Esnan Afligí Lo Haña Alivio un Dia?

LO BO kier mira un fin na sufrimentu, no solamente pa bo mes sino pa henter humanidad? Considerá e ehempelnan aki:

Sonia a sufri masha hopi mes.a Promé, el a haña sa cu su esposo tabatin un aventura adúltero pa dies aña. Caba su yu homber mas chikitu a contagiá cu HIV i a muri di AIDS. Dos aña despues su otro yu homber a bira malu, i pronto e tambe a muri di AIDS. “E fase final di su malesa a dura masha largu,” Sonia ta corda. “El a sufri di depresion intenso, tur su cabei a cai, i e no por a mira bon. Tabata masha tristu.”

Fabiana, un alumno di universidad na Brazil, tabata preocupá tocante inhusticianan social di mundu. Anto tragedia a atacá su mes bida. Su ruman homber, sufriendo di depresion, a cometé suicidio. Ora Fabiana a perde su trabou, un amiga a conseh’é pa consultá un pai-de-santo (hacidor di bruha), razonando cu pa Fabiana sufri di tantu desgracia un hende mester a haci bruha p’e! Pero e pai-de-santo no a trece alivio. En bes di esei, Fabiana a sintié tormentá, sin por a drumi debí na su calamidadnan.

Ana su afliccion a cuminsá hopi mas trempan den bida. “Ora mi tabatin un aña di edad,” e ta conta, “mi mama a bandoná mi, pues mi wela a criá mi.” Anto, ora Ana tabatin solamente tres aña di edad, su wela a muri. Ana a ser mandá na un weeshuis na Rio de Janeiro, caminda el a keda te cu su 13 aña. “Nan tabata trata nos hopi malu ei, i mi a bira rebelde,” e ta bisa. “Segun cu mi a crece, mi a bringa contra casi tur cos.”

Ta parce cu afliccion ta afectá e bida di tur hende den un manera of otro. En berdad, nos ta topa cu relatonan di tragedia humano riba un base diario—ki ora cu nos wak, lesa of scucha noticia. “Nos era cu medionan di comunicacion en masa a hacié prácticamente imposibel pa nos scapa e bombardeo constante di mal noticia,” Dr. Mary Sykes Wylie ta skirbi. “Gueranan, desasternan natural, catástrofenan industrial, accidentenan mortal di tráfico, crímen, terorismo, abusu sexual, violacion, violencia doméstico—nan tur ta haci trauma un cos horibel i un tema diario di siglo 20.” Apostel cristian Pablo a resumí realísticamente e experencia humano: “Tur e creacion ta sigui suspirá huntu i kedando den dolor.”—Romanonan 8:22.

Kico di abo? Bo ta experenciando afliccion? Ki alivio bo por spera? Lo bo alcansá berdadero pas un dia? Sonia, Fabiana, i Ana a haña consuelo genuino i un berdadero midí di pas! Bo por lesa tocante esei den e siguiente artículo.

[Nota]