Un Campaña Exitoso cu Noticia di Reino

“PAKICO Bida Tin Asina Tantu Problema?—Un paradijs liber di problema ta posibel?” Esaki tabata e título di Noticia di Reino Num. 34, un tratado di cuater página cu a ser distribuí rond mundu den 139 idioma durante april i mei di aña pasá. Testigonan na Jamaica ta describí e campaña di sirbishi aki como “un dje acontecimentunan sobresaliente di aña.” E Testigonan na Bélgica a yam’é “un gran fuente di goso p’e rumannan.” Na República Checo esaki tabata e promé biaha cu Testigonan di Jehova tabatin oportunidad pa participá den un distribucion di Noticia di Reino. E sucursal ta informá: “E campaña a trece un spiritu di celo i entusiasmo.” Tabatin sintimentunan similar for di hopi otro pais.

Noticia di Reino Num. 34 tabatin un mensahe special pa esnan cu ta suspirá i keha pa causa dje cosnan abominabel cometí den nomber di religion. (Ezekiel 9:4) E tabatin consuelo pa esnan kende nan bida ta afligí debí n’e “tempu crítico, duru pa trata cuné” riba cua nan no tin control. (2 Timoteo 3:1) Señalando na Bijbel, e tratado a mustra cu problemanan di bida lo ser resolvé masha pronto. Un paradijs liber di problema ta un cos sigur. (Lucas 23:43) Hopi hende cu a lesa e Noticia di Reino a ser persuadí dor di su mensahe. Un homber na Togo a bisa un Testigo: “Loke bo a bisa ta indiscutibel.”

Innegablemente, e distribucion di e Noticia di Reino aki a atraé atencion extraordinario. Na Dinamarca un doño di cas a respondé un Testigo cu a ofrecé e tratado: “Mi a caba di bolbe bek for di Merca. Djis promé cu mi a sali for di Merca, un persona a ofrecé mi boso tratado. Awor mi a caba di yega aki i mesora e mésun tratado ta ser ofrecé na danes!”

Apoyo Entusiástico p’e Campaña

Testigonan di Jehova rond mundu a uni entusiásticamente den e trabou di distribucion dje tratado. Austria, El Salvador, Haiti, Hungria, Italia, Nueva Caledonia, tabata solamente algun dje hopi paisnan cu a informá di máximonan nobo di publicadornan durante e lunanan ora e Noticia di Reino tabata ser distribuí.

Na Zambia un superintendente di circuito a entrená su yu muher di tres aña di edad, Deborah, pa ofrecé literatura di cas pa cas. Durante e campaña cu Noticia di Reino Num. 34, Deborah a laga mas cu 45 ehemplar dje tratado. Su mama a cuminsá studionan di Bijbel cu algun persona cu a aceptá e Noticia di Reino for di Deborah.

Na Sur Africa un tiener a ofrecé e tratado na un colega di su scol yamá Cashia. Cashia a lesa e tratado i a bisa: “Esaki ta simplemente demasiado maraviyoso—biba pa semper den un paradijs riba tera! Pakico nan no a bisá mi mas promé tocante esei?” A cuminsá un studio di Bijbel. Dentro di un siman Cashia a ricibí un otro tratado. E di dos a bini for di su ‘pen-pal’ católico romano, kende ta biba na Chipre. E amiga aki cu Cashia ta corespondé cuné via carta, a splik’é pakico e siñansanan dje Iglesia Católico Romano ta falsu i a bis’é cu e tabatin intencion di studia Bijbel cu Testigonan di Jehova. Naturalmente, esei a fortalecé Cashia su determinacion masha pa continuá cu su studio.

Un hobencito di dies aña di edad na Suisa a participá cu su mama den plamamentu dje tratado. El a entregá un ehemplar na un muher hóben i a anim’é pa les’é cuidadosamente. E muher hóben a puntra e hobencito si e realmente a kere loke e plachi riba e kaft a ilustrá—bida sin fin riba tera. E contesta dje hobencito? “O, sí, mi ta masha sigur.” E ora ei e muher a revelá cu e tabata buscando e fe berdadero pasobra tabatin muchu hopi contradiccion den su mes religion. Durante un rebishita, a cuminsá un studio di Bijbel.

Reaccionnan Inmediato

Algun biaha e Noticia di Reino a causa reaccion inmediato cerca esnan cu a les’é. Despues di a lesa e tratado, un hobencita di 11 aña di edad na Bélgica a confesá na un Testigo di Jehova cu e tabata horta den pacus. E mama dje hobencita kier a keda ketu tocante e asuntu, pero loke e hobencita a lesa a conmové su concenshi, i el a insistí pa bai cerca e ‘manager’ dje centro di compra. E mama finalmente a bai di acuerdo pa laga su yu muher bai bek n’e centro di compra cu e Testigo. E manager a keda sorprendí cu su confesion. Ora el a haña sa cu ta e Noticia di Reino a conmov’é pa actua den e manera aki, e mes a tuma un ehemplar pa mira kico e tabata contené cu tabata asina poderoso. Awor e hobencita tin un studio di Bijbel progresivo.

Un Testigo na Camerun a ofrecé un homber un ehemplar di Noticia di Reino i ta conta: “Ora nos a regresá, nos a haña cu el a marca liña caba bou dje frasenan i e tabatin un cantidad di pregunta. Despues cu el a ricibí contestanan satisfactorio, el a declará: ‘Ta absolutamente cierto cu religion a contribuí na infelicidad di humanidad. Boso tratado a yudá mi comprendé hopi cos, pero lo mi kier sa mas.’” Awor e ta un studio regular di Bijbel.

Un Testigo cu tabata bai di cas pa cas na Uruguay a ofrecé un homber un tratado. E Testigo a continuá cu su trabou di predicá di cas pa cas i a traha rond dje blok te ora cu el a yega n’e porta patras dje homber su cas. El a keda sorprendí ora el a haña e homber ta ward’é, cu e tratado den man. El a les’é caba i kier a haña mas informacion. A cuminsá un studio einan mesora.

E Público Ta Yuda Distribuy’é

Na Hapon un Testigo hóben a acercá un homber den su 50 i picu i a introducí e tratado na dje. E homber a puntra: “Kico bo ta haci cu e pamfleta ei ora bo topa hende cu no por mira?” E Testigo a admití cu e no tabata sa. E homber a bis’é pa warda un ratu i a bai bek den su cas. El a regresá cu un ehemplar dje Noticia di Reino i a bisa: “Mi a ricibí e pamfleta ei caba. Mi a haña cu e ta contené informacion masha interesante i importante, di manera cu mi a skirbié over den Braille. Por fabor usa esaki p’e hendenan cu ta ciegu.” E homber a pasa hopi ora skirbiendo e Noticia di Reino over den Braille pa esnan ciegu no keda sin ricibí loke e tabata contené.

Na Slovakia un homber a gusta e tratado asina tantu cu el a laga traha 20 copia, i el a distribuí e fotocopianan aki e mes. Un publicador na Suisa a ofrecé un famia un Noticia di Reino i a sigui traha e pisonan mas ariba dje edificio unda e famia tabata biba. Ora tabata bahando trapi atrobe, un hobencito dje famia a topa cuné i a pidié 19 ehemplar mas dje tratado. N’e scol dje hobencito, e alumnonan a ser asigná pa skirbi tocante problemanan i e búskeda di solucionnan. E tabata kier un ehemplar di Noticia di Reino pa cada un di su coleganan di klas.

No A Salta Ningun

Esnan cu a participá den e campaña a haci hopi esfuerso pa haci sigur cu no a salta ningun hende. Na Nueva Caledonia dos Testigo tabata biahando p’e teritorio di un tribu remoto afin di distribuí e Noticia di Reino. Na caminda, nan a ripará un hanchi cu a parce di no tabata ser usá, no obstante nan a dicidí pa mira si no tabatin hende ta biba na fin di dje. Lagando e auto atras, nan a cana a lo largu dje hanchi, pasando poco poco dor di riunan chikitu te ora nan finalmente a haña un cas. Un pareha cu nunca a yega di tende di Testigonan di Jehova tabata biba ei, i nan a acepta un ehemplar dje Noticia di Reino. Mas despues e publicadornan a haci un rebishita i pa nan sorpresa a haña cu e pareha a drecha e caminda i vários brug chikitu di manera cu e Testigonan por a core cu nan auto riba henter e caminda p’e cas. A cuminsá un studio regular di Bijbel.

Na Polonia un Testigo mester a cana pasa banda di un sitio di construccion pa ofrecé un ehemplar di e Noticia di Reino na un doño di cas. E trahadornan tabata wak segun cu el a cana pasa e sitio di construccion. Finalmente, un dje trahadornan a yam’é, pidiend’e p’e no lubidá nan. Ora el a acercá nan, nan a pausa i a scucha cuidadosamente n’e presentacion dje tratado. Nan a aceptá ehemplarnan dje Noticia di Reino i tambe revistanan i mas despues, durante un rebishita, bukinan.

Cientos di miyones di Noticia di Reino Num. 34 a ser plamá den hopi idioma. Su mensahe ya caba tabatin un efecto poderoso. Hopi persona a siña cu un paradijs liber di problema ta posibel. Nos ta pidi den oracion pa esnan recto di curason por sigui reaccioná faborablemente i finalmente haña nan mes entre “e mansunan” cu lo “poseé tera, i ... haña nan deleite exkisito den e abundancia di pas.”—Salmo 37:11.

[Kuadro na página 31]

Sigui Plama Revistanan!

April i mei 1995 tabata lunanan di un campaña sumamente exitoso pa plama Noticia di Reino Num.34. Durante e dos lunanan ei, tabatin tambe un distribucion sobresaliente dje revistanan Toren di Vigilancia i Spierta! Un ruman na República Checo, por ehempel, ta infomá cu na april el a laga 250 ehemplar di Noticia di Reino i 750 revista. Na Guadeloupe, diasabra 15 di april, a ser scogé como un dia special di revista. Casi tur publicador den e pais a participá den e ministerio e dia ei! Slovakia tabatin un máximo nobo den distribucion di revista na april. Informenan similar a bini for di hopi otro pais.

Pues pakico no haci april i mei 1996 lunanan sobresaliente pa distribucion di revista? Congregacionnan por organisá dianan special di revista. Individuonan por participá den e trabou di pionero auxiliar. Asina aki i den otro maneranan, por animá distribucion di revista i e mensahe vital cu a ser proclamá den Noticia di Reino Num. 34 lo sigui ser plamá. E ora ei, manera a sosodé aña pasá, Jehova siguramente lo bendicioná e spiritu celoso cu nos ta demostrá.—2 Timoteo 4:22