Nos Tin Mester di Berdadero Amigu

JENNY i Sue ta teniendo un combersacion animá. Sonrisanan ta luci, wowonan ta briya—tur cos den nan comportacion ta revelá interes intenso den loke e otro persona tin di bisa. Aunke nan tin antecedentenan distinto, ta bisto cu nan tin hopi interes similar i tin masha respet un pa otro.

Na un otro caminda, Eric i Dennis ta trahando huntu riba un proyecto, un dje hopi proyectonan cu nan a traha riba dje durante vários aña. Nan ta relahá i ta hari fácilmente. Segun cu e combersacion ta cambia pa temanan serio, nan francamente ta intercambiá di opinion. Nan ta respetá otro. Mescos cu Jenny cu Sue, Eric cu Dennis ta berdadero amigunan.

E descripcionnan aki tal bes ta yena bo curason cu sintimentunan caluroso, poniendo bo pensa riba bo mes amigunan. Na otro un banda, tal bes nan ta lagá bo anhelá pa tin amistadnan asina. Bo tambe por tin nan!

Pakico Nos Tin Mester di Berdadero Amigu

Amistadnan saludabel ta esencial pa nos bienestar mental i físico. Sin embargo, ora nos ta sinti nos so, esaki no kier men cu tin algu malu cu nos. Algun investigador ta bisa cu soledad ta un hamber, un indicador natural cu nos tin mester di compañerismo. Di tur manera, mescos cu cuminda ta reducí of eliminá hamber, asina e clase corecto di amistad por mengua soledad of asta lagu’e disparcé. Ademas, teniendo bon amigunan cu ta balorá nos no ta un luho inalcansabel.

Hende a ser creá cu un necesidad di compañerismo. (Génesis 2:18) Bijbel ta bisa cu un berdadero amigu of compañero, “ta nací pa ora tin angustia.” (Proverbionan 17:17) Pues, berdadero amigunan lo mester por pidi otro yudansa ora esei ta necesario. Pero amistad ta nificá mas cu djis tin un hende pa acudí na dje pa yudansa of ser un compañero ora di traha of hunga. Bon amigunan ta saca e mihó cualidadnan un di otro. Proverbionan 27:17 ta bisa: “Heru cu heru mes ta haci otro skerpi. Asina un hende ta haci e cara di un otro skerpi.” Mescos cu un pida heru por ser usá pa haci un blet trahá dje mésun metal skerpi, asina un amigu por logra haci e estado intelectual i spiritual di un otro amigu skerpi. Si decepcionnan ta deprimí nos, un amigu su mirada simpático i animacion bíblico por ta masha animador.

Den Bijbel, amistad ta ser asociá cu amor, familiaridad, confidencialidad i compañerismo. Amistadnan por enbolbé bisiñanan, coleganan, etcétera. Algun persona tambe ta considerá cierto famianan como nan amigunan mas íntimo. Sin embargo, pa hopi hende awe, berdadero amigunan ta difícil pa haña i pa keda cuné. Pakico esaki ta asina? Abo por disfrutá di amistadnan berdadero i duradero?