Ken Ta Berdadero Mensaheronan di Pas?

DIA 31 di mei, 1996, fuentenan di noticia a proclamá loke a parce di ta un mensahe di pas. E dia anterior, un declaracion oficial a ser emití afirmando cu Benjamin Netanyahu, kende tabata na punto di bira promé minister di Israel, tabata “profundamente dedicá pa sigui cu e proceso di pas, pas cu siguridad, entre e estado di Israel i tur su bisiñanan, incluyendo e palestinonan.”

E publicidad amplio cu e eleccion di Netanyahu a ricibí a pone hopi hende puntra nan mes si pas na Medio Oriente lo por ta mas cu djis un soño. Si ta asina, otro nacionnan por imitá Israel dor di lubidá nan diferencianan?

Naturalmente, ta mas fácil pa primintí pas cu pa logr’é. Realisando esaki, hopi hende tabata sképtico. Manera e periodista Hemi Shalev a expres’é, “mitar dje poblacion na Israel awor ta cana rond cu un sintimentu cu reestablecimentu di pas ta cerca, i e otro mitar ta kere cu Israel ta atrapá den un fiernu riba tera.” Resumiendo, el a declará: “Algun ta alegrá; otronan ta yora.”

Asina ta pasa cu hende su intentonan pa producí pas. E victoria di un lider i su apoyadornan ta nificá derota pa e partido opositor. Insatisfaccion ta hiba na desilusion, i desilusion, hopi biaha ta hiba na rebelion. Sea na Medio Oriente, Latinoamérica, Oost Europa of cualkier otro caminda—esfuersonan humano pa producí pas ta asina un ilusion.

Berdadero Pas Ta Cerca!

Durante e tempu cu pas na Medio Oriente tabata un tópico hopi cayente den noticia, un otro mensahe di pas a ser tendé. Esaki no tabata un discurso político cu a ricibí hopi publicidad; ni e no tabata un tratado di pas entre nacionnan. Mas bien, e mensahe aki a proclamá un pas cu lo ser realisá solamente mediante e Reino di Dios. Unda e mensahe aki a ser tendé? Na mas cu 1.900 Congreso di Distrito “Mensaheronan di Pas Divino” cu Testigonan di Jehova a tene na tur parti di mundu durante 1996/97.

N’e congresonan aki a keda claramente establecí cu ningun gobiernu humano por trece berdadero pas i siguridad. Pakico? Pasobra esaki lo rekerí pone un fin n’e cosnan cu ta horta nos di pas riba un base diario. Berdadero pas ta nificá lanta tur mainta sin e menasa di guera of violencia. E ta nificá cu no tin crímen mas, cu no tin lok mas riba nos portanan, cu no tin miedu mas di cana riba caya, cu no tin famia kibrá mas. Cua gobiernu riba tera por cumpli cu tur esei? Realmente, cua gobiernu riba tera lo asta risca primintí esei?

Sin embargo, e Reino di Dios por i lo realisá e cosnan aki. Bijbel ta primintí: “Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i morto lo no t’ei mas, tampoco lo tin mas lamento ni sclamacion ni dolor. E cosnan anterior a pasa forbij.” (Revelacion 21:3, 4) Ki un alivio esei lo trece pa humanidad cu ta sufriendo!

E promesa di Jehova Dios no ta unu bano. Bijbel ta sigurá nos: “Dios no ta hende pa e papia mentira, ni un yu di humanidad pa e sinti duele. E mes a bisa esei i acaso lo e no hacié, i el a papia i lo e no cumpli cuné?” (Númeronan 23:19) Sí, loke Dios a primintí lo ser realisá—p’e bendicion di tur esnan cu ta tuma nan posicion na su banda.

Dios Su Mensaheronan di Pas

Testigonan di Jehova ta bon conocí pa nan predicacion celoso tocante e Reino di Dios. Tur aña, colectivamente nan ta dedicá mas cu mil miyon ora compartiendo e mensahe alentador di Bijbel cu otronan. Esaki ta na cumplimentu di Jesus su palabranan: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) E mensahe cu e Testigonan ta trece en berdad ta “bon nobo,” pasobra e ta proclamá e Reino celestial di Dios como e único speransa pa humanidad. I ki un speransa sólido pa futuro esei ta!

Asta awor e Reino di Dios ta produciendo den su súbditonan un vínculo genuino di pas i amor fraternal. Jesus a bisa: “Den esaki tur lo sa cu boso ta mi disipelnan, si boso tin amor entre boso.” (Juan 13:35) Testigonan di Jehova ta haci esfuerso pa yena e rekisito básico aki di berdadero cristianismo. Como resultado, nan tin un hermandad maraviyoso cu ta uni hudiu cu arabir, croata cu serbio, hutu cu tutsi. E pas aki cu e mayoria di humanidad por solamente soña di dje ta existí awor den e miyones di Testigonan di Jehova rond mundu.

E programa dje Congreso di Distrito “Mensaheronan di Pas Divino” a duna hopi animacion pa sigui biba segun principionan di Bijbel i pa sigui predicá e bon nobo dje Reino di Dios. Nos ta invitá bo pa lesa e siguiente informe dje congreso conmovedor di tres dia cu miyones di hende a disfrutá di dje.