Bo Ta un Pionero Balansá?

E TATA su wowonan ta briya miéntras e ta spera cu brasanan habrí pa su yu muher dal su promé pasonan insigur. Ora cu di ripiente e cai abou, e tata ta anim’é p’e purba atrobe. E sa cu pronto su yu lo haña su balansa i firmesa.

Den un manera similar, un minister pionero nobo por tin mester di tempu i animacion promé cu e haña e balansa necesario pa logra como un proclamador di Reino di tempu completo. Hopi pionero ta sigui sirbi gososamente pa décadanan. Algun ta perde nan balansa dor di cambionan inesperá den nan circunstancianan. Algun asta ta perde nan goso. Den un pais, 20 porciento di esnan cu ta cuminsá traha pionero ta stop dentro dje promé dos añanan di nan sirbishi di tempu completo. Kico lo por saca un pionero for dje sirbishi sumamente gososo aki? Tin algu cu por haci pa evitá e contratempunan aki?

Aunke mal salú, necesidad financiero i responsabilidadnan di famia por causa cu algun ta bandoná e ministerio di tempu completo, un piedra di tropieso pa otronan ta cu nan no ta mantené bon balansa entre e vários obligacionnan cristian. Balansa ta implicá “un estado den cua ningun elemento, factor of influencia tin mas peso cu un otro of ta fuera di debido proporcion cu e otronan.”

Jesucristo a mustra su disipelnan con pa haci e trabou di predicá i haci disipel. Den su propio ministerio, el a ilustrá tambe con pa mantené balansa. Jesus a mustra cu e lidernan religioso hudiu tabata falta balansa, ora el a bisa nan: “Boso ta duna e décimo dje yerbabuena i dje eneldo i dje comino, pero boso a pasa por haltu di asuntunan mas importante dje Ley, esta, husticia i misericordia i fieldad. Ta esaki ta e cosnan cu tabata obligatorio pa haci, tog sin pasa por haltu dje otro cosnan.”—Mateo 23:23.

E principio aki ta aplicá igualmente awe, specialmente n’e ministerio di pionero. Impulsá dor di entusiasmo i bon intencion, algun a cuminsá traha pionero sin prepará completamente p’e of sin considerá tur loke e ta enbolbé. (Lucas 14:27, 28) Otronan a bira asina absorbá den e ministerio di veld cu nan a pasa por haltu di otro aspectonan importante di cristianismo. Con nan por alcansá i mantené balansa?

Keda Spiritualmente Fuerte!

Jesus nunca a neglishá su spiritualidad. Maske e multitudnan cu a bin pa tend’é i pa busca curacion a exigí masha hopi di su tempu, el a saca tempu pa oracion compañá cu meditacion. (Marco 1:35; Lucas 6:12) Traha pionero den un manera balansá awe tambe ta rekerí pa un pionero haci uso amplio di tur e percuracionnan pa keda spiritualmente fuerte. Pablo a razoná: “No obstante, abo, esun cu ta siña un otro persona, no ta siña bo mes?” (Romanonan 2:21) Lo ta siguramente un ekibocacion pa ocupá tur bo tempu cu predicá na otronan miéntras cu bo ta neglishá di traha tempu pa studio personal adecuado i oracion regular.

Kumiko ta un pionero pa dos década caba. Aunke e tin tres yu i un esposo incrédulo, el a haña cu experencia a siña cu e mihó tempu p’e lesa i studia Bijbel ta djis promé cu e bai drumi anochi. Segun cu e ta studia, particularmente e ta tuma nota di puntonan cu e por usa den e ministerio di veld di manera cu e por tene su ministerio diario frescu i interesante. Otro pioneronan exitoso ta lanta mainta promé cu e resto dje famia pa disfrutá di fortificacion spiritual den e oranan ketu di mainta. Kisas abo tin otro oranan apropiado apartá pa prepará pa reunionnan i keda al dia cu e último publicacionnan cristian. Si bo ta deseá di mantené e goso dje ministerio, studio personal no ta algu cu bo mester haci den purá ni neglishá.

Balansando Responsabilidadnan di Famia

Mayornan cu ta traha pionero tambe mester tene na mente cu un gran parti di “e boluntad di Jehova” pa nan ta enbolbé percurá p’e necesidadnan físico, emocional i spiritual di nan propio famia. (Efesionan 5:17; 6:1-4; 1 Timoteo 5:8) Tin biaha asta un casá i miembronan di famia creyente ta teme cu nan lo no ricibí yudansa i apoyo for dje esposa i mama unabes e cuminsá traha pionero. Sintimentunan asina ta resultá den un reaccion poco entusiasmá riba su deseo pa bira un pionero. Sin embargo, cu bon planificacion i pensamentu delantá e por mantené balansa.

Hopi pionero ta trata pa haci tur nan trabou di predicacion ora miembronan di famia no ta na cas. Kumiko, mencioná anteriormente, ta huntu cu su famia ora nan ta desayuná, ta yama su esposo i yunan mainta ayó ora nan ta bai, i ta bek na cas promé cu nan regresá. E ta usa dialuna pa cushiná vários cuminda di antemano di manera cu e por relahá i por come huntu cu su famia en bes di keda ocupá den cushina. Haciendo mas cu un tarea na mésun tempu, tal como otro trabounan di cas miéntras e ta preparando cuminda, tambe ta yuda. Den e manera ei, Kumiko asta ta haña tempu pa invitá e amigunan di su yunan pa bini i pa prepará cos di boca dushi special pa nan.

Segun cu yunan ta crece den nan añanan tiener, hopi biaha nan mester di mas atencion for di nan mayornan pa trata cu e emocionnan, deseonan, dudanan i temornan nobo cu ta inundá nan. Esaki ta rekerí pa un mayor cu ta pionero ser alerto i haci ahuste den su programa. Tuma Hisako por ehempel, un pionero, mama di tres yu. Kico el a haci ora su yu muher mas grandi a cuminsá manifestá un falta di goso i entusiasmo pa reunionnan cristian i pa sirbishi di veld debí n’e influencia di amigunan mundano di scol? E necesidad real tabata pa su yu muher haci e berdad di su mes i bira plenamente convencí cu kedando separá for dje mundu tabata e mihó curso.—Santiago 4:4.

Hisako ta declará: “Mi a dicidí pa studia cuné e doctrinanan básico for dje buki Biba pa semper di nobo riba un base diario. Na principio nos por a studia solamente pa algun minuut, ya cu mi yu muher tabata keha hopi biaha di dolor di stoma i dolor di cabes severo ora tabata ora p’e studio. Pero mi a tene e studio regularmente. Despues di un par di luna, su disposicion a mehorá bastante, hibando den solamente un corto tempu na su dedicacion i bautismo.” Awor Hisako ta disfrutando di su ministerio di tempu completo huntu cu su yu muher.

Tatanan cu ta traha pionero tambe mester paga tinu pa nan no bira asina absorbá den percurá pa esnan interesá den e veld i pa nan debernan di congregacion cu nan ta faya na duna nan yunan cu ta creciendo e apoyo emocional fuerte i direccion cu nan ta merecé. Esaki no ta algu cu un homber mester schuif riba su esposa. Un anciano cristian ocupá cu pa hopi tempu ta un pionero i kende ta manehá tambe un negoshi chikitu ta traha tempu pa studia cu cada un di su cuater yunan individualmente. (Efesionan 6:4) Ademas, e ta prepará p’e reunionnan semanal huntu cu su famia. Pioneronan balansá no ta neglishá nan famia ni materialmente ni spiritualmente.

Balansa Económico

Un punto di bista corecto di necesidadnan diario ta un otro área den cua pioneronan mester trata pa mantené bon balansa. Aki atrobe, nos por siña hopi for di Jesus su ehempel i conseho excelente. El a spierta pa nos no bira demasiado anshá tocante cosnan material. En bes di esei, el a animá su disipelnan pa pone e Reino na promé lugá, primintiendo cu Dios lo percurá pa nan mescos cu e ta haci p’e resto di su creacion. (Mateo 6:25-34) Dor di sigui e bon conseho aki, hopi pionero por a permanecé den sirbishi di tempu completo pa hopi aña, i Jehova a bendicioná nan esfuersonan pa obtené nan ‘pan di cada dia.’—Mateo 6:11.

Apostel Pablo a consehá compañeronan cristian pa ‘laga tur hende sa ki razonabel nan ta.’ (Filipensenan 4:5) Siguramente, razonabilidad lo rekerí pa nos cuida nos salú bon. Pioneronan balansá ta haci tur esfuerso pa mustra razonabilidad den nan manera di biba i den nan actitud pa cu cosnan material, sabiendo cu otronan ta observá nan conducta.—Compará cu 1 Corintionan 4:9.

Hóbennan cu ta cuminsá den e sirbishi di pionero mester evitá di saca indebido probecho dje generosidad di nan mayornan. Si nan ta biba den cas di nan mayornan, lo ta un manifestacion di bon balansa i aprecio pa nan tambe haci trabou di cas i pa nan tin un trabou ‘part-time’ cu lo permití nan contribuí n’e gastunan di cas.—2 Tesalonicensenan 3:10.

Pioneronan Balansá Ta un Berdadero Bendicion

Tal bes bo ta un pionero cu ta trahando duru pa mantené e balansa corecto. Keda convencí cu bo por alcansá balansa. Mescos cu un mucha chikitu mester di tempu pa siña balansá su mes i cana, hopi pionero maduro ta bisa cu a tuma tempu pa nan alcansá balansa den percurá pa tur nan debernan.

Tene un studio personal, percurá pa miembronan di famia i satisfacé nan propio necesidadnan material ta algun dje áreanan den cua pioneronan ta haci esfuerso pa alcansá balansa. Informenan ta mustra cu hopi pionero ta cumpli cu nan responsabilidadnan den un manera sobresaliente. Nan ta berdaderamente un bendicion p’e comunidad i un onor pa Jehova i su organisacion.