Mensaheronan di Pas Divino Ta Bini Huntu

“CADA congreso di distrito cu nos a asistí na dje a edificá nos,” un anciano cristian di Merca ta bisa. “Sin embargo, e aña aki tabata simplemente indescriptibel. Nos a bandoná e congreso cada dia puntrando nos mes con e programa dje siguiente dia lo surpasá nos expectativanan, i nos no a ser desapuntá!”

Si bo a asistí na un dje Congresonan di Distrito “Mensaheronan di Pas Divino,” sin duda lo bo ta di acuerdo cu e delegado entusiasmá aki. Cada dia dje congreso a enfocá riba un aspecto diferente dje comision cu Testigonan di Jehova ta hiba a cabo como mensaheronan di Dios. Laga nos repasá e programa di tres dia.

“Ki Bunita . . . Esun Publicando Pas”

Esaki tabata e tema dje promé dia di congreso. E tabata basá riba Isaías 52:7. Den e tempu difícil aki, hopi hende ta sirbiendo Jehova bou di circunstancianan hopi difícil. E discurso “Tendiendo for di Proclamadornan Celoso di Pas” a incluí entrevista cu algun dje fielnan aki. Tabata en berdad un animacion pa tende nan expresionnan personal, i esnan cu a asistí n’e congreso a ser garantisá asina cu Jehova por fortalecé nan tambe, asta suministrando “poder mas ayá di loke ta normal” pa yuda nan wanta.—2 Corintionan 4:7.

E rekisitonan di Jehova no ta pisá. (1 Juan 5:3) Esaki a ser splicá claramente den e último discurso dje programa di mainta, culminando cu e presentacion di un foyeto di 32 página titulá Kico Dios Ta Rekerí di Nos? E foyeto nobo aki bunita ilustrá, como medio pa studia Bijbel, sin duda lo hunga un papel importante den yuda hopi hende mas siña tocante e propósitonan di Dios. Bo por haña comentarionan riba e uso dje publicacion nobo aki den e último artículo di studio den e revista aki i na página 16 i 17.

E discurso “Mustrando Awante den Obra cu Ta Bon” a enfatisá cu Jehova ta bon conciente di nos pruebanan. Wanta ta nificá perseverá i no perde speransa. Jehova a duna nos su Palabra, su spiritu i su organisacion pa asistí nos. Nos mester tin awante pa predicá, sin embargo e trabou di predicacion ta yuda nos wanta, pasobra e ta tene nos fe bibu. Siendo asina cerca dje liña final, nos no mester laga nos problemanan fria nos celo, pasobra solamente esnan cu ta wanta te na fin lo ser salbá.—Mateo 24:13.

E discurso clave, “Nos Papel Como Mensaheronan di Pas Divino,” a hala atencion n’e liberacion di exiliadonan hudiu for di Babilonia i e restoracion di adoracion puru den Jerusalem na 537 P.E.C. E orador a splica cu e suceso aki tabata djis un bista delantá di loke e Reino di Dios pronto lo logra riba un escala mundial. (Salmo 72:7; Isaías 9:7) Nos asignacion actual ta pa predicá e bon nobo tocante e Reino aki i biba na armonia cu e mensahe ei. Amor pa Dios i pa próhimo mester impulsá nos pa continuá den e trabou aki sin stop.—Echonan 5:42.

Un punto sobresaliente dje programa di diabierne tabata e simposio “Tene Cuidou cu e Trampanan Scondí di Entretenimentu.” Música, película, video, programa di television, wega di video, buki, revista i ‘comics’ djawe hopi biaha ta reflehá pensamentu demoniaco. P’esei, nos tin cu “aborecé loke ta malbado” i “pega na loke ta bon.” (Romanonan 12:9) Sí, nos tin cu mira entretenimentu corupto como algu repugnante i evit’é, miéntras cu nos ta mantené nos mente riba cosnan cu ta decente, cu tin birtud i cu ta digno di alabansa. (Filipensenan 4:8) E publicacionnan i hermentnan di investigacion cu Jehova su organisacion ta percurá ta stimulá nos mente cu pensamentunan edificante i ta entrená nos pa distinguí bon for di malu. (Hebreonan 5:14) Nos mester tene duru n’e percuracionnan aki mescos cu nos lo a tene duru na un vlot den laman brutu.

Despues a bini e discurso “Oponé e Diabel—No Tolerá Ningun Rivalidad.” Djis promé cu nan mester a drenta e Tera Primintí, miles di israelita a cai den e trampa di inmoralidad. Finehas no a tolerá rivalidad pa cu adoracion berdadero. El a tuma accion decisivo contra malechornan, i su debocion exclusivo a agradá Jehova. (Númeronan 25:1-13) Satanas su meta ta pa laga cada un di nos bira descualificá pa drenta e mundu nobo di Dios. P’esei, mescos cu Finehas, nos tin cu oponé e esfuersonan dje Diabel pa contaminá nos. Sea nos ta casá of soltero, nos tin cu “hui di fornicacion.”—1 Corintionan 6:18.

“Sosteniendo Lealmente e Integridad dje Palabra di Dios” tabata e discurso di conclusion dje promé dia di congreso. Hopi traductor ta cambia of omití partinan dje Scritura. Por ehempel, pa calma esnan cu ta defendé e derechonan di hende muher, e traductornan di The New Testament and Psalms: An Inclusive Version ta referí na Dios, no como e Tata, sino como e Tata-Mama i na Jesus como “Esun Humano” en bes di e “Yu [homber] di hende.” Na contraste, e Traducción del Nuevo Mundo ta pega asina fiel n’e texto dje idioma original cu el a sirbi pa clarificá nos pensamentu riba un cantidad di asuntunan bíblico. Por ehempel, e orador a bisa: “Tabata e traduccionnan exacto den e Traducción del Nuevo Mundo cu a percurá e base pa nos reorganisá e congregacionnan dor di nombra cuerponan di anciano, na armonia mas estrecho cu e patronchi establecí den e congregacion cristian di promé siglo.” Nos ta demostrá nos lealtad n’e Palabra di Dios dor di les’é diariamente i dor di aplicá su conseho. Tambe e orador a bisa: “Nos ta mustra cu nos ta defensornan leal dje Palabra di Dios dor di proclam’é celosamente na otronan i dor di us’é cuidadosamente segun cu nos ta siña otronan, nunca tratando pa hacié cuadra cu nos ideanan dor di troce of amplia e nificacion di loke e ta bisa.”

‘E Pas di Dios Ta Surpasá Tur Pensamentu’

E tema aki, basá riba Filipensenan 4:7, a prepará e auditorio p’e di dos dia dje congreso. Hopi dje informacion presentá a trata cu e punto di bista corecto di nos ministerio, famia, dedicacion i otro aspectonan di bida diario.

Despues di un consideracion dje texto di dia, un simposio titulá “Mensaheronan Treciendo Bon Nobo di Pas,” a ser presentá. Nos mensahe ta unu di pas, i e mester ser entregá den un forma pacífico. (Efesionan 6:15) Nos meta ta pa convencé tantu e curason como e mente. E entrenamentu i publicacionnan cu nos ta ricibí for di Jehova su organisacion ta yuda nos haci net esei. Nos no mester laga indiferencia of apatia desanimá nos. Mas bien, nos mester sigui ‘haci nos sumo posibel,’ teniendo un rutina saludabel di studio personal, asistencia na reunion i participacion den e trabou di predicá. (2 Timoteo 2:15) Nos no mester pasa por haltu di haci bon na otronan, specialmente na esnan relacioná cu nos den e fe. (Galationan 6:10) Naturalmente, haciendo nos sumo posibel no ta nificá caba cu nos mes. Loke cada persona por haci segun su propio abilidad i circunstancia ta aceptabel pa Jehova.

E pueblo di Dios ta duna di nan tempu, energia i recursonan pa promové interesnan di Reino. E discurso “Dunamentu Alegre den e Organisacion di Jehova” a trece padilanti cu segun cu mas hende semehante di carné ta respondé n’e mensahe di Reino, tin un necesidad pa mas literatura, lugá di reunion i facilidadnan di sucursal. Nos contribucionnan ta permití e organisacion disponé di tur loke ta necesario pa cumpli cu e trabou mundial di predicá. Tambe dunamentu generoso ta onra Jehova i ta trece goso n’e dunador. P’esei, como cristiannan, nos no mag neglishá e aspecto importante aki di nos adoracion.—2 Corintionan 8:1-7.

Pa cera e sesion di mainta tabatin e discurso di bautismo—semper un rasgo sobresaliente na reunionnan grandi di Testigonan di Jehova. Esta un goso pa mira esnan recien dedicá sigui den e pasonan di Jesus dor di someté nan mes na bautismo bou di awa! (Mateo 3:13-17) Tur esnan cu dal e stap aki a ser educá for dje fuente di mayor sabiduria—Bijbel. Ademas, nan a haña un berdadero propósito den bida, i nan ta bendicioná cu e pas cu ta bini for dje echo cu nan sa cu nan ta haciendo loke ta corecto.—Eclesiástes 12:13.

Conseho al caso a ser duná den e discurso “Laga Dicernimentu Protehá Bo.” Dicernimentu ta masha importante en coneccion cu transaccionnan di negoshi. Nos no mester atendé actividadnan personal di negoshi na Salon di Reino, ni nos no mester probechá di compañeronan cristian pa ganashi financiero. (Compará cu Juan 2:15, 16.) Dicernimentu tambe ta necesario ora nos ta invertí den un negoshi of ora nos ta haci un fiansa of duna un fiansa. “Fracaso di negoshinan riscante entre cristiannan a hiba na desapunte i asta na pérdida di spiritualidad di parti di algun ruman cu a core enbolbé nan mes den plannan riscante pa traha placa lihé,” e orador a bisa. Aunke no ta malu pa cristiannan haci negoshi cu otro, sin duda ta sabí pa ehercé cautela. I ora dos partido ta cera un acuerdo di negoshi cu otro, semper mester pone e condicionnan por escrito.

E norma di Dios pa hende homber i muher a ser considerá den e discurso “Machu i Hembra El A Crea Nan.” E papel di tantu e homber como e muher a ser trocí atrabes di historia. “Hopi hende ekibocadamente ta kere cu ser masculino ta nificá tene dominio severo, ser sin sintimentu of ser machista,” e orador a bisa. “Den cierto culturanan lo ta algu straño, asta bergonsoso pa un hende homber yora den público of asta den privá. Sin embargo, Juan 11:35 ta conta cu ora Jesus tabata den e multitud banda dje graf di Lázaro, el ‘a entregá na lágrima.’” Kico di hende muher? Feminidad hopi biaha ta ser igualá cu ser físicamente atractivo. Pero e orador a puntra: “Si un muher ta bunita pero ta falta razonabilidad i ta gusta discutí, ta sarcástico of arogante, bo por consider’é bunita den e berdadero sentido dje palabra, berdaderamente femenino?” (Compará cu Proverbionan 11:22; 31:26.) Den nan abla, conducta i areglo personal, homber i muhernan cristian ta haci esfuerso pa biba segun normanan bíblico. E orador a bisa: “Un homber cu ta manifestá e fruta di spiritu ta fácil pa respetá, i un muher cu ta haci esei ta fácil pa stima.”—Galationan 5:22, 23.

Despues a bini e simposio “E Dios di Pas Ta Percurá pa Bo.” Hopi cristian tin ansiedad financiero. No obstante, Jehova ta primintí: “Lo mi no bandoná bo di ningun manera ni desampará bo di ningun manera.” (Hebreonan 13:5) Apesar di dificultad económico, algun a mustra confiansa den e promesa aki dor di drenta e sirbishi di pionero auxiliar of regular. Otronan cu no por traha pionero awor ta pone interesnan di Reino na promé lugá dor di probechá di tur oportunidad pa duna testimonio. (Mateo 6:33) Tur e esfuersonan ei ta encomendabel! E organisacion di Jehova a percurá un cantidad di publicacion pa asistí nos cu nos ministerio i pa yuda nos enfrentá nos problemanan cu éxito. Si nos mustra aprecio p’e percuracionnan spiritual di Jehova, lo e bendicioná nos cu pas den e tempu económicamente turbulento aki.—Salmo 29:11.

Na conclusion dje discurso final dje dia, “Sigui Tras di Pas Divino den Bida di Famia,” personanan cu a asistí n’e congreso a keda masha contentu pa ricibí e buki nobo, E Secreto pa Felicidad den Famia. “Studia e buki aki diligentemente, personalmente i como famia,” e orador a urgi. “Haci esfuerso sincero pa aplicá su conseho basá riba Bijbel, i bo por ta sigur cu lo bo aumentá e pas i felicidad den bo famia.”

“Observá e Unidad . . . den e Vínculo Unificador di Pas”

Basá riba Efesionan 4:3, esaki tabata un tema apropiado p’e último dia dje congreso. Testigonan di Jehova, biniendo for di tur nacion di mundu, a ser siñá dor di Dios. P’esei, nan ta stima pas. Nan ta sigui e ehempel di Jesus i ta haci esfuerso pa “observá e unidad di spiritu den e vínculo unificador di pas.”

E pas cu ta presente den tur parti dje organisacion di Dios a ser resaltá den e simposio “Identificando e Clase Corecto di Mensaheronan.” Den Israel di antigwedad a existí profetanan falsu. Sin embargo, Dios su mensaheronan berdadero—manera profeta Isaías, Ezekiel i Jeremías—cu exactitud a predicí e caida di Jerusalem, e periodo di exilio i, cu tempu, e liberacion dje pueblo di Dios. Un situacion similar ta existí awe. Mensaheronan falsu ta abundá den e esfera di política i religion falsu. Sin embargo, Jehova a lanta su Testigonan pa proclamá su propósito relacioná cu e sistema di cosnan aki. Particularmente desde 1919, Jehova su sirbidornan a ser usá pa proclamá Dios su mensahe. Ki diferente nan ta for dje mensaheronan falsu di cristiandad! Laga nos cumpli diligentemente cu nos papel den e trabou aki te ora Jehova bisa cu el a ser completá.

E discurso “Scucha i Obedecé e Palabra di Dios” a enfatisá cu e Scritura ta e mayor fuente di guia, consuelo i speransa. (Isaías 30:20, 21; Romanonan 15:4) E mundu djawe ta cada bes mas i mas permisivo. P’esei, awor, mas cu nunca, nos tin cu scucha e conseho cu ta bini for di Dios su Palabra i organisacion. Jehova conocé nos debilidadnan, i den su Palabra el a indicá claramente e curso cu lo beneficiá nos. Sabiendo cu Jehova ta respaldá nos ta duna nos confiansa pa move padilanti cu kico cu e rekerí di nos.

Esaki a prepará e auditorio p’e drama den pleno trahe i esenario antiguo cu a sigui. E tabata titulá “Pakico Respetá Areglonan Teocrático?” Usando e relato bíblico di Gideon como base, e presentacion aki a enfatisá fuertemente un les poderoso—nos tin cu sigui e instruccionnan di Dios i no substituí nan cu nos propio pensamentu of purba bula pipa pa conseho teocrático.

E discurso público tabatin e tema “Por Fin Berdadero Pas!—Di Ki Fuente?” E pas cu Dios ta primintí ta bai mas ayá cu cualkier cos cu e mundu aki por imaginá. “Berdadero pas ta nificá pas tur dia,” e orador a bisa. “E pas di Dios ta nificá un mundu sin malesa, dolor, tristesa i morto.” Bijbel ta bisa nos cu Jehova “ta haciendo guera stop te na e extremidad dje tera.” (Salmo 46:9) Con lo e haci esaki? Dor di eliminá e instigador di guera, Satanas e Diabel. (Revelacion 20:1-3) Esaki lo habri e caminda pa e mansunan ‘poseé e tera, i haña nan deleite exkisito den e abundancia di pas.’—Salmo 37:11.

Despues di un resúmen dje artículo di studio dje Toren di Vigilancia pa e siman, e discurso final p’e congreso a ser presentá. Cu e título “Moviendo Padilanti Como Mensaheronan di Pas Divino,” e discurso stimulador aki a enfatisá cu nos trabou di predicá ta tantu único como urgente. Awor no ta tempu pa relahá, bira pia of bai bek na ideanan eróneo. Nos ta ekipá cu loke nos tin mester—e mensahe di Dios, su spiritu santu, i un cantidad di percuracionnan cu ta bini for di su organisacion teocrático i amoroso. P’esei, como Jehova su sirbidornan, laga nos sigui move padilanti como mensaheronan di pas divino!

[Kuadro/Plachinan na página 9]

Un Percuracion Amoroso pa Famianan

Esnan cu a asistí na e di dos dia dje Congreso di Distrito “Mensaheronan di Pas Divino” a yena di emocion ora nan a ricibí e publicacion nobo titulá E Secreto pa Felicidad den Famia. E buki aki ta contené informacion bíblico cu lo beneficiá tur famia cu ta stima Dios.

Un anciano di Connecticut, Merca, ta comentá: “Dia 15 di juni, nos a ricibí nos buki Felicidad den Famia. Pa 16 di juni, mi a lesa mitar di dje caba. Dia 17, nos tabatin nos promé studio di famia for di dje, i nos a keda hopi animá! Riba e mésun dia ei, mi a caba di lesa e buki completo. E publicacion excelente aki sin duda lo resultá di ta precioso pa tur esnan cu haci uso di dje. E buki su frankesa i informacion actualisá ta ofrecé mas prueba cu ‘e esclabo fiel i discreto’ ta dunando ‘alimento n’e debido tempu’ i ta masha conciente di nos necesidadnan den e tempu difícil aki.”—Mateo 24:45-47.

[Plachi na página 7]

Tantu hóben como bieu kier sa kico Dios ta rekerí