E Evangelio Segun Eruditonan

“KEN e multitudnan ta bisa cu mi ta?” (Lucas 9:18) Jesus a haci su disipelnan e pregunta aki casi dos mil aña pasá. E pregunta tabata controversial e tempu ei. E ta parce di ta asta mas controversial awor, specialmente rond dje temporada di Pascu, cu supuestamente ta enfocá riba Jesus. Hopi hende ta kere cu Jesus a ser mandá for di shelu pa rescatá humanidad. Esei ta loke abo ta kere?

Algun erudito ta proponé un otro punto di bista. “E imágen di Jesus como un hende cu a siña otronan cu e tabata e Yu di Dios cu mester a muri p’e picánan di mundu no ta históricamente cierto,” Marcus J. Borg, profesor di religion i cultura, ta afirmá.

Otro eruditonan ta afirmá cu e berdadero Jesus tabata diferente for di esun cu nos ta lesa di dje den Bijbel. Algun ta kere cu tur e Evangelionan a ser skirbí cuater década of mas despues di Jesus su morto i cu pa e tempu ei Jesus su berdadero identidad a ser hací mas atractivo. E problema no tabata cu e memoria dje escritornan di Evangelio, segun e eruditonan, sino cu nan interpretacion. Despues di Jesus su morto e disipelnan a cuminsá mir’é den un manera diferente—como e Yu di Dios, Salbador i Mesías. Algun ta tuma e tribilidad di pretendé cu Jesus no tabata mas cu un sabio ambulante, un revolucionario social. Segun e eruditonan, esei ta e berdad dje evangelio.

E Punto di Bista “Erudito” di Jesus

Pa defendé nan punto di bista “erudito,” críticonan ta parce di ta ansioso pa descartá cualkier cos tocante Jesus cu ta parce sobrenatural. Por ehempel, algun ta bisa cu e nacementu bírgen tabata pa tapa e echo cu Jesus tabata un yu ilegítimo. Otronan ta rechasá Jesus su profecianan relacioná cu e destruccion di Jerusalem, insistiendo cu esakinan a ser incluí den e Evangelionan despues di nan “cumplimentu.” Algun asta ta bisa cu Jesus su curacionnan tabata puramente sicosomático. Bo ta haña e opinionnan ei cierto of absurdo?

Cierto eruditonan asta ta pretendé cu e disipelnan di Jesus a inventá e resureccion pa prevení nan movementu di cai den otro. Al fin i al cabo, e eruditonan ta razoná, Jesus su siguidornan tabata impotente sin dje, pues nan a inventá historia den nan skirbimentunan pa restorá e papel prominente di Jesus. E eruditonan ta bisando básicamente cu ta cristianismo, no Cristo, a ser resucitá. Si esei ta parce cu eruditonan ta tuma cierto libertadnan, no ta asta mas extremo p’e teólogo Barbara Thiering declará cu Jesus no a ser ehecutá mes? E ta kere cu Jesus a sobrebibí ora el a ser clabá na staca i a sigui biba pa casa dos biaha i haña tres yu.

Tur e afirmacionnan aki ta rebahá Jesus n’e único plano riba cua hopi erudito lo acept’é: esun di un homber sabí, un persona na rand dje sociedad hudiu, un reformador social—cualkier cos excepto e Yu di Dios, kende a bini “pa duna su alma como rescate en cambio pa hopi.”—Mateo 20:28.

Tal bes rond dje tempu di aña aki, bo a lesa partinan dje Evangelionan, manera e parti tocante Jesus su nacementu den un pesebre. Of bo por a tende e relatonan ei den misa. Bo a aceptá e relatonan di Evangelio como balioso i creibel? Anto tuma nota dje situacion escandaloso aki. Den un asina yamá Seminario di Jesus, un grupo di erudito a reuní dos bes pa aña desde 1985 pa determiná e autenticidad di Jesus su palabranan. Jesus realmente a bisa loke Bijbel ta atribuí na dje? Miembronan dje seminario a vota riba cada dicho di Jesus cu kralchinan di color. Un kralchi corá a nificá cu un declaracion tabata siguramente algu cu Jesus a papia; un kralchi ros a nificá cu Jesus probablemente a bis’é; un kralchi shinishi a nificá duda; i un kralchi pretu a indicá falsificacion.

Lo bo keda perturbá pa haña sa cu e Seminario di Jesus a declará cu 82 porciento dje palabranan atribuí na Jesus probablemente no a ser expresá dor di dje. Solamente un cita for dje Evangelio di Marco a ser considerá fidedigno. Dje Evangelio di Lucas nan a bisa cu e tin asina tantu propaganda cu “e original no por ser recuperá mas.” Henter e Evangelio di Juan cu excepcion di tres frase a haña e kralchi pretu, indicando falsificacion, i e tres frasenan ei mes a ricibí e kralchi shinishi di duda.

Mas cu Speculacion

Bo ta di acuerdo cu e eruditonan? Nan ta dunando nos un representacion mas exacto di Jesus cu esun cu nos ta haña den Bijbel? E preguntanan aki ta mas cu un asuntu di debate pa eruditonan. N’e tempu di aña aki, bo por ser recordá cu, segun Bijbel, Dios a manda Jesus “pa tur cu ehercé fe den dje no sea destruí sino haña bida eterno.”—Juan 3:16.

Si Jesus no tabata mas cu un sabio ambulante di ken kisas nos sa masha poco, lo no tin sentido pa ‘ehercé fe’ den dje. Di otro banda, si Bijbel su representacion di Jesus ta verídico, nos salbacion eterno ta enbolbí. P’esei, nos tin cu sa—Bijbel ta contené e berdad tocante Jesus?