Pakico Tantu Secrecia?

“NADA ta mas pisá cu un secreto.” Of por lo ménos, asina un proverbio frances ta bisa. Esaki lo por splica pakico nos ta sinti nos contentu ora nos sa un secreto pero tin biaha frustrá ora nos no por papia tocante dje? Sin embargo, atrabes di siglonan hopi hende a aceptá secrecia gustosamente, uniendo nan mes huntu den gruponan secreto en busca di un meta comun.

Entre e promé dje sociedadnan secreto aki tabatin e cultonan misterioso hañá na Egipto, Grecia i Roma. Mas despues algun dje gruponan aki a desviá for di nan influencia religioso i a asumí tendencianan político, económico of social. Por ehempel, ora gremionan a ser formá durante Edad Media na Europa, nan miembronan a recurí na secrecia principalmente pa nan proteccion económico.

Gruponan secreto den e tempu actual hopi biaha a ser formá pa motibunan basta onorabel, posiblemente pa “propósitonan social i benévolo,” segun Encyclopædia Britannica, i “pa hiba a cabo programanan caritativo i educacional.” Algun organisacion fraternal, club di hóbennan, club social i otro gruponan tambe ta secreto, of por lo ménos semi-secreto. Generalmente, e gruponan aki ta inofensivo, ya cu nan miembronan simplemente ta haña secrecia excitante. Ritonan secreto pa haci un persona miembro tin un atraccion emocional fuerte i ta fortalecé e lasonan di camaraderia i unidad. Miembronan ta haña e sintimentu di ta pertenecé na otro i un sentido di propósito. Por lo general, e clase di sociedadnan secreto aki no ta un peliger pa hende cu no ta miembro. Esnan di pafó no ta den desbentaha pasobra nan no sa dje secretonan.

Ora Secrecia Ta Indicá Peliger

No ta tur grupo secreto tin e mésun grado di secrecia. Pero esnan cu tin “secreto den secreto,” manera Encyclopædia Britannica ta expres’é, ta specialmente peligroso. E ta splica cu “usando nombernan special, pruebanan of revelacionnan,” miembronan dje filanan mas haltu ta logra “distinguí nan mes,” stimulando asina “e filanan mas abou pa haci e esfuerso necesario pa alcansá e gradonan mas haltu.” E peliger inherente den e gruponan ei ta bisto. Esnan den e filanan mas abou por ta completamente ignorante dje berdadero obhetivonan dje organisacion, ya cu nan no a progresá ainda n’e nivel ei di conocimentu. Ta fácil pa bira enbolbí den un grupo di cua su metanan i métodonan pa logra nan ta solamente parcialmente conocí pa bo i, realmente, tal bes no ta ni sikiera ser splicá completamente. Pero e persona cu a ser hací miembro di un grupo asina despues por haña ta difícil pa libra su mes; e ta, na moda di papia, mará cu cadena di secrecia.

Sin embargo, secrecia ta indicá peliger asta mas grandi ora un grupo ta sigui tras di metanan ilegal of criminal i p’esei ta purba sconde su existencia mes. Of si su existencia i metanan general ta conocí, e por trata na tene su membresia i su plannan riba término corticu secreto. Esaki ta cierto di gruponan terorista altamente motivá cu tempu-tempu ta sagudí mundu cu nan atakenan terorista.

Sí, secrecia por ta peligroso, tantu pa personanan individual como pa e sociedad den su totalidad. Pensa dje gengnan secreto di tiener cu ta atacá víctimanan inocente violentamente, asociacionnan criminal manera Mafia secreto, gruponan cu ta kere den e supremacia dje rasa blancu manera Ku Klux Klan,a pa no papia mes dje hopi gruponan terorista rond mundu cu ta sigui frustra esfuersonan pa logra pas i siguridad mundial.

Kico Nan Ta Haciendo Awor?

Durante añanan ’50, como un resultado adicional dje Guera Friu, gruponan secreto a ser organisá den vários pais di West Europa pa sirbi como base pa movementunan di resistencia, si un dia e soviéticonan trata na conkistá West Europa. Segun e revista aleman di noticia Focus, por ehempel “79 depósito secreto di arma” a ser establecé na Austria durante e periodo aki. Algun pais europeo no tabata ni na altura dje gruponan aki. Na cuminsamentu di añanan ’90 un revista di noticia tabata realístico di informá: “Ainda ta desconocí cuantu dje organisacionnan aki ta funcionando awe i kico nan por tabata haciendo últimamente.”

Sí, en berdad. Ken realmente por sa cuantu grupo secreto n’e momento aki mes por ta presentando un menasa mas grandi cu cualkier un di nos lo por imaginá?

[Nota]