Bon Noticia pa Futuro!

NOS tur ta bira tristu ki ora cu nos ricibí mal noticia cu ta afectá nos personalmente. N’e otro banda, nos ta alegrá ora nos haña bon noticia—noticianan di goso pa nos mes of pa nos stimánan. Pero ora mal noticia afectá otronan i no nos, hopi biaha tin un elemento di curiosidad; algun asta ta gosa ora nan haña sa tocante e desgracia di otronan. Esaki por splica parcialmente pakico mal noticia ta bende asina bon!

Durante e promé parti di Guera Mundial II, tabatin un ehempel bibu dje interes repugnante den calamidad cu algun hende tin. Un barcu di guera di 10.000 ton fuertemente armá, Graf Spee, tabata e orguyo dje flota aleman na 1939. Pa simannan largu e barcu di guera aki tabata causa teror entre e barcunan comercial dje nacionnan aliá contra Alemania den Sur Atlántico i océano Indio. Finalmente, tres bapor di guera británico a persiguí i atacá e barcu Graf Spee, causando pérdida di bida i forsando e barcu pa nabegá cu dificultad i drenta e haf uruguayo di Montevideo pa reparacion. E gobiernu uruguayo a manda e barcu di guera bek pa laman inmediatamente, di otro manera lo el a ser confiscá i su tripulacion encarcelá. Pues un bataya feros di mas bien un banda so a parce inminente.

Tendiendo di esaki, un grupo di comerciante ricu na Merca a ‘charter’ un avion, na un costo di mas o ménos US$2.500 pa cabes, pa bula pa Uruguay pa presenciá e bataya sangriente. Pa nan decepcion, e bataya nunca no a tuma lugá. Adolf Hitler a duna ordu pa sink Graf Spee. Miles di expectadornan cu a bosha bini cantu di laman sperando pa presenciá e espectáculo di un bataya feros riba laman, a mira i tende en bes di esei un explosion durísimo cu a manda Graf Spee fondo di laman, di sink pa su propio tripulacion. E capitan a cometé suicidio cu un tiru di revolver den cabes.

Apesar di un rasgo un tiki repugnante den algun hende, mayoria lo ta di acuerdo cu nan ta preferá bon noticia riba mal noticia. Bo no ta sinti asina? Pakico, anto, historia ta registrá asina tantu mal noticia i asina tiki bon noticia? E situacion por ser cambiá un dia?

Causanan di Tur Mal Noticia

Bijbel ta papia dje tempu ora tabatin solamente bon noticia. Mal noticia tabata algu desconocí. Ora Jehova Dios a completá su obranan di creacion, planeta Tera tabata cla pa hende i bestia disfrutá di dje. E relato di Génesis ta bisa nos: “Dios a mira tur loke el a traha i, mira! e tabata hopi bon.”—Génesis 1:31.

E ausencia di mal noticia no a dura muchu despues dje creacion di hende. Promé cu Adam i Eva a haña yu, e mal noticia di rebelion contra Dios i su areglo universal ordená di loke ta bon a ser hací conocí den shelu. Un yu spiritual di alto rango a bira un traidor di su posicion di confiansa i a logra haci e promé pareha humano uni cuné den su curso di rebeldia i di traicion.—Génesis 3:1-6.

E abundancia di mal noticia cu humanidad a presenciá tabatin su cuminsamentu n’e tempu ei. Nada straño cu intriga, decepcion, engaño, mentira i papiamentu di mitar berdad a figurá asina prominentemente den e mal noticianan cu a inundá e mundu desde e tempu ei en adelante. Jesucristo a pone e culpa directamente riba Satanas e Diabel como e originador di mal noticia, bisando e lidernan religioso di Su dia: “Boso ta di boso tata e Diabel, i kier cumpli cu e deseonan di boso tata. Esei tabata un matador ora el a cuminsá, i no a para firme den e berdad, pasobra e berdad no ta den dje. Ora e ta papia e mentira, e ta papia segun su mes disposicion, pasobra e ta un mentiroso i e tata di mentira.”—Juan 8:44.

Segun cu e poblacion humano a aumentá na cantidad, mal noticia a aumentá huntu cuné. Naturalmente, esaki no ta nificá cu no tabatin tempu di goso i felicidad, pasobra tabatin hopi cos den bida cu tabata motibunan pa goso. Sin embargo, e nubianan di problema i tristesa tabata evidente atrabes di tur generacion di humanidad te awor.

Tin un otro motibu fundamental pa e situacion lamentabel aki. Esei ta nos inclinacion heredá pa cu malecho i calamidad. Jehova mes ta pone su dede riba e causa inevitabel aki pa mal noticia bisando: “E inclinacion dje curason di hende ta malu for di su hubentud padilanti.”—Génesis 8:21.

Pakico Mal Noticia Ta Escalá?

Sin embargo, tin un motibu pakico mal noticia a escalá den e siglo 20 aki. E motibu aki ta ser declará claramente den Bijbel, cu a predicí cu humanidad den siglo 20 lo drenta un periodo di tempu único conocí como “e último dianan” of “e tempu di fin.” (2 Timoteo 3:1; Daniel 12:4) Profecia di Bijbel i cronologia bíblico ta identificá e “periodo di fin” aki cu a cuminsá na 1914. Pa prueba bíblico en detaye di esaki, por fabor mira capítulo 11 dje buki Conocimentu cu Ta Hiba na Bida Eterno, publicá dor di Watchtower Bible and Tract Society of New York, Inc.

E último dianan tabata pa cuminsá cu un suceso cu automáticamente lo a haci mal noticia riba tera escalá. Kico esei tabata? Esei tabata e tiramentu di Satanas e Diabel i su multitud di demoñonan abou for di shelu. Bo por lesa e descripcion bibu aki dje aumento inevitabel di mal noticia na Revelacion 12:9, 12: “E dragon grandi a ser tirá abou, e colebra original, esun yamá Diabel i Satanas, cu ta gaña henter e tera habitá; el a ser tirá abou n’e tera, i su angelnan a ser tirá abou huntu cuné. . . . ‘Ai dje tera i di laman, pasobra e Diabel a baha cerca boso, mashá rabiá, sabiendo cu e tin un periodo di tempu corticu mas.’ ”

Pues pa e tempu cu ainda ta resta te ora e último dianan yega na nan fin, nos por spera pa mal noticia sigui i asta aumentá na cantidad i intensidad.

Mal Noticia Lo No Existí Pa Semper

Afortunadamente pa habitantenan dje tera, e estado miserabel di asuntunan cu ta producí e epidemia djawe di mal noticia lo no existí pa semper. Realmente, nos por bisa cu confiansa cu e dianan di mal noticia continuo ta contá. E situacion no ta sin speransa, apesar di ki malu e por parce. E fin di tur mal noticia ta cerca i lo bini sin falta n’e debido tempu di Dios.

Nos por ta sigur di esaki pasobra Bijbel ta profetisá cu e último dianan lo culminá of concluí cu Dios su destruccion i kitamentu di tur causa di mal noticia. Lo e kita hende malbado cu ta fomentá conflicto, cu ta nenga di cambia i bira for di nan curso malbado. Esaki ta culminá den e guera dje gran dia di Dios e Todopoderoso, conocí como e bataya di Armagedon. (Revelacion 16:16) Inmediatamente despues di esei, Satanas e Diabel i su trupanan di forsanan demoniaco lo ser poné fuera di accion. Revelacion 20:1-3 ta describí e maramentu di Satanas, e originador di tur mal noticia: “Mi a mira un angel baha for di shelu cu e yabi dje abismo i un cadena grandi den su man. I el a capturá e dragon, e colebra original, cu ta Diabel i Satanas, i a mar’é pa mil aña. I el a tir’é den abismo i a cer’é i a sey’é riba dje, p’e no gaña e nacionnan mas.”

Despues dje sucesonan dramático aki, un tempu di bon noticia sin precedente lo bini p’e tera i su habitantenan. E habitantenan aki lo incluí e miyones di personanan cu a sobrebibí e guera final di Armagedon i e miles di miyones cu lo ser resucitá for di nan soño di morto den graf. E mihó noticia aki di tur otro ta ser describí den e último buki di Bijbel: “E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i morto lo no existí mas, tampoco lo tin mas lamento ni sclamacion ni dolor. E cosnan anterior a pasa forbij.”—Revelacion 21:3, 4.

Bo por imaginá e tempu felis ei? En berdad un futuro glorioso unda mal noticia no ta existí mas. Sí, tur mal noticia lo a terminá i lo no ser tendé mas. Bon noticia lo reina e ora ei riba tur otro cos i lo abundá pa tur eternidad.