Bendicion of Maldicion—Ehempelnan pa Nos Awe

“E cosnan aki a sigui sosodé nan como ehempel, i nan a ser skirbí como spiertamentu pa nos riba ken e fin dje sistema di cosnan a yega.”—1 CORINTIONAN 10:11.

1. Mescos cu un hende ta inspeccioná un herment, ki inspeccion nos mester haci?

ORA frus ta invisibel bou di un capa di verf, e por cuminsá come un herment trahá di heru. Por tuma algun tempu promé cu e frus bira visibel na superficie. Di igual manera, e actitud i deseonan di bo curason por cuminsá deteriorá hopi tempu promé cu esaki resultá den consecuencianan serio of asta ser ripará dor di otronan. Mescos cu sabiamente nos lo inspeccioná un herment pa mira si el a cuminsá frusa, asina un inspeccion rigoroso di nos curason i mantencion na tempu por conserbá nos integridad cristian. Cu otro palabra, nos por ricibí bendicionnan di Dios i nos por evitá maldicionnan divino. Algun hende por pensa cu e bendicion i maldicionnan cu a ser pronunciá riba Israel di antigwedad tin poco nificacion pa esnan cu ta enfrentá e conclusion dje sistema di cosnan aki. (Hosué 8:34, 35; Mateo 13:49, 50; 24:3) Sin embargo, esei no ta e caso. Nos por beneficiá mashá for dje ehempelnan spiertador cu a enbolbé Israel, manera 1 Corintionan capítulo 10 ta mustra.

2. Kico 1 Corintionan 10:5, 6 ta bisa tocante e experencianan di Israel den e desierto?

² Apostel Pablo ta compará e israelitanan bou di Moises cu cristiannan bou di Cristo. (1 Corintionan 10:1-4) Aunke e pueblo di Israel por a drenta e Tera Primintí, “Dios no a expresá su aprobacion riba mayoria di nan, pasobra nan a keda bentá abou den desierto.” P’esei Pablo a bisa compañeronan cristian: “Awor e cosnan aki a bira nos ehempel, pa nos no ta personanan cu ta deseá cosnan perhudicial, mescos cu nan a deseá nan.” (1 Corintionan 10:5, 6) Deseonan ta ser alimentá den e curason, pues nos tin cu tuma na pechu e ehempelnan spiertador cu Pablo ta cita.

Spiertamentu Contra Idolatria

3. Con e israelitanan a peca en coneccion cu e bisé di oro?

³ Pablo su promé spiertamentu ta: “Ni laga nos bira idólatra, manera algun di nan; net manera ta pará skirbí: ‘E pueblo a sinta pa come i bebe, i nan a lanta pa dibertí nan mes.’ ” (1 Corintionan 10:7) E ehempel spiertador aki ta esun dje israelitanan cu a bai bek n’e custumbernan di Egipto i a traha un bisé di oro pa adorá. (Exodo, capítulo 32) Disipel Esteban a indicá kico tabata e problema fundamental: “Nos antepasadonan a nenga di bira obediente na [Moises, representante di Dios], sino nan a hal’é un banda i den nan curason nan a bolbe bek na Egipto, bisando Aron, ‘Traha diosnan pa nos pa bai dilanti nos. Pasobra e Moises aki, cu a saca nos for dje tera di Egipto, nos no sa kico a pasa cuné.’ Pues nan a traha un bisé den e dianan ei i a trece un sacrificio p’e ídolo i a cuminsá gosa den e obranan di nan man.” (Echonan 7:39-41) Ripará cu “den nan curason” e israelitanan desobediente tabatin mal deseonan cu a hiba na idolatria. “Nan a traha un bisé . . . i a trece un sacrificio p’e ídolo.” Ademas, nan “a cuminsá gosa den e obranan di nan man.” Tabatin música, cantamentu, bailamentu, comementu i bebementu. Claramente, e idolatria a seducí nan i a entretené nan.

4, 5. Ki prácticanan di idolatria nos tin cu evitá?

⁴ Egipto antitípico—e mundu di Satanas—prácticamente ta adorá entretenimentu. (1 Juan 5:19; Revelacion 11:8) Su ídolonan ta actornan, cantantenan i streanan di deporte, i tambe nan baile, nan música, nan conceptonan di goso i diberticion. Hopi a ser tentá pa enbolbé nan mes totalmente den entretenimentu miéntras cu nan ta pretendé di adorá Jehova. Ora un cristian mester ser reprendé pa malecho, hopi biaha por atribuí su estado spiritual debilitá na bebementu di bebida alcohólico, bailamentu i un of otro diberticion cu por ta na rand di idolatria. (Exodo 32:5, 6, 17, 18) Algun entretenimentu ta saludabel i agradabel. Sin embargo, awe mayoria dje música, bailamentu, película i videonan mundano ta sirbi pa satisfacé deseonan carnal corupto.

⁵ Cristiannan berdadero no ta sucumbí n’e adoracion di ídolo. (2 Corintionan 6:16; 1 Juan 5:21) Laga cada un di nos tene masha cuidou pa no bira adicto na entretenimentu idólatra i risca di sufri e efectonan perhudicial di bira absorbá den diberticion den un manera mundano. Si nos someté nos mes na influencianan mundano, deseonan i actitudnan perhudicial por penetrá casi sin cu nos ta ripará den e mente i curason. Si nos no corigí nan, esakinan cu tempu por causa cu nos ta ‘keda bentá abou den e desierto’ di Satanas su sistema.

6. Ki accion positivo nos tin cu tuma kisas relacioná cu entretenimentu?

⁶ Mescos cu Moises n’e tempu dje incidente dje bisé di oro, en efecto “e esclabo fiel i discreto” ta bisando: “Ken ta n’e banda di Jehova? [Lagu’e bini] na mi!” Nos por salba nos bida dor di tuma accion positivo pa mustra cu nos ta para firmemente n’e banda di adoracion berdadero. E tribu di Moises, Levi, a actua mesora pa core cu influencianan degradante. (Mateo 24:45-47; Exodo 32:26-28) Pues, anto, examiná cuidadosamente bo scogementu di entretenimentu, música, videonan, etcétera. Si e ta corupto den un of otro manera, tuma e banda di Jehova. Cu confiansa den Dios huntu cu oracion, haci cambio den bo scogementu di entretenimentu i música, i destruí e material spiritualmente dañino, mescos cu Moises a destruí e bisé di oro.—Exodo 32:20; Deuteronomio 9:21.

7. Con nos por protehá e curason figurativo?

⁷ Con nos por evitá p’e curason frusa? Dor di studia e Palabra di Dios diligentemente, lagando su berdadnan sink den nos mente i curason. (Romanonan 12:1, 2) Naturalmente, nos mester asistí na reunionnan cristian regularmente. (Hebreonan 10:24, 25) Asistí di un manera pasivo na reunion por ser compará cu pasa un man di verf riba un pleki frusá. Esaki por haci nos briya pa un ratu, pero e no ta resolvé e problema fundamental. En bes di esei, dor di preparacion delantá, meditacion i participacion activo den reunionnan, nos por eliminá di un manera enérgico elementonan cu ta causa frus i cu por ta biba den profundidad di nos curason figurativo. Esaki lo yuda nos pega n’e Palabra di Dios i lo fortalecé nos pa wanta pruebanan di fe i bira “sano den tur sentido.”—Santiago 1:3, 4; Proverbionan 15:28.

Spiertamentu Contra Fornicacion

8-10. (a) Ki ehempel spiertador 1 Corintionan 10:8 ta referí na dje? (b) Con e palabranan di Jesus hañá na Mateo 5:27, 28 por ser aplicá den un manera beneficioso?

⁸ Den e siguiente ehempel cu Pablo ta mencioná, nos ta ser consehá: “Ni laga nos practicá fornicacion, manera algun di nan a cometé fornicacion, solamente pa cai, bintitres mil di nan den un dia.”a (1 Corintionan 10:8) E apostel tabata refiriendo n’e tempu ora e israelitanan a buig dilanti diosnan falsu i tabatin “relacion inmoral cu e yu muhernan di Moab.” (Númeronan 25:1-9) Inmoralidad sexual ta castigabel cu morto! Si laga pensamentu i deseonan inmoral persistí, ta mescos cu permití e curason “frusa.” Jesus a declará: “Boso a tende cu tabata bisá, ‘Bo no mag cometé adulterio.’ Pero mi ta bisa boso cu tur cu sigui wak un muher afin di tene pasion p’e a cometé adulterio cuné caba den su curason.”—Mateo 5:27, 28.

⁹ Como evidencia dje consecuencianan di “wak un muher afin di tene pasion p’e” ta e resultado dje pensamentu degradá dje angelnan desobediente promé cu e Diluvio dje Dia di Noe. (Génesis 6:1, 2) Corda, tambe, cu un dje incidentenan di mas trágico den e bida di Rey David a ser provocá ora el a sigui wak un muher di un manera inapropiado. (2 Samuel 11:1-4) Na contraste, e hustu homber casá, Job, ‘a cera un pacto cu su wowonan cu lo e no mustra su mes atento na un bírgen,’ evitando asina di cometé inmoralidad i resultando di ta un wardador di integridad. (Job 31:1-3, 6-11) E wowonan por ser compará cu e bentananan dje curason. I ta for di un curason corupto hopi cos malu ta sali padilanti.—Marco 7:20-23.

¹⁰ Si nos aplicá e palabranan di Jesus, nos lo no duna rienda liber na mal pensamentu dor di wak material pornográfico of dor di cana cu pensamentunan inmoral relacioná cu un compañero cristian, un colega di trabou of cualkier otro hende. Bo no ta eliminá frus for di metal dor di djis raspa e frus kita afó. P’esei, no djis deshací di ideanan i tendencianan inmoral como si fuera nan tabata di poco importancia. Tuma medidanan fuerte pa eliminá inclinacionnan inmoral. (Compará cu Mateo 5:29, 30.) Pablo ta spierta su compañeronan creyente: “Mata boso miembronan di curpa cu ta riba tera pa loke ta fornicacion, impuresa, apetit sexual, deseo perhudicial, i cudishi, locual ta idolatria. Pa causa dje cosnan aki e rabia di Dios ta biniendo.” Sí, pa causa di cosnan manera inmoralidad sexual, “e rabia di Dios ta biniendo” como un expresion di su maldicion. Pues nos tin cu “mata” nos miembronan di curpa relacioná cu e cosnan aki.—Colosensenan 3:5, 6.

Spiertamentu Contra Kehamentu Rebelde

11, 12. (a) Ki spiertamentu ta ser duná na 1 Corintionan 10:9, i na ki incidente el a referí? (b) Con Pablo su spiertamentu mester afectá nos?

¹¹ Pablo ta spierta siguientemente: “Ni laga nos pone Jehova na prueba, manera algun di nan a pon’é na prueba, pa solamente perecé dor dje colebranan.” (1 Corintionan 10:9) Segun cu nan tabata biaha den e desierto cerca dje frontera di Edom, e israelitanan a “sigui papia contra Dios i Moises: ‘Pakico bo a trece nos for di Egipto pa muri den e desierto? Pasobra no tin pan i no tin awa, i nos alma a haña asco dje pan despreciabel,’ ” esta, e mana cu a ser percurá di un manera milagroso. (Númeronan 21:4, 5) Djis imaginá bo! E israelitanan ei a “sigui papia contra Dios,” yamando su percuracionnan despreciabel!

¹² Dor di nan kehamentu, e israelitanan tabata poniendo e pacenshi di Jehova na prueba. Castigu no a keda sin bini, pasobra Jehova a manda colebranan venenoso entre nan, i hopi a muri di mordé di colebra. Despues cu e pueblo a repentí i Moises a intermediá na nan fabor, a bini un fin n’e plaga. (Númeronan 21:6-9) Siguramente e incidente aki mester sirbi como un spiertamentu pa nos no manifestá un spiritu rebelde i kehoso, specialmente contra Dios i su areglonan teocrático.

Spiertamentu Contra Murmuramentu

13. Contra kico 1 Corintionan 10:10 ta spierta, i ki rebelion Pablo tabatin na mente?

¹³ Citando su ehempel final cu a enbolbé e israelitanan den e desierto, Pablo ta skirbi: “Ni laga nos ta murmurador, net manera algun di nan a murmurá, pa solamente perecé bou dje destructor.” (1 Corintionan 10:10) Rebelion a lanta cabes ora Core, Datan i Abiram i nan socionan a actua contra ordu teocrático i a desafiá e autoridad di Moises i Aron. (Númeronan 16:1-3) Despues dje destruccion dje rebeldenan, e israelitanan a cuminsá murmurá. Esaki tabata debí cu nan a cuminsá razoná cu e destruccion dje rebeldenan tabata inhustu. Númeronan 16:41 ta declará: “E siguiente dia mes henter e asamblea dje yunan di Israel a cuminsá murmurá contra Moises i Aron, bisando: ‘Boso a mata e pueblo di Jehova.’ ” Como resultado di criticá e manera cu husticia a ser administrá n’e ocasion ei, 14.700 israelita a perecé di un calamidad cu Dios a manda.—Númeronan 16:49.

14, 15. (a) Kico tabata un dje picánan dje “hombernan malbado” cu a slip drenta e congregacion? (b) Kico nos por siña for dje incidente cu a enbolbé Core?

¹⁴ Den e promé siglo E.C., “hombernan malbado” cu a slip drenta den e congregacion cristian a resultá di ta maestronan falsu i tambe murmuradornan. E hombernan aki no tabata ‘haci caso di autoridad i tabata papia ofensivamente di esnan glorioso,’ hombernan ungí cu e tempu ei tabata encargá cu e supervision spiritual dje congregacion. En cuanto e apóstatanan malbado, disipel Hudas a bisa tambe: “E hombernan aki ta murmuradornan, kehoso tocante nan suerte den bida, andando segun nan mes deseonan.” (Hudas 3, 4, 8, 16) Awe, algun individuo ta bira murmurador pa motibu cu nan ta permití un actitud spiritual cu ta causa frusamentu desaroyá den nan curason. Hopi biaha nan ta concentrá riba e imperfeccionnan di esnan cu ta den posicion di supervision den e congregacion i ta cuminsá murmurá contra nan. Nan murmuramentu i kehamentu por asta yega asina leu cu nan ta bai criticá e publicacionnan dje “esclabo fiel.”

¹⁵ Ta apropiado pa haci pregunta sincero tocante un tema bíblico. Pero kico si nos desaroyá un actitud negativo cu a manifestá su mes den discusionnan crítico den un círculo íntimo di amigu? Nos lo haci bon di puntra nos mes, ‘Probablemente unda e murmuramentu aki lo bai para? Lo no ta muchu mas mihó pa stop di murmurá i humildemente pidi pa sabiduria den oracion?’ (Santiago 1:5-8; Hudas 17-21) Core i su apoyadornan, kendenan a rebelá contra e autoridad di Moises i Aron, por tabata asina convencí cu nan punto di bista tabata válido cu nan no a examiná nan motivacionnan. No obstante, nan tabata completamente robes. Esei tabata e caso tambe cu e israelitanan cu a murmurá tocante e destruccion di Core i e otro rebeldenan. Ta ki sabí pa laga ehempelnan asina impulsá nos pa examiná nos motivacionnan, core cu murmuramentu of kehamentu, i permití Jehova refiná nos!—Salmo 17:1-3.

Siña i Disfrutá dje Bendicionnan

16. Kico ta e esencia dje exhortacion na 1 Corintionan 10:11, 12?

¹⁶ Bou di inspiracion divino, Pablo ta concluí e lista di mensahenan spiertador cu e exhortacion: “Awor e cosnan aki a sigui sosodé nan como ehempel, i nan a ser skirbí como spiertamentu pa nos riba ken e fin dje sistema di cosnan a yega. P’esei laga esun cu ta kere cu e ta pará tene cuidou p’e no cai.” (1 Corintionan 10:11, 12) Laga nos no balotá nos posicion den e congregacion cristian.

17. Si nos ta sinti un motivacion inapropiado den nos curason, kico nos mester haci?

¹⁷ Mescos cu heru tin tendencia di frusa, asina nos como desendientenan di Adam pecaminoso a heredá un inclinacion pa cu maldad. (Génesis 8:21; Romanonan 5:12) P’esei, nos no mester desanimá si nos sinti un motivacion inapropiado den nos curason. En bes di esei, laga nos tuma accion decisivo. Ora heru ta exponé na aire húmedo of na un ambiente yen di substancia cu ta causa frusamentu, e ta frusa hopi mas lihé. Nos tin cu evitá di exponé nos n’e “aire” dje mundu di Satanas, cu su entretenimentu baho, inmoralidad extenso i inclinacion mental negativo.—Efesionan 2:1, 2.

18. Kico Jehova a haci relacioná cu e mal tendencianan di humanidad?

¹⁸ Jehova a percurá pa humanidad un medio pa contrarestá e mal tendencianan cu nos a heredá. El a duna su Yu unigénito pa esnan cu ehercé fe den dje por haña bida eterno. (Juan 3:16) Si nos sigui e pasonan di Cristo atentamente i manifestá un personalidad manera di Cristo, nos lo ta un bendicion pa otronan. (1 Pedro 2:21) Tambe nos lo ricibí, no maldicion, sino bendicionnan divino.

19. Con nos por saca beneficio for di un consideracion di ehempelnan bíblico?

¹⁹ Aunke nos awe tin e mésun inclinacion di faya cu e israelitanan di pasado tabatin, nos tin henter e Palabra skirbí di Dios pa guia nos. For di su páginanan nos ta siña tocante Jehova su tratonan cu humanidad i tambe su cualidadnan demostrá den e ehempel di Jesus, ‘e refleho dje gloria di Dios i e representacion exacto di Su ser mes.’ (Hebreonan 1:1-3; Juan 14:9, 10) Mediante oracion i studio diligente dje Scritura, nos por tin e “mente di Cristo.” (1 Corintionan 2:16) Ora nos haña nos confrontá cu tentacion i otro pruebanan di nos fe, nos por saca beneficio for di un consideracion di ehempelnan bíblico di antigwedad i specialmente e ehempel superlativo di Jesucristo. Si nos haci esei, nos lo no tin cu sufri e consecuencianan di maldicionnan divino. En bes di esei, nos lo disfrutá di Jehova su fabor awe i di su bendicionnan pa semper.

[Notas]

Con Lo Bo Contestá?

◻ Con nos por aplicá e conseho di Pablo pa no bira idólatra?

◻ Kico nos por haci pa tuma e spiertamentu dje apostel contra fornicacion na pechu?

◻ Pakico nos mester evitá murmuramentu i kehamentu?

◻ Con nos por ricibí bendicionnan divino, i no maldicion?

[Plachi na página 18]

Si nos kier haña bendicionnan divino, nos tin cu evitá idolatria

[Plachi na página 20]

Mescos cu mester eliminá frus, laga nos tuma accion positivo pa eliminá deseonan inapropiado for di nos curason