Rey Sálomon Su Rikesa Ta Ser Exagerá?

“E peso dje oro cu a bini na Sálomon den un aña a suma te na seishent’i sesenta i seis talento.”—1 Reynan 10:14.

SEGUN e versículo ei di Bijbel, Rey Sálomon a adkerí mas cu 25 ton di oro den un solo aña! Awe esei lo tabatin e balor di US$240.000.000. Esei ta casi dobel e cantidad di oro cu a ser sacá for di minanan rond mundu na aña 1800. Esaki ta posibel? Kico evidencia arkeológico ta mustra? E ta indicá cu nos siguramente por kere e Bijbel su registro dje rikesa di Sálomon. Biblical Archaeology Review ta bisa:

◻ Rey Thutmose III di Egipto (segundo milenio P.E.C.) a presentá aproximadamente 13,5 ton di artículonan di oro n’e tempel di Amon-Ra, e dios di solo, na Karnak—i esaki tabata solamente parti dje regalo.

◻ Inscripcionnan egipcio ta registrá regalonan cu a yega un total di aproximadamente 383 ton di oro i plata cu Rey Osorkon I (na comienso di promé milenio P.E.C.) a ofrecé n’e diosnan.

Ademas, e volúmen Classical Greece dje seri Great Ages of Man ta informá:

◻ E minanan di Pangaeum na Trace a producí mas cu 37 ton di oro tur aña pa Rey Felipe II (359-336 P.E.C.).

◻ Ora Felipe su yu homber Alexander de Grote (336-323 P.E.C.) a capturá Susa, e capital dje imperio di Persia, tesoronan sumando na hopi mas cu 1.000 ton di oro a ser hañá.—The New Encyclopædia Britannica.

Pues e Bijbel su descripcion dje rikesa di Rey Sálomon no ta improbabel. Corda, tambe, cu Sálomon tabata “mas grandi den rikesa i sabiduria cu tur e otro reynan dje tera” n’e tempu ei.—1 Reynan 10:23.

Con Sálomon a usa su rikesa? Su trono a ser furá cu “oro refiná,” su basonan pa bebe aden tabata “di oro,” i e tabatin 200 escudo grandi i 300 escudo chikitu di “oro ligá.” (1 Reynan 10:16-21) Mas cu tur cos, Sálomon su oro a ser usá en coneccion cu e tempel di Jehova na Jerusalem. E candelarianan di tempel i hermentnan sagrado, manera forki, conchi, canica i poncheranan, tabata trahá di oro i plata. E kerubinnan di 4,5 meter haltu den e Santísimo, e altar di censia, i asta henter e paden dje cas a ser furá cu oro.—1 Reynan 6:20-22; 7:48-50; 1 Crónicanan 28:17.

Ki tal di un tempel enchapá cu oro? Ta interesante cu tal uso di oro di ningun manera tabata inusual den e mundu antiguo. Biblical Archaeology Review ta remarcá cu Aménofis III di Egipto “a onra e gran dios Amun cu un tempel na Tebes cu tabata ‘completamente enchapá cu oro, su flur dorná cu plata, [i] tur su entradanan cu electro’”—un ligacion di oro cu plata. Ademas, Esar-haddon di Asiria (siglo shete P.E.C.) a enchapá e portanan i a fura e murayanan dje altar di Ashur cu oro. Relacioná cu e tempel di Sin, e dios di luna, na Haran, Nabonido di Babilonia (siglo seis P.E.C.) a registrá: “Mi a cubri su murayanan cu oro i plata, i a laga nan lombra manera solo.”

Pues, registronan histórico ta indicá cu e relato bíblico dje rikesa di Rey Sálomon no ta exagerá.