Siñá pa Haci e Boluntad di Jehova
“Siñá mi haci bo boluntad, pasobra abo ta mi Dios.”—SALMO 143:10.
1, 2. (a) Na ki tempu nos mester ser siñá, i cu ki punto di bista realístico? (b) Pakico ta asina vital pa ser siñá pa Jehova?
TUR dia cu un persona ta na bida i activo, e por ser siñá algu cu ta bale la pena. Esei ta cierto den bo caso, i e ta cierto cerca otronan tambe. Pero kico ta sosodé ora un hende muri? No ta posibel pa ser siñá ni pa siña nada den e condicion ei. Bijbel ta bisa claramente cu e mortonan “no ta conciente di nada en absoluto.” No tin conocimentu den Sheol, e graf comun di humanidad. (Eclesiástes 9:5, 10) Esaki ta nificá cu e echo cu nos ta ser siñá, acumulando conocimentu, ta en bano? Esei ta dependé di kico nos ta ser siñá i con nos ta usa e conocimentu ei.
2 Si nos ta ser siñá solamente loke ta mundano, nos no tin ningun futuro duradero. Sin embargo, afortunadamente miyones di hende den tur nacion ta ser siñá e boluntad divino cu mira riba bida eterno. E base p’e speransa aki ta sinta den ser siñá pa Jehova, e Fuente di conocimentu dunador di bida.—Salmo 94:9-12.
3. (a) Pakico nos por bisa cu Jesus tabata e promé alumno di Dios? (b) Ki siguransa nos tin cu hende lo a ser siñá pa Jehova, i cu ki resultado?
3 E Yu primogénito di Dios, como Su promé alumno, a ser siñá pa haci e boluntad di su Tata. (Proverbionan 8:22-30; Juan 8:28) En buelta, Jesus a indicá cu gran cantidad di hende lo a ser siñá pa su Tata. Kico ta e prospectonan pa nos cu ta siña for di Dios. Jesus a bisa: “Ta pará skirbí den e Profetanan, ‘I nan tur lo ser siñá pa Jehova.’ Tur hende cu a tende for dje Tata i a siña ta bini cerca mi. . . . Cu mayor berdad mi ta bisa boso, Esun cu kere tin bida eterno.”—Juan 6:45-47.
4. Con miyones di hende ta ser afectá pa siñansa divino, i ki prospecto nan tin?
4 Jesus tabata citando for di Isaías 54:13, cu a ser dirigí n’e muher simbólico di Dios, Síon celestial. E profecia ei tin un aplicacion particular na su yunan, e 144.000 disipelnan di Jesucristo ungí cu spiritu. Un resto di e yunan spiritual ei ta activo awe, hibando delantera den un programa mundial di siñamentu. Como resultado, miyones di otro hende cu ta forma “un multitud grandi” tambe ta beneficiá di ser siñá pa Jehova. Nan tin e prospecto único di siña sin cu morto ta interumpí e proceso. Con asina? Wel, nan ta den fila pa sobrebibí e “tribulacion grandi” cu ta acercando rápidamente i disfrutá di bida eterno den un paradijs riba tera.—Revelacion 7:9, 10, 13-17.
Mayor Enfasis Riba Haci e Boluntad di Dios
5. (a) Kico ta e texto di aña pa 1997? (b) Con nos mester sinti tocante asistencia na reunionnan cristian?
5 Durante 1997, den mas cu 80.000 congregacion rond mundu, Testigonan di Jehova lo tene mashá na mente e palabranan di introduccion di Salmo 143:10: “Siñá mi haci bo boluntad.” Esei lo ta e texto di aña pa 1997. E palabranan ei, exhibí den un manera bisto den Salonnan di Reino, lo sirbi como un recordatorio cu un lugá sobresaliente pa ricibí educacion divino ta na reunionnan di congregacion, unda nos por participá den un programa continuo di instruccion. Ora nos uni cu nos rumannan na reunionnan pa ser siñá dor di nos Magnífico Instructor, nos por sinti mescos cu e salmista, kende a skirbi: “Mi a alegrá ora nan tabata bisá mi: ‘Laga nos ban n’e cas di Jehova.’ ”—Salmo 122:1; Isaías 30:20.
6. Den e palabranan di David, kico nos ta reconocé?
6 Sí, nos ta deseá pa ser siñá pa haci e boluntad di Dios mas bien cu e boluntad di nos adversario e Diabel of e boluntad di hende imperfecto. Pues, mescos cu David, nos ta duna reconocimentu n’e Dios kende nos ta adorá i sirbi: “Pasobra abo ta mi Dios. Bo spiritu ta bon; lagu’é guiá mi den e tera di rectitud.” (Salmo 143:10) En bes di deseá di asociá cu hendenan di falsedad, David a preferá di ta caminda hende tabata adorá Jehova. (Salmo 26:4-6) Cu e spiritu di Dios pa dirigí su pasonan, David por a cana den e camindanan di husticia.—Salmo 17:5; 23:3.
7. Con e spiritu di Dios a obra riba e congregacion cristian?
7 E David Mayor, Jesucristo, a sigurá e apostelnan cu e spiritu santu lo a siña nan tur cos i recordá nan tur e cosnan cu el a bisa nan. (Juan 14:26) For di Pentecoste padilanti, Jehova ta revelando progresivamente “e cosnan profundo di Dios” cu su Palabra skirbí ta contené. (1 Corintionan 2:10-13) El a haci esaki atrabes di un canal visibel cu Jesus a yama “e esclabo fiel i discreto.” E ta percurá alimento spiritual cu ta ser considerá den e programa di siñamentu pa congregacionnan dje pueblo di Dios rond mundu.—Mateo 24:45-47.
Siñá e Boluntad di Jehova na Nos Reunionnan
8. Pakico participacion den e Studio di Toren di Vigilancia ta asina balioso?
8 E material den e congregacion su Studio semanal di Toren di Vigilancia ta trata frecuentemente cu aplicacion di principionan bíblico. Esaki siguramente ta yuda nos enfrentá e ansiedadnan di bida. Den otro studionan, berdadnan spiritual profundo of profecianan di Bijbel ta ser considerá. Ki hopi nos ta ser siñá durante e studionan ei! Den hopi pais Salonnan di Reino ta completamente yen p’e reunionnan aki. Sin embargo, den un cantidad di pais, asistencia na reunionnan a baha. Pakico bo ta kere? Por ta cu algun ta permitiendo trabou seglar interferí cu nan reunimentu huntu regularmente “pa incitá otro na amor i na obranan excelente”? Of por ta nan ta dedicando hopi ora na actividadnan social of na wakmentu di television, haciendo nan programa parce muchu ocupá pa bishitá tur e reunionnan? Corda e mandamentu inspirá na Hebreonan 10:23-25. Reunimentu huntu pa instruccion divino no ta asta mas importante awor segun cu nos ta “contemplá e dia yegando cerca”?
9. (a) Con e Reunion di Sirbishi por ekipá nos p’e ministerio? (b) Kico mester ta nos actitud pa cu dunamentu di testimonio?
9 Un di nos responsabilidadnan mas principal ta esun di sirbi como minister di Dios. E Reunion di Sirbishi ta diseñá pa siña nos con nos por cumpli cu esaki eficasmente. Nos ta siña con pa acercá hende, kico pa bisa, con pa reaccioná ora tin un reaccion faborabel i asta kico pa haci ora hende ta rechasá nos mensahe. (Lucas 10:1-11) Segun cu métodonan eficas ta ser considerá i demostrá den e reunion semanal aki, nos ta mihó prepará pa yega n’e curason dje hendenan no solamente ora nos ta bai di cas pa cas sino tambe ora nos ta predicá riba caya, na lugánan di parkeer, den transporte público, na aeropuertonan, den negoshinan, of na scolnan. Na armonia cu nos peticion “Siñá mi haci bo boluntad,” nos lo kier probechá di tur oportunidad pa haci manera nos Doño a urgi: “Laga boso lus briya dilanti hende, pa nan por . . . duna gloria na boso Tata cu ta den shelu.”—Mateo 5:16.
10. Con nos berdaderamente por yuda ‘esnan merecedor’?
10 N’e reunionnan di congregacion ei, tambe nos ta ser siñá pa haci disipel. Una bes nos haña un persona interesá of laga literatura, nos meta ora di haci rebishita ta pa cuminsá studionan di Bijbel. Den un sentido, esaki ta mescos cu ora e disipelnan mester a ‘keda cu esnan merecedor’ pa siña nan e cosnan cu Jesus a manda. (Mateo 10:11; 28:19, 20) Teniendo yudansanan excelente, manera e buki Conocimentu cu Ta Hiba na Bida Eterno, nos realmente ta bon ekipá pa cumpli cu nos ministerio cabalmente. (2 Timoteo 4:5) Segun cu bo ta asistí n’e Reunion di Sirbishi i n’e Scol di Ministerio Teocrático tur siman, trata di capta i despues usa puntonan práctico cu lo recomendá bo como un di Dios su ministernan adecuadamente cualificá, cumpliendo cu su boluntad.—2 Corintionan 3:3, 5; 4:1, 2.
11. Con algun ruman a demostrá fe den e palabranan hañá na Mateo 6:33?
11 Ta e boluntad di Dios pa nos “sigui busca . . . promé e reino i su husticia.” (Mateo 6:33) Puntra bo mes, ‘Con lo mi aplicá e principio aki si exigencianan di mi trabou seglar [of esun di mi casá] ta interferí cu mi asistencia na reunion?’ Hopi ruman spiritualmente maduro lo cuminsá na papia cu nan doño di trabou tocante e asuntu. Un minister di tempu completo a laga su doño di trabou sa cu e tabatin mester di tempu liber tur siman afin di asistí na reunionnan di congregacion. E doño di trabou a bai eens cu e peticion. Pero siendo curioso tocante kico ta tuma lugá n’e reunionnan, el a puntra si e por a asistí. Ei el a tende un anuncio tocante un binidero congreso di districto. Como resultado, e doño di trabou a haci areglo pa pasa henter un dia n’e congreso. Ki les bo ta saca for dje ehempel aki?
Siñá e Boluntad di Jehova dor di Mayornan Piadoso
12. Pa siña yunan e boluntad di Jehova, kico mayornan cristian mester haci cu pacenshi i firmesa?
12 Pero reunionnan di congregacion i congresonan no ta e único percuracion pa ser siñá pa haci e boluntad divino. Mayornan piadoso ta ser mandá pa entrená, disipliná i lanta nan yunan pa alabá Jehova i haci su boluntad. (Salmo 148:12, 13; Proverbionan 22:6, 15) Haciendo esaki ta rekerí pa nos hiba nos “yunan chikitu” na reunion unda nan por ‘scucha i siña,’ pero kico di siña nan for dje scritura santu na cas? (Deuteronomio 31:12; 2 Timoteo 3:15) Hopi famia di un manera conciencial a cuminsá cu programanan di studio di Bijbel regular como famia, pero pronto despues ta permití e studio di famia bira ménos frecuente of ta descontinu’é. Abo tabatin un experencia asina? Lo bo concluí cu e recomendacion pa tin un studio regular ta inapropiado of cu bo famia ta asina diferente cu esei simplemente lo no funcioná den bo caso? Sea cual sea e situacion, mayornan, por fabor, repasá e artículonan excelente “Nos Herencia Spiritual Ricu” i “E Recompensanan di Persistencia” den E Toren di Vigilancia di 1 di augustus, 1995.
13. Con famianan por saca beneficio for dje consideracion dje texto di dia?
13 Famianan ta ser animá pa haci e consideracion dje texto di dia for di Examinando e Scritura Diariamente un custumber. Djis lesa e texto i comentario ta bon, pero ta mas probechoso pa papia over dje texto i aplik’é. Por ehempel, si boso ta considerando Efesionan 5:15-17, miembronan di famia lo por razoná riba con pa ‘cumpra tempu oportuno’ pa studio personal, pa participá den algun forma dje ministerio di tempu completo, i pa percurá pa otro asignacionnan teocrático. Sí, un consideracion den famia dje texto di dia lo por hiba un of hopi persona na “sigui distinguí [mas plenamente] loke ta e boluntad di Jehova.”
14. Ki clase di maestro Deuteronomio 6:6, 7 ta indicá cu mayornan mester ta, exigiendo kico?
14 Mayornan mester ta maestronan diligente di nan yunan. (Deuteronomio 6:6, 7) Pero esei no ta simplemente un asuntu di reprendé of manda riba nan yunan. Tambe tata i mama tin cu scucha, den e manera ei birando mas capas pa sa kico mester ser splicá, clarificá, ilustrá of ripití. Den un cierto famia cristian, e mayornan ta stimulá comunicacion habrí dor di animá nan yunan pa haci pregunta tocante cosnan cu nan no ta comprendé of cu ta causa preocupacion. Dje manera ei nan a haña sa cu un yu homber tiener tabatin dificultad pa comprendé cu Jehova no tin un principio. E mayornan por a usa informacion for dje publicacionnan dje Sociedad Watch Tower cu ta mustra cu hende ta aceptá cu no tin fin na tempu i espacio. Esei a sirbi pa ilustrá e punto, i el a satisfacé nan yu. Pues saca tempu pa contestá e preguntanan di bo yunan claramente, yudando nan mira cu siñando pa haci e boluntad di Dios por ta masha satisfaciente. Kico mas e pueblo di Dios—hóben i bieu—ta ser siñá awe?
Siñá pa Stima i pa Lucha
15. Ki ora e autenticidad di nos amor fraternal por ser poní na prueba?
15 Na armonia cu e mandamentu nobo di Jesus, nos ta ser ‘siñá pa Dios pa stima otro.’ (1 Tesalonicensenan 4:9) Ora cosnan ta trankil i ta bai bon, nos por sinti cu nos en berdad ta stima tur nos rumannan. Sin embargo kico ta sosodé ora surgi desacuerdonan personal of nos keda ofendí pa loke un otro cristian ta bisa of haci? N’e punto aki e autenticidad di nos amor por ser poní na prueba. (Compará cu 2 Corintionan 8:8.) Kico Bijbel ta siña nos haci den situacionnan asina? Un cos ta pa trata na mustra amor den e sentido di mas completo. (1 Pedro 4:8) En bes di busca nos propio interesnan, bira provocá riba faltanan menor, of hiba cuenta di un daño, nos mester traha pa laga amor cubri un multitud di picá. (1 Corintionan 13:5) Nos sa cu esaki ta e boluntad di Dios, pasobra esei ta loke su Palabra ta siña nos.
16. (a) Den ki clase di guera cristiannan ta ser siñá pa tuma parti? (b) Con nos ta ser ekipá?
16 Aunke hopi hende lo no relacioná amor cu guera, e último ei ta un otro cos cu nos ta ser siñá, pero un clase distinto di guera. David a reconocé su dependencia riba Jehova pa siñ’é con pa hiba un guera, aunke den su tempu esei a incluí bataya literal contra e enemigunan di Israel. (1 Samuel 17:45-51; 19:8; 1 Reynan 5:3; Salmo 144:1) Kico di nos guera awe? Nos armanan no ta carnal. (2 Corintionan 10:4) Nos tin un guera spiritual, pa cua nos mester ta ekipá cu un armadura spiritual. (Efesionan 6:10-13) Mediante su Palabra i su pueblo congregá, Jehova ta siña nos pa bringa un guera spiritual exitoso.
17. (a) Ki tácticanan e Diabel ta usa pa desviá nos? (b) Kico nos mester evitá sabiamente?
17 Den maneranan engañoso i sutil, e Diabel hopi biaha ta usa tentacionnan dje mundu, apóstatanan i otro opositornan dje berdad den un esfuerso pa desviá nos na asuntunan no-importante. (1 Timoteo 6:3-5, 11; Tito 3:9-11) Ta como si fuera e ta mira cu e tin tiki chens di vence nos cu un atake directo i frontal, pues e ta purba pone nos trompecá riba cosnan cu constantemente ta iritá nos i cuestionnan bobo, cu no tin ningun balor spiritual. Como guereronan atento, nos mester ta mes alerto pa peligernan asina mescos cu nos ta pa cu atakenan frontal.—1 Timoteo 1:3, 4.
18. Kico no biba mas pa nos mes realmente ta enbolbé?
18 Nos no ta promové e deseonan di hende of e boluntad dje nacionnan. Jehova a siña nos mediante e ehempel di Jesus cu nos no mester biba mas pa nos mes; mas bien, nos mester ta armá cu e mésun disposicion mental cu Cristo Jesus tabatin i biba p’e boluntad di Dios. (2 Corintionan 5:14, 15) Den pasado, kisas nos a hiba un bida hopi extremo i di libertinahe, desperdiciando tempu precioso. Corementu di paranda, bebementu i inmoralidad ta caracterisá e mundu malbado aki. Awor cu nos ta ser siñá pa haci e boluntad di Dios, nos no ta gradicidu di ta separá for dje mundu corupto aki? Pues, laga nos bringa un lucha duru spiritualmente pa evitá di haña nos enbolbí cu custumbernan mundano contaminador.—1 Pedro 4:1-3.
Siñando Nos pa Beneficiá Nos Mes
19. Na ki beneficionan siñamentu dje boluntad di Jehova i despues hacié ta hiba?
19 Ta imperativo pa reconocé cu siendo siñá pa haci e boluntad di Jehova lo beneficiá nos masha tantu. Claro cu nos tin cu haci nos parti dor di presta sumo atencion pa nos por siña i despues sigui e instruccionnan cu ta bini na nos mediante su Yu i tambe mediante su Palabra i pueblo congregá. (Isaías 48:17, 18; Hebreonan 2:1) Dor di haci esei, nos lo ser fortificá pa para firme den e tempunan calamitoso aki i wanta e tempestadnan cu ta biniendo. (Mateo 7:24-27) Asta awor, nos lo agradá Dios dor di haci su boluntad i nos tin sigur cu nos oracionnan lo ser contestá. (Juan 9:31; 1 Juan 3:22) I nos lo experenciá berdadero felicidad.—Juan 13:17.
20. Riba kico lo ta bon pa meditá segun cu bo ta mira e texto di aña den transcurso di 1997?
20 Den transcurso di aña 1997, nos lo haña hopi oportunidad pa lesa i considerá e texto di aña, Salmo 143:10: “Siñá mi haci bo boluntad.” Segun cu nos ta haci esaki, laga nos usa algun dje ocasionnan pa refleccioná riba e percuracionnan cu Dios a haci pa nos ser siñá, manera e paragrafnan anterior a splica. I laga nos usa meditacion riba e palabranan ei como un estímulo pa actua consistentemente cu e súplica ei, sabiendo cu “esun cu ta haci e boluntad di Dios ta permanecé pa semper.”—1 Juan 2:17.
Con Lo Bo Contestá?
◻ Ken awe ta ser siñá pa haci e boluntad di Jehova?
◻ Con Salmo 143:10 mester afectá nos durante 1997?
◻ Con nos ta ser siñá pa haci e boluntad di Jehova?
◻ Kico ta ser rekerí di mayornan cristian ora di siña nan yunan?