Cada Bes Mas Caso di Mal Noticia

BO A yega di ripará cu titularnan cu ta anunciá mal noticia ta lanta mas interes di lector cu esnan cu ta transmití bon noticia? Sea ta un titular di corant di un desaster natural of un redu picante grandi grandi riba portada di un revista lombrante, ta parce cu mal noticia ta bende mihó cu bon noticia.

Awe no tin scarcedad di mal noticia. Pero tin biaha bo ta puntra bo mes si ta mal noticia ta loke reporteronan i periodistanan ta entrená pa busca i saca na cla—excluyendo cualkier bon noticia.

Na Abundancia Atrabes di Historia

En berdad, tabatin un abundancia di mal noticia atrabes dje siglonan, surpasando na cantidad cualkier bon noticia. Den e analnan di historia, e balansa ta len pisá n’e banda di sufrimentu humano, decepcion i desesperacion, cuanan tabata e porcion di humanidad.

Laga nos considerá djis un par di ehempel. E buki Chronicle of the World, cu Jacques Legrand a hinca den otro, ta presentá vários relato, cada un skirbí p’e fecha particular riba cua e suceso a tuma lugá pero manera un periodista moderno cu ta informá dje suceso lo a cont’é. For dje informenan bon fundamentá aki, nos ta haña un bista amplio dje mal noticia extenso cu hende a tende atrabes di su existencia afligí aki riba planeta Tera.

Promé, considerá e informe primitivo aki for di Grecia na 429 P.E.C. E ta cubri e guera cu a ser bringá e tempu ei entre Aténas i Sparta: “E stad-estado di Potidaea a ser forsá pa entregá n’e atenonan cu a sitia nan despues cu nan a ser reducí na asina un estado di hamber cu e hendenan di Potidaea tabata come e cadavernan di nan mortonan.” Esei siguramente ta un mal noticia!

Pasando p’e promé siglo promé cu nos Era Comun, nos ta haña un reportahe gráfico dje morto di Julio César, fechá Roma, 15 di mart, 44 P.C. “Julio César a ser asesiná. El a ser hincá mata dor di un grupo di conspirador, di cua algun tabata su amigunan mas yegá, ora el a tuma su asiento den e Cas di Senado awe, dia 15 di mart.”

Durante e siglonan cu a sigui, mal noticia a sigui abundá. Un ehempel spantoso ta e noticia aki for di México na 1487: “Den e despliegue sacrificial di mas spectacular cu a yega di ser mirá den e capital azteca, Tenochtitlán, curason di 20.000 hende a ser sacá i sacrificá na Huitzilopochtli, e dios di guera.”

No solamente hende su crueldad a proporcioná mal noticia sino su descuido tambe a agregá n’e lista largu. E candela grandi di Londen ta parce di tabata un desaster asina. E informe for di Londen, Inglatera, fechá 5 di september, 1666, ta bisa: “Por fin, despues di cuater dia i anochi, e candela di Londen a ser detené dor dje duke di York, kende a trece ekiponan naval cu material explosivo pa bula edificionan den e curso cu e vlamnan lo a tuma. Rond di 160 hectar a ser rosá causando destruccion di 87 iglesia i mas cu 13.000 cas. Milagrosamente, solamente nuebe bida a bai perdí.”

Nos mester agregá n’e ehempelnan aki di mal noticia e epidemianan cu a asotá hopi continente—por ehempel, e epidemia di cólera na cuminsamentu di añanan 1830. E titular cu a informá esaki ta bisa: “E fantasma di cólera ta terorisá Europa.” E informe realístico cu ta sigui ta describí e parti mas pió di mal noticia: “Cólera, desconocí na Europa te 1817, ta plamando den direccion west for di Asia. Ya caba gran parti dje poblacionnan di stadnan ruso manera Moscú i St. Petersburg a ser exterminá—e mayoria dje víctimanan ta e pobernan di stad.”

Escalacion den Añanan Recien

P’esei aunke ta cierto cu mal noticia tabata un realidad atrabes di historia registrá, décadanan recien dje siglo 20 aki ta duna evidencia cu mal noticia ta aumentando, en berdad e ta escalando rápidamente.

Indudablemente, noticianan di guera tabata e pió clase di mal noticia cu nos siglo actual a conocé. E dos gueranan di mas grandi den historia—aptamente yamá Guera Mundial I i Guera Mundial II—siguramente a experenciá mal noticia riba un escala horendo. Pero esei realmente tabata solamente un fraccion dje mal noticia cu e siglo infelis aki a proporcioná.

Considerá djis un par di titular selectá di aki aya:

Promé di september, 1923: Temblor ta rosa Tokio—300.000 morto; 20 di september, 1931: Crísis—Inglatera ta devaluá e libra esterlina; 25 di juni, 1950: Nort Korea ta marcha drenta Sur Korea; 26 di october, 1956: Húngaronan ta lanta contra mando soviético; 22 di november, 1963: John Kennedy ta ser tirá mata na Dallas; 21 di augustus, 1968: Tankinan di guera ruso ta core drenta pa aplastá e lantamentu di Praga; 12 di september, 1970: Avionnan secuestrá a ser explotá den desierto; 25 di december, 1974: Siclon Tracy ta bari e stad Darwin—66 morto; 17 di april 1975: Cambodia ta sucumbí bou di forsanan comunista; 18 di november, 1978: Suicidio masal na Guyana; 31 di october, 1984: Sra. Gandhi ta ser tirá mata; 28 di januari, 1986: Nave espacial ta explotá despues di despegue; 26 di april, 1986: Reactor soviético ta na candela; 19 di october, 1987; Mercado di balor ta cai den otro; 25 di mart, 1989: Alaska ta ser severamente afectá pa derame di petroli; 4 di juni, 1989: Trupanan armá di gobiernu ta masacrá disidentenan studiante i nan apoyadornan na Tiananmen.

Sí, historia ta mustra cu mal noticia semper tabata abundante, miéntras cu bon noticia tabata comparativamente scars. Miéntras cu mal noticia a escalá den décadanan recien, bon noticia a disminuí segun cu cada aña ta pasa.

Pakico esaki mester ta asina? Lo e ta semper asina?

E siguiente artículo lo trata e dos preguntanan aki.

[Plachi na página 3]

WHO/Liga di Crus Corá