E Simia dje Colebra—Con El A Ser Desenmascara?

“Lo mi pone enemistad entre abo i e muher i entre bo simia i su simia.”—GENESIS 3:15.

1. (a) Pakico Jehova ta e Dios felis? (b) Kico el a haci pa permití nos compartí su goso?

JEHOVA ta e Dios felis i cu bon motibu. E ta e mayor i principal Dunador di cosnan cu ta bon, i no tin nada cu por stroba e cumplimentu di su propósitonan. (Isaías 55:10, 11; 1 Timoteo 1:11; Santiago 1:17) E kier pa su sirbidornan compartí su goso, i e ta percurá motibunan válido pa nan haci esei. Pues, na un dje momentonan di mas scur den historia humano—e rebelion den Eden—el a percurá e base pa nos mira futuro cu speransa.—Romanonan 8:19-21.

2. Ora Jehova a pronunciá huicio riba e rebeldenan den Eden, con el a percurá un base pa speransa p’e desendientenan di Adam i Eva?

² Un dje yunan spiritual di Jehova, dor di resistí i calumniá Dios, a caba di combertí su mes den Satanas e Diabel. E promé hendenan, Eva i despues Adam, a cai bou di su influencia i a violá Jehova su ley cu el a declará claramente. Merecidamente nan a ser sentenciá na morto. (Génesis 3:1-24) Sin embargo, ora Jehova a pronunciá huicio riba e rebeldenan aki, el a percurá un base pa speransa p’e desendientenan di Adam i Eva. Den ki manera? Manera ta pará skirbí na Génesis 3:15, Jehova a bisa: “Lo mi pone enemistad entre abo i e muher i entre bo simia i su simia. Lo e machicá bo den cabes i abo lo machik’é den hilchi.” E profecia ei ta un clave pa comprendé henter e Bijbel i tambe sucesonan di pasado i di presente cu ta enbolbé tantu e mundu como Jehova su sirbidornan.

Loke e Profecia Ta Nificá

3. Manera Génesis 3:15 ta referí na dje, identificá (a) e Colebra, (b) “e muher,” (c) e “simia” dje Colebra, (d) e “simia” dje muher.

³ Pa comprendé su nificacion, considerá e vários elementonan dje profecia mes. Esun na ken Génesis 3:15 ta ser dirigí ta e Colebra—no e humilde colebra sino esun cu a us’é. (Revelacion 12:9) “E muher” no ta Eva sino Jehova su organisacion celestial, mama di su sirbidornan ungí cu spiritu riba tera. (Galationan 4:26) E “simia” dje Colebra ta e simia di Satanas, su desendencia—demoño i hende i tambe organisacionnan humano cu ta manifestá e característicanan di Satanas i cu ta mustra enemistad pa cu e “simia” dje muher. (Juan 15:19; 17:15) E “simia” dje muher ta principalmente Jesucristo, kende a ser ungí cu spiritu santu na 29 E.C. E 144.000, cu ta “nace di nobo . . . di awa i di spiritu” i cu ta heredero dje Reino celestial huntu cu Cristo, ta un parti subsidiario dje simia ei di promesa. Esakinan a cuminsá ser agregá n’e simia dje muher for di Pentecoste 33 E.C. padilanti.—Juan 3:3, 5; Galationan 3:16, 29.

4. Ki coneccion Génesis 3:15 tin cu e tera birando un paradijs, yená cu hende liber di picá i morto?

⁴ E colebra literal den Eden a ser usá como un bocero dor di esun kende su engaño a pone humanidad perde Paradijs. Génesis 3:15 a señalá padilanti n’e tempu ora esun cu a manipulá e colebra ei lo ser aplastá. E ora ei e caminda lo habri atrobe pa sirbidornan humano di Dios habitá Paradijs, liber di picá i morto. Ki un tempu gososo esei lo ta!—Revelacion 20:1-3; 21:1-5.

5. Ki cualidadnan ta caracterisá e desendencia spiritual dje Diabel?

⁵ Despues dje rebelion den Eden, individuonan i organisacionnan a cuminsá aparecé cu a manifestá característicanan manera esnan di Satanas e Diabel—rebelion, gañamentu, calumnia, i asesinato, combiná cu oposicion contra e boluntad di Jehova i contra esnan cu ta adorá Jehova. E característicanan ei a identificá e desendencia, e yunan spiritual, dje Diabel. Entre esakinan tabatin Cain, kende a mata Abel ora Jehova a faborecé Abel su adoracion riba esun di Cain. (1 Juan 3:10-12) Nimrod tabata unu cua su nomber mes a identifik’é como un rebelde i kende a bira un yagdor i gobernante poderoso na oposicion di Jehova. (Génesis 10:9) Ademas tabatin un sucesion di reinonan antiguo, incluyendo Babilonia, cu nan religionnan patrociná pa Estado i basá riba falsedad, i e reinonan aki a oprimí adoradornan di Jehova cruelmente.—Jeremías 50:29.

“Enemistad Entre Abo i e Muher”

6. Den ki maneranan Satanas a mustra enemistad pa cu e muher di Jehova?

⁶ Durante tur e tempu aki, tabatin enemistad entre e Colebra i e muher di Jehova, entre Satanas e Diabel i Jehova su organisacion celestial di criaturanan spiritual leal. Satanas su enemistad a ser demostrá ora el a desafiá Jehova cu mofa i a purba desbaratá Jehova su organisacion celestial, tentando angelnan pa bandoná nan debido lugá di biba. (Proverbionan 27:11; Hudas 6) El a ser manifestá ora Satanas a usa su demoñonan pa purba interferí cu mensaheronan angelical mandá dor di Jehova. (Daniel 10:13, 14, 20, 21) E enemistad tabata evidente den un manera sobresaliente den e siglo 20 aki ora Satanas a purba destruí e Reino Mesiánico na su nacementu.—Revelacion 12:1-4.

7. Pakico Jehova su angelnan leal a sinti enemistad pa cu e Colebra simbólico, tog ki restriccion nan a mustra?

⁷ Tambe tabatin enemistad di parti e muher di Jehova, e cuerpo di angelnan leal, pa cu e Colebra simbólico. Satanas a calumniá e bon nomber di Dios; tambe el a lanta duda tocante e integridad di tur criatura inteligente di Dios, incluyendo tur e angelnan, i el a purba activamente pa corumpí nan lealtad na Dios. (Revelacion 12:4a) Angelnan, kerubinnan i serafinnan leal definitivamente lo a sinti un repugnancia pa cu esun cu a haci su mes Diabel i Satanas. Sin embargo, nan a spera riba Jehova p’e atendé cosnan na su debido tempu i manera.—Compará cu Hudas 9.

Hostilidad pa cu e Simia dje Muher di Dios

8. Ken Satanas tabata spera atentamente?

⁸ Miéntras tantu, Satanas a spera atentamente e Simia profetisá dje muher, esun cu Jehova a bisa lo machicá e Colebra den cabes. Ora e angel for di shelu a anunciá cu Jesus, kende a nace na Betlehem, tabata e “Salbador, cu ta Cristo e Señor,” esaki tabata un confirmacion fuerte cu lo el a bira e Simia profetisá dje muher.—Lucas 2:10, 11.

9. Despues dje nacementu di Jesus, con Satanas a manifestá enemistad malicioso?

⁹ E enemistad malicioso di Satanas pronto a ser mustrá ora el a lok astrólogonan pagano riba un mision cu a hiba nan promé cerca Rey Herodes na Jerusalem i despues p’e cas na Betlehem unda nan a haña e mucha chikitu Jesus i su mama, Maria. Djis despues di esei Rey Herodes a ordená pa mata tur mucha homber te cu dos aña di edad, den i rond di Betlehem. Den esaki, Herodes a mustra odio satánico p’e Simia. Herodes evidentemente tabata sa masha bon cu e tabata tratando na caba cu e bida di esun cu mester a bira e Mesías. (Mateo 2:1-6, 16) Historia ta duna evidencia cu Rey Herodes tabata sin escrúpulo, astuto i asesino—berdaderamente un parti dje simia dje Colebra.

10. (a) Despues dje bautismo di Jesus, con Satanas personalmente a purba stroba Jehova su propósito relacioná cu e Simia primintí? (b) Con Satanas a usa e lidernan religioso hudiu pa logra su metanan?

¹⁰ Despues cu Jesus a ser ungí cu spiritu santu na 29 E.C. i cu Jehova a papia for di shelu reconociendo Jesus como su Yu, bes tras bes Satanas a trata na laga Jesus sucumbí na tentacion, buscando asina pa stroba Jehova su propósito relacioná cu su Yu. (Mateo 4:1-10) Fayando den esei, el a recurí na sigui usa agente humano pa logra su metanan. Entre esnan cu el a usa pa trata na desacreditá Jesus tabata e lidernan religioso hipócrita. Nan a usa mentira i calumnia, e sorto di trikinan cu Satanas mes a usa. Ora Jesus a bisa un paralítico, “Tuma curashi, . . . bo picánan ta pordoná,” e escribanan, sin warda pa mira si e homber en berdad a ser curá, a husga Jesus como un blasfemador. (Mateo 9:2-7) Ora Jesus a cura hende riba sabat, e fariseonan a denunci’é como un violador dje ley di sabat i a deliberá den nan seno pa caba cuné. (Mateo 12:9-14; Juan 5:1-18) Ora Jesus a expulsá demoño, e fariseonan a acus’é di tabata asociá cu “Beelzebub, e gobernante dje demoñonan.” (Mateo 12:22-24) Despues cu Lázaro a ser lantá for di morto, hopi hende a pone fe den Jesus, pero e sacerdotenan principal i fariseonan atrobe a deliberá den nan seno pa mat’é.—Juan 11:47-53.

11. Tres dia promé cu Jesus su morto, ken el a identificá como parti dje simia dje Colebra, i pakico?

¹¹ Dia 11 di nísan, 33 E.C., aunke Jesus tabata sa masha bon kico nan tabata tramando, sin miedu el a bai te den e área di tempel den Jerusalem i ei públicamente a pronunciá huicio riba nan. Como grupo, e escriba i fariseonan consistentemente a demostrá ki clase di hende nan tabata; di manera cu Jesus a bisa: “Ai di boso, escriba i fariseonan, hipócritanan! pasobra boso ta cera e reino di shelu dilanti hende; pasobra boso mes no ta drenta, ni boso ta permití esnan cu ta drentando pa drenta.” Jesus directamente a declará cu nan tabata parti dje simia dje Colebra, bisando: “Serpientenan, yunan di colebra, con boso lo por hui dje huicio di Gehena?” (Mateo 23:13, 33) Su lenguahe ta reflehá e profecia na Génesis 3:15.

12, 13. (a) Con e sacerdotenan principal i e escribanan a duna mas evidencia en cuanto ken tabata nan tata spiritual? (b) Ken a uni cu nan? (c) Na cumplimentu di Génesis 3:15, con e Simia dje muher a ser machicá na su hilchi?

¹² Tendiendo Jesus su palabranan, nan a haña remordimentu, di manera cu nan a roga Dios pa misericordia? Nan a repentí di nan maldad? No! Marco 14:1 ta informá cu e siguiente dia mes, na un reunion den e patio dje sumo sacerdote, “e sacerdotenan principal i e escribanan tabata buscando manera pa gara [Jesus] usando triki astuto i mat’é.” Nan a sigui manifestá e spiritu asesino di Satanas, kende Jesus anteriormente a describí como un matador. (Juan 8:44) Pronto Hudas Iscariote, kende Satanas a inducí pa ser un apóstata, a uni cu nan. Hudas a bandoná e Simia sin culpa dje muher di Dios i a djoin e simia dje Colebra.

¹³ Trempan riba e mainta di 14 di nísan, e miembronan dje corte religioso hudiu a hiba Jesus como prezu p’e gobernador romano. E biaha aki tabata e sacerdotenan principal cu a hiba e delantera gritando p’e ser clabá na staca. Ora Pilato a puntra, “Mi mester claba boso rey na staca?” tabata e sacerdotenan principal cu a contestá, “Nos no tin mas rey cu César.” (Juan 19:6, 15) En berdad, nan a duna prueba den tur manera cu nan tabata parti dje simia dje Colebra. Pero nan siguramente no tabata nan so. E registro inspirá na Mateo 27:24, 25 ta duna e informe aki: “Pilato a tuma awa i a laba su man dilanti dje multitud.” E ora ei tur e pueblo a bisa: “Laga su sanger bini riba nos i riba nos yunan.” Asina hopi hudiu dje generacion ei a identificá nan mes como parti dje simia dje Colebra. Promé cu e fin dje dia ei, Jesus tabata morto. Usando su simia visibel, Satanas a machicá e Simia dje muher di Dios den hilchi.

14. Pakico machicamentu dje hilchi dje Simia dje muher no a nificá victoria pa Satanas?

¹⁴ Satanas a gana? Di ningun manera! Jesucristo a vence e mundu i a prevalecé riba su gobernante. (Juan 14:30, 31; 16:33) El a mantené su lealtad na Jehova te na su morto. Su morto como un hende perfecto a percurá e prijs di rescate necesario pa cumpra bek e derechonan di bida cu Adam a perde. Asina el a habri e caminda pa bida eterno pa esnan cu lo ehercé fe den e percuracion ei i obedecé e mandamentunan di Dios. (Mateo 20:28; Juan 3:16) Jehova a lanta Jesus for di morto pa bida inmortal den shelu. Na Jehova su debido tempu, Jesus lo aplastá Satanas for di existencia. Na Génesis 22:16-18, Bijbel ta profetisá cu Jehova lo drama fabor riba tur e famianan dje tera cu ta dal e pasonan necesario pa bendicioná nan mes pa medio dje Simia leal ei.

15. (a) Despues dje morto di Jesus, con su apostelnan a sigui desenmascará e simia dje Colebra? (b) Ki hostilidad mas e simia dje Colebra a manifestá te den nos tempu?

¹⁵ Despues di Jesus su morto, cristiannan ungí cu spiritu a sigui desenmascará e simia dje Colebra, mescos cu nan Señor a haci. Impulsá pa spiritu santu, apostel Pablo a spierta contra “e homber di maldad” kende su presencia lo ta “segun e obramentu di Satanas.” (2 Tesalonicensenan 2:3-10) E “homber” colectivo aki a resultá di ta e clero di cristiandad. En buelta, e simia dje Colebra a persiguí e siguidornan di Jesucristo ferosmente. Den e profecia registrá na Revelacion 12:17, apostel Juan a predicí cu Satanas lo sigui haci guera contra e resto dje simia dje muher di Dios te den nos tempu. Esei ta exactamente loke a sosodé. Den hopi pais, Testigonan di Jehova a ser prohibí, atacá, encarcelá, of tirá den camponan di concentracion pa motibu di nan posicion firme p’e Reino di Dios i su camindanan hustu.

E Simia dje Colebra Desenmascará den Tempu Actual

16. Den tempu actual, ken a ser desenmascará como parti dje simia dje Colebra, i den ki manera?

¹⁶ Imitando Jesucristo, cristiannan berdadero no a mengua den nan empeño intrépido pa desenmascará e Colebra i su simia. Na 1917 e Studiantenan di Bijbel, manera Testigonan di Jehova tabata conocí e tempu ei, a publicá e buki The Finished Mystery (E Misterio Terminá), den cua nan a exponé e hipocresia di clero di cristiandad. Despues di esaki a sigui, na 1924, un resolucion imprimí titulá Ecclesiastics Indicted (Eclesiásticonan Denunciá). Cincuenta miyon ehemplar a ser distribuí riba escala internacional. Na 1937, J. F. Rutherford, e tempu ei presidente dje Sociedad Watch Tower, a presentá denunciacionnan poderoso contra e simia di Satanas den discursonan titulá “Desenmascará” i “Religion i Cristiandad.” E siguiente aña, segun cu 50 auditorio di congreso den vários pais tabata scucha, el a duna e discurso “Enfrentá e Echonan” via transmision radial for di Londen, Inglatera. Un luna despues, un red extenso di radio na Merca a transmití e discurso “Facismo of Libertad.” Esakinan a ser complementá cu denunciacionnan poderoso den bukinan manera Enemies (Enemigunan) i Religion i tambe den e foyeto Uncovered (Desvelá). Na armonia cu loke a ser publicá desde añanan ’20, e buki Revelacion—su gran culminacion ta cerca!,a imprimí awor na 65 idioma, ta identificá lidernan político corupto i comerciantenan golos i sin escrúpulo entre e miembronan principal dje simia visibel dje Colebra. Ora lidernan político ta hacié un custumber pa recurí na falsedad pa engañá nan súbditonan, pa mustra falta di respet p’e santidad di sanger, i pa oprimí Jehova su sirbidornan (mustrando asina odio p’e simia dje muher di Dios), nan siguramente ta identificá nan mes como parti dje simia dje Colebra. Mescos ta cierto di comerciantenan cu, sin ningun remordimentu di concenshi, ta saca mentira pa obtené ganashi financiero i cu ta traha of bende productonan cu ta conocí di ta causa malesa.

17. Ki oportunidad ta habrí ainda pa individuonan prominente cu tal bes ta sali for dje sistema di mundu?

¹⁷ No tur individuo corumpí dor di religion mundano, política of comercio lo ser contá finalmente como parti dje simia dje Colebra. Algun dje homber i muhernan aki ta yega di admirá Testigonan di Jehova. Nan ta usa nan influencia pa yuda nan, i na debido tempu ta brasa adoracion berdadero. (Compará cu Echonan 13:7, 12; 17:32-34.) Na tur esakinan, e apelacion aki a ser hací: “Awor, O reynan, ehercé perspicacia; laga boso mes ser corigí, O huesnan dje tera. Sirbi Jehova cu temor i ser gososo cu temblamentu. Sunchi e yu, pa E no rabia i pa boso no perecé for dje caminda, pasobra su rabia ta cende fácilmente. Felis ta tur esnan cu ta busca refugio den dje.” (Salmo 2:10-12) En berdad, ta vital pa tur esnan cu ta deseá Jehova su fabor actua awor, promé cu e Hues celestial dal e porta di oportunidad cera!

18. Aunke nan no ta parti dje simia dje muher, no obstante ken ta adoradornan di Jehova?

¹⁸ Solamente esnan cu lo componé e Reino celestial ta parti dje simia dje muher. Esakinan ta poco na cantidad. (Revelacion 7:4, 9) Sin embargo, tin un multitud grandi di otronan, sí, miyones di nan, cu como adorador di Jehova ta spera cu anhelo bida eterno den un paradijs riba tera. Tantu cu palabra i accion, nan ta bisa esnan ungí di Jehova: “Nos lo bai cu boso, pasobra nos a tende cu Dios ta cu boso.”—Zacarías 8:23.

19. (a) Ki scogementu tur hende mester haci? (b) Na ken en particular un apelacion sincero ta ser hací pa actua sabiamente miéntras cu ainda tin oportunidad?

¹⁹ Awor ta e tempu ora tur hende mester scoge. Nan kier adorá Jehova i apoyá su soberania, of nan lo permití Satanas ser nan gobernante dor di haci e cosnan cu ta agrad’é? Rond di cincu miyon hende di tur nacion a tuma nan posicion n’e banda di Jehova den asociacion cu esnan restante dje simia dje muher, e herederonan di Reino. Ocho miyon otro personanan a mustra interes pa studia Bijbel cu nan of pa asistí na nan reunionnan. Testigonan di Jehova ta bisa na tur esakinan: E porta di oportunidad ta habrí ainda. Tuma bo posicion inekibocablemente n’e banda di Jehova. Reconocé Cristo Jesus como e Simia primintí. Asociá gososamente cu Jehova su organisacion visibel. Ta nos deseo cu bo por tuma parti den tur e bendicionnan cu E lo percurá pa medio di e gobernacion dje Rey, Cristo Jesus.

[Nota]

Bo Ta Corda?

◻ Ken ta e Colebra na cua Génesis 3:15 ta referí? I ken ta e muher?

◻ Ki cualidadnan ta caracterisá e simia dje Colebra?

◻ Con Jesus a desenmascará e simia dje Colebra?

◻ Ken a ser desenmascará como parti dje simia dje Colebra den tempu actual?

◻ Ki accion urgente ta ser rekerí pa evitá di ser identificá cu e simia dje Colebra?

[Plachi na página 10]

Jesus a desenmascará lidernan religioso hipócrita como parti dje simia dje Colebra