Berdadero Siguridad—Un Ilusion

ARNOLD tabata un mucha cu a stima su peluche di tiger. Tur caminda cu e bai, e tabatin e huntu cuné—ora di hunga, ora di come, riba cama. P’e, e tiger a dun’é consuelo, siguridad. Riba un dia, tabatin un crísis. E tiger a perde!

Segun cu Arnold tabata yora, su mama, tata i tres ruman mas grandi a listra nan cas grandi pa haña e tiger. Por fin un di nan a descubrié den un lachi di kashi. Evidentemente, Arnold a pon’é ei i despues a lubidá lihé unda e tabata. Nan a duna Arnold e tiger bek, i el a seca su lágrimanan. El a sintié contentu i sigur atrobe.

Ki excelente lo tabata si tur problema por a ser resolvé asina fácilmente—mes simpel cu haña un tiger di co’i hunga den un lachi! Sin embargo, pa mayoria hende, preguntanan tocante siguridad ta muchu mas serio i complicá cu esei. Casi tur caminda, hende ta puntra nan mes, ‘Lo mi bira un víctima di crímen of violencia? Mi ta den peliger di perde mi trabou? Mi famia ta sigur di tin suficiente cuminda? Otronan lo evitá mi pa motibu di mi religion of mi antecedente étnico?’

E cantidad di hende cu no tin siguridad ta inmenso. Segun Nacionnan Uní, casi tres mil miyon hende no por haña tratamentu médico pa malesanan comun ni tampoco remedinan esencial. Mas cu un mil miyon hende ta decaí den pobresa extremo. Casi un mil miyon hende, aunke nan por traha, no tin trabou masha productivo. E cantidad di refugiadonan ta aumentando. Pa fin di 1994, rond di 1 di cada 115 hende riba tera a ser forsá pa hui for di nan cas. Miyones di bida ta ser ruiná como resultado dje negoshi internacional di narcótica na balor di US$ 500 mil miyon pa aña, cu ta ocasioná un cantidad incontabel di actonan di crímen i violencia. Guera ta ruiná bida di miyones di hende. Durante 1993 so, 42 pais tabata enbolbí den conflictonan principal, miéntras cu 37 otronan a experenciá violencia político.

Guera, pobresa, crímen i otro menasanan pa siguridad humano ta relacioná cu otro, i nan ta creciendo na cantidad. No tin solucion fácil pa problemanan asina. En realidad, hende lo no resolvé nan mes.

“No pone bo confiansa den e noblenan, ni den e yu di hende terenal, na ken ningun salbacion ta pertenecé,” e Palabra di Dios, Bijbel, ta spierta. Den ken anto nos por confia? E texto aki ta continuá: “Felis ta esun cu tin e Dios di Jacob como su yudansa, kende su speransa ta den Jehova su Dios, e Creador di shelu i tera, di laman, i di tur loke tin den nan.”—Salmo 146:3-6.

Pakico nos por confia den Jehova pa trece siguridad n’e tera aki? Ta posibel pa disfrutá di un bida sigur i felis awor? Con Dios lo eliminá e bareranan pa siguridad humano?