declará cu e pashent a muri, no debí cu el a nenga sanger, sino debí na negligencia médico. E decision tabata basá riba investigacionnan hací dor dje Hunta di Medicina Forénsico i e autoridadnan di salubridad. Den un circulario na tur servicio di cuido di salú na Dinamarca, e Hunta Nacional di Salubridad a declará cu dokternan tin un obligacion di duna Testigonan di Jehova e mihó tratamentu alternativo disponibel, tumando na consideracion nan rechaso pa aceptá sanger.

Un otro caso a enbolbé Dan, un mucha homber Testigo di 15 aña kende a muri di leukemia. Den e caso aki e dokternan a respetá Dan su decision balente pa rechasá un transfusion di sanger. Esaki a resultá den un campaña amplio di prensa den cua e medionan di comunicacion a culpa e dokternan pa Dan su morto. Sin embargo, hopi hende no a bai di acuerdo cu e propaganda negativo.

Por ehempel, e cabes di e scol cu Dan tabata bai tabata presente na e Salon di Reino pa e discurso di entiero. El a expresá su shok pa e manera inhustu cu medionan di noticia a cubri Dan su morto. Despues di acercá un colega Testigo cu vários pregunta tocante Testigonan di Jehova, el a aceptá un ehemplar dje video Los Testigos de Jehová...La organización tras el nomber. E video a impresion’é asina tantu cu el a haci areglo pa tur e maestronan di e scol wak’e. Despues, e video a ser mustrá na tur e studiantenan, cada un klas apart.

E minister di salubridad di Dinamarca tampoco no tabata di acuerdo cu e mal publicidad cu e dokternan di Dan a ricibí pa motibu cu nan a apoyá Dan su decision. El a declará cu e dokternan a haci e cos corecto dor di respetá Dan su decision maduro i su fe bon fundá.

Tin miyones di proclamadornan di Reino cu ta rindi obedencia na e leynan di Dios. Debí na nan obedencia, nan ta resaltá, “briyando como iluminadornan den e mundu.”—Filipensenan 2:12, 15.