E Alma Ta Inmortal?

SILENCIOSAMENTE, amigu i famianan ta cana pasa dilanti e caha di morto habrí. Nan ta keda wak e curpa, ta di un mucha homber di 17 aña. Su amigunan di scol apénas ta reconoc’é. Kimoterapia a basha gran parti di su cabei abou; cancer a pon’é perde hopi peso. Realmente esaki por ta nan amigu? Djis un par di siman promé, e tabata asina yen di idea, di pregunta, di energia—di bida! E mucha homber su mama cu awa na wowo ta keda ripití: “Tommy ta mas felis awor. Dios tabata kier Tommy den shelu cerca dje.”

E mama aki cu su curason kibrá ta haña un midí di speransa i consuelo den e idea cu di un manera of otro su yu ta na bida ainda. Na misa el a ser siñá cu e alma ta inmortal, cu e ta e asiento di personalidad, pensamentunan, recuerdonan, o sea, bo mes persona. E mama ta kere cu e alma di su yu homber no a muri mes; ya cu e alma ta un ser spiritual bibiente, el a bandoná e yu su curpa ora el a muri i a bai shelu pa ta cerca Dios i e angelnan.

Den tempu di tragedia, e curason humano ta pega desesperadamente na cualkier rayo di speransa, pues no ta difícil pa mira pakico e creencia aki ta asina atractivo. Tuma, por ehempel, e manera cu e teólogo J. Paterson-Smyth ta expresá su mes den The Gospel of the Hereafter (E Evangelio dje Mas Ayá): “Morto ta algu masha chikitu na comparacion cu loke ta bini despues di dje—e mundu maraviyoso, maraviyoso, maraviyoso mes na cua Morto ta hiba nos.”

Rond mundu i den hopi religion i cultura, ta existí e creencia cu hende tin den dje un alma cu no ta muri, un spiritu conciente cu ta sigui biba despues cu e curpa muri. E creencia ta casi universal den e miles di religion i sectanan di cristiandad. E ta un doctrina oficial di hudaismo tambe. Hindúnan ta kere cu e atman, of alma, a ser creá na principio di tempu, a ser encarcelá den e curpa n’e momento di nacementu i cu na ora di morto e ta pasa pa un otro curpa den un ciclo continuo di reencarnacion. Moslimnan ta kere cu e alma ta bini na existencia n’e ora di nacementu i ta sigui biba despues cu e curpa muri. Otro religionnan—e animista africano, e shinto, asta e budista den un sentido—ta siña variantenan dje mésun tema aki.

Algun Pregunta Perturbante

Aunke e concepto di un alma inmortal tin un atraccion innegabel i casi universal, no obstante e ta lanta algun pregunta perturbante. Por ehempel, hende ta puntra nan mes unda e alma di un stimá ta bai si e persona ei no a hiba un bida ehemplar. Lo e ser reencarná como un forma di bida inferior? Of e ta ser mandá purgatorio, caminda lo e ser limpiá dor di un proceso di candela te ora cu e ta ser hañá digno di bai shelu? Pió ainda, lo e tin cu ser torturá pa semper den un fiernu di candela? Of e ta, manera hopi religion animista ta siña, un spiritu cu nan mester calma?

Conceptonan asina ta crea expectativanan pisá pa esnan na bida. Nos tin cu calma e spiritunan di nos stimánan morto pa miedu cu nan lo trece vengansa riba nos? Nos supuestamente tin cu yuda nan sali for di un teribel purgatorio? Of simplemente nos tin cu tembla den horor n’e idea cu nan ta sufriendo den fiernu sin cu nos por yuda nan? Of nos tin cu trata algun animal bibiente como si fuera ta nan ta carga e alma di hende defuntu den nan?

E preguntanan cu ta lanta relacioná cu Dios mes tambe ta inkietante. Por ehempel, hopi mayor, manera e mama mencioná na principio, na promé instante ta ser consolá cu e idea di cu Dios “a tuma” nan yu su alma inmortal na shelu pa ta cerca dje. Sin embargo, pronto hopi mayor ta cuminsá puntra nan mes ki clase di Dios lo causa un malesa teribel riba un mucha inocente, rancando e yu precioso ei for di mayornan cu curason kibrá simplemente pa hiba e yu shelu promé cu tempu. Unda e husticia, e amor, e misericordia, den un Dios asina a keda? Algun hende asta ta cuestioná e sabiduria di un Dios asina. Nan ta puntra, Pakico un Dios sabí ta pone tur e almanan aki riba tera promé, si nan tur al final lo tin cu bai biba den shelu di tur manera? Esei no kier men cu e creacion dje tera tabata realmente un esfuerso pornada?—Compará cu Deuteronomio 32:4; Salmo 103:8; Isaías 45:18; 1 Juan 4:8.

Claramente, anto, e doctrina di inmortalidad dje alma humano, sea cual sea e forma cu e doctrina ta ser siñá, ta lanta preguntanan cu ta confundí, asta inconsistencianan. Con bini? Gran parti dje problema ta bai bek n’e orígen dje siñansa aki. Kisas lo bo hañ’é iluminador pa explorá e raisnan aki brevemente; i tal bes bo ta keda sorprendí pa haña sa loke Bijbel mes ta bisa tocante e alma. E ta ofrecé un speransa hopi mas mihó pa bida despues di morto cu loke e religionnan di mundu generalmente ta siña.