“Boso A Cambia e Impresion Cu Mi Tabatin di Testigonan di Jehova”

ASINA un funcionario di prizon na Polonia a reaccioná riba un artículo tocante e trabou di Testigonan di Jehova, cu nos revista di 15 di october 1998 a publicá. E artículo, “Ora Curasonnan di Piedra Bira Moli,” a documentá e éxito cu Testigonan di Jehova tabatin den nan trabou cu e prezunan dje prizon di Wołów, Polonia.

Promé cu a presentá E Toren di Vigilancia ariba mencioná na público, a haci areglo pa tene un reunion special dia 13 di september 1998, pa asina ofrec’é n’e prezunan dje prizon di Wołów. Entre esnan invitá cu a asistí tabatin Testigonan local, prezunan bautisá i esnan interesá, i un cantidad di funcionario di prizon. Ata aki algun comentario di esnan cu a asistí.

Jerzy, un Testigo di Jehova cu a bautisá den prizon mas cu cincu aña pasá, a bisa: “Awe, mi ta masha contentu di por lesa cuantu esfuerso e rumannan dje congregacionnan den cercania a haci pa yuda nos.” El a agregá: “Mi ta sigui haci esfuerso pa mehorá mi personalidad, i mi por mira con Jehova ta sigui moldea mi.”

Un otro prezu cu yama Zdzisław, a bisa tocante e trabou di duna testimonio den prizon: “Actualmente, tin cuater prezu ta prepará pa bautismo, i esnan recien interesá ta sigui bishitá e reunionnan na nos salon. E artículo aki ta un motivacion poderoso pa nos sigui cu mas actividad den e veld aki.” Esta un actitud positivo, si nos considerá cu ainda Zdzisław tin cu sinta 19 aña den prizon!

Despues cu el a lesa e artículo tocante e prizon di Wołów, un funcionario di prizon a bisa: “Nos a haña un onor special. Nunca mi a pensa cu e prizon aki lo haña un publicidad asina positivo den 130 idioma na mundu. Mi gusta boso, i mi ta apreciá e esfuersonan cu boso ta haci na fabor dje prezunan.” Un otro funcionario a agregá: “Boso a cambia e impresion cu mi tabatin di Testigonan di Jehova. Promé, mi tabata pensa cu boso ta fanáticonan religioso. Awor mi ta mira cu boso ta hende di principio.”

E director dje prizon di Wołów, Marek Gajos, a smail i bisa: “Na promé instante nos a pensa cu boso lo logra masha poco. Nos a pensa cu boso tabata djis un religion mas cu a aspirá di usa Bijbel pa rehabilitá e prezunan. Sin embargo, mirando e resultado di boso actividad inicial, nos a dicidí di cooperá estrechamente cu boso. Awor boso tin nuebe aña ta bini aki incansablemente, i mi tin masha aprecio pa loke boso a haci te awor.”

Pero, con e poblacion en general dje prizon di Wołów a ricibí e artículo? Tabatin asina tantu interes entre e prezunan cu tur e suministro di revista dje Testigonan den prizon a caba. E funcionarionan dje prizon tambe a mustra interes dor di pidi 40 ehemplar extra pa nan mes. Pa cumpli cu e demanda cu a aumentá, congregacionnan local a yuda e rumannan den prizon dor di facilitá nan 100 ehemplar extra. Na mésun tempu, asistencia na reunion den prizon a aumentá.

Piotr Choduń, un funcionario di prizon cu a cooperá estrechamente cu e Testigonan di Jehova, a bisa: “Nos a dicidí di pone e artículo aki den tur showcase di nos prizon. Nos ta spera cu tur e prezunan cu ainda no ta studia Bijbel cu boso, lo lesa e revista.”

E ehempel excelente dje Testigonan i nan esfuersonan decididu pa predicá ta sigui duna bon resultado. Ademas dje 15 prezunan cu a progresá te n’e punto di bautismo, 2 funcionario di prizon a dedicá nan bida na Jehova i un otro funcionario di prizon a pidi un studio di Bijbel. Claro, e rumannan cu ta predicá den e prizon di Wołów ta duna tur crédito pa nan éxito na Jehova Dios.—Compará cu 1 Corintionan 3:6, 7.

[Plachi na página 28]

Tres Testigo i un prezu durante e presentacion dje revista den e sala di charla di prizon