Kaha di Pregunta

◼ Ki spièrtamentu nos mester tene kuenta kuné ora nos ta prediká na prezunan?

Rònt mundu tin por lo ménos ocho mion prezu. Algun di nan ta mustra interes den e bon nobo. (1 Tim. 2:4) Un ofisina di sukursal ta risibí alrededor di 1.400 karta pa luna di prezunan i nan famianan ku ta pidi literatura òf un bishita personal. Maske e interes di hopi prezu ta sinsero, eksperensia a mustra ku algun ta aparentá di ta interesá pa nan saka probecho personal for di Dios su pueblo. En bista di esaki, tur publikadó mester hasi kaso di e siguiente prekoushonnan relashoná ku predikashon na prezunan.

Den hopi kaso ta prediká na prezunan via karta. Ta ser rekomendá fuertemente pa ruman muhénan no skirbi prezunan maskulino, asta ora ku e meta ta pa duna yudansa spiritual. Ta rumannan hòmber kualifiká so mester karga e responsabilidat ei. Rumannan muhé kualifiká por wòrdu asigná pa korespondé ku prezu femenino ku ta ekspresá interes sinsero den e bèrdatnan di Beibel. No mester manda plaka ni regalo personal pa prezunan, ni maske nan pidi esei.

Ora un hende enkarselá mustra interes, mester duna su nòmber i adrès na e kongregashon den e área di e prison. Generalmente rumannan hòmber kualifiká einan sa kon pa trata ku e diferente situashonnan ku por presentá. Si no ta konosí ta kua kongregashon esei ta, mester manda e informashon na e ofisina di sukursal.

No tin nada kontra pa rumannan hòmber tene reunion ku e prezunan pa vários di nan por studia alabes. Sin embargo, eventonan spesial den kua e publikadónan ta asosiá libremente ku e prezunan sí no mester ser tené den prizon. Ademas, no ta sabí pa publikadónan bishitá prezunan sin planiamentu di antemano ni pa nan tin asosiashon estrecho ku e prezunan.

Laga nos ta “kouteloso manera kolebra i inosente manera palomba” segun ku nos ta kompartí e bon nobo ku prezunan.—Mat. 10:16.