Pregunta di Lector

Lo ta sabí pa un cristian consultá un dokter di salú mental?

Informenan for di algun pais ta indicá cu tabatin un aumento den enfermedadnan emocional i mental den e “último dianan” aki. (2 Timoteo 3:1) Cristiannan ta sinti compasion profundo ora compañeronan creyente ta ser afectá, pero nan ta reconocé cu cada persona mester dicidí pa su mes si e mester busca tratamentu pa su enfermedad i, si ta asina, ki clase di tratamentu.a “Cada un lo hiba su mes carga di responsabilidad.” (Galationan 6:5) Tabata posibel pa algun hende, sufriendo gravemente di eskisofrenia, mania depresivo, depresion clínico profundo, trastorno di comportacion obsesivo i compulsivo, mutilacion-propio, i otro trastornonan angustioso, hiba un bida relativamente normal despues di obtené e yudansa profesional corecto.

Den algun lugá a bira bastante popular pa busca terapia. Den hopi caso e pashent no tin un trastorno mental severo sino tin dificultad pa enfrentá cierto situacionnan den bida. Sin embargo, ta Bijbel ta duna e yudansa di mas eficas pa trata cu e problemanan difícil di bida. (Salmo 119:28, 143) Mediante Bijbel, Jehova ta suministrá sabiduria, abilidad di pensa i conocimentu berdadero—cosnan cu ta fortificá nos mentalmente i emocionalmente. (Proverbionan 2:1-11; Hebreonan 13:6) Sirbidornan fiel di Dios tin biaha por expresá nan mes di un manera iracional debí na confusion interno severo. (Job 6:2, 3) Santiago 5:13-16 ta animá personanan asina pa acudí n’e ancianonan pa yudansa i conseho. Un cristian por ta spiritualmente malu, of e por ta afligí dor di un circunstancia incambiabel of dor di tensionnan opresivo, of tal bes e ta sinti cu e ta víctima di inhusticia. (Eclesiástes 7:7; Isaías 32:2; 2 Corintionan 12:7-10) Un persona asina por haña yudansa cerca e ancianonan, kendenan lo ‘hunt’é cu zeta’—esta, ábilmente lo dun’é conseho bíblico consolador—i tambe “haci oracion riba dje.” E resultado? “E oracion di fe lo sana esun enfermo, i Jehova lo lant’é [for di su estado di desanimacion of for di su sintimentu di a ser bandoná dor di Dios].”

Sin embargo, kico si un persona su angustia i confusion mental ta persistí apesar dje yudansa ábil di wardadornan spiritual? Algun persona den e situacion aki a scoge pa someté nan mes na un examinacion físico cabal. (Compará cu Proverbionan 14:30; 16:24; 1 Corintionan 12:26.) Un problema físico por ta e causa dje angustia emocional of mental. Tratando un problema asina den algun caso a duna alivio n’e persona emocionalmente enfermo.b Si no por haña ningun problema físico, e dokter, riba peticion, por recomendá un profesional di salú mental. Kico bo mester haci e ora ei? Manera a ser bisá, esaki ta un decision cu cada persona mester evaluá pa su mes. Otronan no mag di criticá of husga.—Romanonan 14:4.

No obstante, mester ehercé sabiduria práctico i tene cuidou pa no lubidá principionan bíblico. (Proverbionan 3:21; Eclesiástes 12:13) Den e caso di malesa físico, pashentnan ta confrontá un variedad di opcion den tratamentu, for di medicina convencional te na medicina alternativo cu terapianan manera naturopatia, acupuntura i homeopatia. Tambe tin diferente clase di dokter di salú mental. Entre nan tin sicoterapeutanan analítico i otronan, cu tal bes ta bai coba den un pashent su historia personal pa trata na haña motibunan pa comportacion iregular of pa emocionnan doloroso. Sicoterapeutanan di comportacion tal bes ta purba yuda e pashent siña patronchinan nobo di comportacion. Algun dokter di salú mental ta kere cu mayoria enfermedad mental mester ser tratá cu remedi.c Segun informe, otronan ta recomendá dieta i vitamina.

Pashentnan i nan famia mester ta cauteloso ora di tuma e opcionnan aki na consideracion. (Proverbionan 14:15) Ta significativo cu Profesor Paul McHugh, director dje Departamento di Sicatria i Ciencianan di Comportacion na e Johns Hopkins University School of Medicine, a bisa cu e profesion di salú mental “ta un arte médico cu no ta completamente desaroyá. No ta fácil pa obtené prueba pa e diagnósticonan i tratamentunan cu e ta proponé asta ora e ta trata cu trastornonan dje elementonan mas complicá di bida humano—mente i comportacion.” E situacion aki ta laga porta habrí pa tratamentunan eccéntrico i fraudulento, i tambe pa tratamentunan bon intencioná pero cu ta haci mas daño cu bon.

Tambe, nos mester mencioná cu, aunke sikiatranan i sicólogonan tin diplomanan di estudio profesional avansá, hopi otronan cu ningun clase di cualificacion profesional ta traha sin supervision como consehero of terapeuta. Algun persona a gasta un cantidad di placa consultando hendenan no-cualificá asina.

Asta cu un profesional di salú mental, entrená i cualificá, tin cosnan cu tin cu tuma na cuenta. Ora di scoge un dokter of ciruhano, nos mester ta sigur cu lo e respetá nos puntonan di bista basá riba Bijbel. Di igual manera, lo ta peligroso pa consultá un profesional di salú mental cu no ta respetá nos puntonan di bista religioso i moral. Hopi cristian ta haciendo hopi esfuerso, apesar di problemanan mental i emocional, pa tin “e mésun actitud mental cu Cristo Jesus tabatin.” (Romanonan 15:5) Cristiannan asina corectamente ta preocupá tocante e actitudnan di ken cu por afectá nan pensamentu of comportacion. Algun dokter ta considerá cualkier restriccion cu ta ser imponé dor di creencianan bíblico como innecesario i potencialmente perhudicial pa salú mental. Tal bes nan ta aprobá, asta recomendá, prácticanan cu ta ser condená den Bijbel, manera homosexualidad of infieldad matrimonial.

E ideanan aki ta ser incluí den loke apostel Pablo a yama “e contradiccionnan di loke falsamente ta ser yamá ‘conocimentu.’” (1 Timoteo 6:20) Nan ta contradicí e berdad tocante Cristo i ta parti dje “filosofia i engaño bano” dje mundu aki. (Colosensenan 2:8) E norma bíblico ta cla: “No tin ningun sabiduria, ni ningun dicernimentu, ni ningun conseho den oposicion na Jehova.” (Proverbionan 21:30) Dokternan di salú mental cu ta bisa “bon ta malu i malu ta bon” ta “mal asociacion.” En bes di yuda cura mentenan instabil, nan lo “daña custumbernan útil.”—Isaías 5:20; 1 Corintionan 15:33.

Pues un cristian cu ta sinti cu ta necesario pa consultá un profesional di salú mental mester scudriñá e dokter su cualificacionnan, actitud i reputacion, i e posibel efecto di cualkier tratamentu cu ser recomendá. Si un cristian afligí no por haci esei e mes, kisas un amigu of pariente íntimo i maduro lo por yuda. Un cristian cu no ta sigur si un tratamentu en particular ta sabí por haña cu papiando cu e ancianonan den e congregacion ta útil—aunke e decision final ta keda na dje (of na su mayornan, of ta e decision combiná di esposo i esposa).d

Awe ciencia por haci hopi mas cu den tempu di pasado pa aliviá sufrimentu. Tog, tin hopi malesa—tantu físico como mental—cu actualmente ta incurabel i cu hende mester soportá atrabes dje sistema di cosnan aki. (Santiago 5:11) Miéntras tantu “e esclabo fiel i discreto,” e ancianonan i tur otro ruman den e congregacion ta saca un man di compasion i sosten pa cu esnan enfermo. I Jehova mes ta fortalecé nan pa wanta te cu e tempu glorioso, ora lo no tin enfermedad mas.—Mateo 24:45; Salmo 41:1-3; Isaías 33:24.

[Nota]