Lo Bo No Kier Perd’é!
Perde kico? E Congreso di Districto di Testigonan di Jehova “Mensaheronan di Pas Divino” cu ta acercando rápidamente! Na mayoria lugá e congreso lo cuminsá diabierne mainta 9:30 cu un programa musical. Despues di scucha entrevistanan fortalecedor di fe durante e parti “Tendiendo for di Proclamadornan Celoso di Pas,” lo bo disfrutá dje discurso animador “Kico Dios Ta Rekerí di Nos?”
Un punto sobresaliente riba diabierne atardi lo ta e discurso clave conmovedor “Nos Papel Como Mensaheronan di Pas Divino.” Anto e parti “Yuda Otronan Siña e Rekisitonan di Dios” lo ofrecé sugerencianan riba con pa siña esnan nobo. Despues di esaki lo sigui e simposio oportuno “Tene Cuidou cu e Trampanan Scondí di Entretenimentu.” E programa di diabierne lo concluí cu e discursonan “Oponé e Diabel—No Tolerá Ningun Rivalidad” i “Sosteniendo Lealmente e Integridad dje Palabra di Dios.”
E programa di diasabra mainta lo enfatisá e importancia dje trabou di haci disipel den e simposio di tres parti “Mensaheronan Treciendo Bon Nobo di Pas.” E sesion lo concluí cu e discursonan “Dunamentu Alegre den e Organisacion di Jehova” i “Bida i Pas Mediante Dedicacion i Bautismo,” despues di cua lo tin oportunidad pa disipelnan nobo ser bautisá.
E presentacion di diasabra atardi “Considerá Con Jehova Ta Pensa Riba Asuntunan” lo contestá preguntanan manera ‘Cristiannan ta participando den un trabou di separacion awe?’ i ‘Kico ta e punto di bista bíblico di pena capital?’ Tambe lo bo disfrutá dje simposio conmovedor di dos parti “E Dios di Pas Ta Percurá pa Bo” i specialmente e discurso di conclusion “Sigui Tras di Pas Divino den Bida di Famia.”
E programa di diadomingo mainta lo incluí e simposio di tres parti “Identificando e Clase Corecto di Mensaheronan” i e discurso “Scucha i Obedecé e Palabra di Dios.” E programa di mainta lo concluí cu un drama presentá den pleno trahe i esenario antiguo cu lo resaltá lesnan balioso for dje relato bíblico di Hues Gideon.
E sesion final dje congreso riba diadomingo atardi lo presentá e discurso público, titulá “Por Fin Berdadero Pas!—Di Ki Fuente?” Finalmente, e discurso motivador “Moviendo Padilanti Como Mensaheronan di Pas Divino” lo terminá e congreso.
Traha plan awor pa asistí. Pa haña e sitio mas cerca bo cas, tuma contacto cu e Salon di Reino local di Testigonan di Jehova of skirbi e publicadornan dje revista aki. E edicion di ¡Despertad! di 8 di juni lo mencioná adres di tur e sitionan di congreso na Merca, Cánada, Inglatera i Irlanda.