Informe di Proclamadornan di Reino

Plamando Simia di Reino na Tur Ocasion

E PALABRA di Dios, e Bijbel, ta animá pa nos ta diligente. Rey Sálomon a bisa: “Sembra bo simia mainta i te atardi no laga bo man sosegá; pasobra bo no sa unda esaki lo tin éxito, sea aki of aya, of si nan tur dos lo ta igualmente bon.”—Eclesiástes 11:6.

Na tur ocasion apropiado, Testigonan di Jehova ta sembra “simia” dor di predicá e bon nobo dje Reino di Dios. Den mas cu 230 pais i grupo di isla, nan ta sigui “sin stop siñando i declarando e bon nobo tocante e Cristo, Jesus.” (Echonan 5:42) E siguiente experencianan ta ilustrá con Testigonan di Jehova ‘no ta laga nan man sosegá’ den e trabou di predicá.

◻ Den e República di Cabo Verde, un Testigo di Jehova tabata pasando banda di un prizon miéntras e tabata den e ministerio di veld. Den e patio dje prizon, algun prezu tabata sintá den un palu. Observando e Testigo pasando abou, e prezunan a grita pidi pa poco revista. E Testigo a mara un cantidad di revista Toren di Vigilancia i Spierta! na un piedra i a tira nan over dje muraya di prizon. Como resultado dje interes inicial aki, 12 studio di Bijbel a cuminsá. Tres dje prezunan a dedicá nan bida na Dios i a presentá nan mes pa bautismo bou di awa. Un dje prezunan ta sirbiendo como un evangelisador di tempu completo, of pionero, pa mas di un aña caba. Sin embargo, con nan ta hiba a cabo actividadnan di sirbishi di veld den prizon? Promé, e prizon ta ser partí den teritorionan. Despues e teritorio ta ser repartí entre e tres Testigonan i trahá di cel pa cel. E proclamadornan di Reino aki ta cultivá interes den e mésun manera cu Testigonan rond mundu ta hacié—dor di haci rebishita. Sin embargo, un diferencia ta e frecuencia cu cua studionan di Bijbel ta ser conducí. En bes di studia Bijbel solamente un of dos biaha pa siman pa un ora i picu, algun prezu ta studia tur dia! Ademas, e Testigonan a haña permiso dje director general dje prizon pa conducí tur reunion di congregacion den e prizon.

◻ Un señora na Portugal a heredá un cantidad di publicacionnan di Watch Tower despues di morto di su wela. Ya cu e señora no tabata un Testigo di Jehova, e no tabata interesá pa keda cu e bukinan. Sin embargo, e no kier a tira nan afó. Un dia el a bisa un Testigo di Jehova cu a bishit’é den e ministerio di cas-pa-cas tocante e biblioteca. E Testigo a puntr’é si e tabatin idea dje berdadero balor dje biblioteca. E señora a contestá: “Eigenlijk, mi no sa nan berdadero balor, pero con mi por haña sa?” E señora a aceptá un studio di Bijbel, i pronto el a bin atesorá e biblioteca di su wela. Awor e tambe ta un Testigo di Jehova bautisá. Ademas, su yu muher i un amigu íntimo dje famia tambe ta studiando Bijbel. Ki un herencia balioso e coleccion di buki aki a resultá di ta!