Secrecia den Nòmber di Señor

UN ATAKE cu gas venenoso den e metro di Tokio, Hapon, na mart 1995, a mata 12 hende, a haci miles mas enfermo i a yuda revelá un secreto. Un secta religioso conocí como Aum Shinrikyo (Berdad Supremo) a acumulá secretamente un arsenal di gas sarin pa usa pa logra metanan misterioso.

Un luna despues un explosion di bom a destrosá un edificio federal na Oklahoma City, Merca, i a mata 167 persona. Segun evidencia, aparentemente e atake tabata te na un cierto grado conectá cu e echo cu negociacionnan entre gobiernu i e culto religioso dje Ramo Davidiano na Waco, Texas, a stanca exactamente dos aña anterior. E tempu ei rond di 80 miembro dje culto a muri. E explosion di bom tambe a revelá loke tabata un secreto pa mayoria hende: Hopi grupo paramilitar di milicia awor ta operá na Merca, di cua por lo ménos contra algun ta reina e sospecho cu nan ta planeando secretamente accion antigobiernu.

Mas despues, segun cu 1995 tabata yegando su fin, e curpanan carbonisá di 16 persona a ser hañá den un área di mondi cerca Grenoble, Francia. Nan tabata miembro dje Orden dje Tempel Solar, un culto religioso chikitu cu na october 1994 tabata den noticia na Suisa i Cánada ora 53 di su miembronan sea a cometé suicidio of a ser matá. Pero asta despues dje tragedia aki, e secta a sigui funcioná. Te n’e dia djawe su motivacion i metanan ta lorá den secrecia.

E Peligernan di Secrecia Religioso

En bista di sucesonan asina, ta algu straño cu hopi hende ta wak den direccion di gruponan religioso cu sospecho? Siguramente ningun hende lo kier apoyá un organisacion secreto—religioso of no-religioso—cu ta malusá su confiansa i cu ta pon’é sigui tras di metanan cu e no ta di acuerdo cuné. Pero kico hende por haci pa evitá di cai den e trampa di enbolbé nan mes cu sociedadnan secreto cu tin un caracter cuestionabel?

Obviamente, ken cu ta pensa di bira miembro di un sociedad secreto lo haci bon di averiguá su berdadero obhetivonan. Bo mester protehá bo mes contra presion di parti di amigu of conocínan, i decisionnan mester ta basá no riba emocion sino riba echonan. Corda, probablemente ta e individuo mes—no otronan—cu lo tin cu sufri cualkier posibel consecuencia.

Sigui principionan bíblico ta e método mas sigur pa evitá gruponan peligroso kende nan motibunan no ta onorabel. (Isaías 30:21) Esaki ta enbolbé mantené neutralidad político, mustra amor na otronan, asta na enemigunan, evitá “e obranan di carni,” i cultivá e fruta di spiritu di Dios. Riba tur cos, cristiannan berdadero no mester ta parti di mundu, mescos cu Jesus tampoco tabata, i e curso aki ta impedí participacion den sociedadnan secreto mundano.—Galationan 5:19-23; Juan 17:14, 16; 18:36; Romanonan 12:17-21; Santiago 4:4.

Testigonan di Jehova ta studiantenan sincero di Bijbel cu ta tuma nan fe masha na serio i ta purba abiertamente di biba segun nan fe. Rond mundu, nan ta bon conocí como un grupo religioso cu ta ‘busca pas i ta sigui tras di dje.’ (1 Pedro 3:11) Nan buki Los testigos de Jehová, proclamadores del Reino de Dios ta mencioná corectamente: “Testigonan di Jehova den ningun sentido ta un sociedad secreto. Nan creencianan basá riba Bijbel ta ser splicá claramente den publicacionnan cu cualkier persona por obtené. Ademas, nan ta haci un esfuerso special pa invitá e público pa asistí na nan reunionnan pa mira i tende pa nan mes loke ta tuma lugá.”

Religion berdadero definitivamente no ta practicá cosnan na secreto. Adoradónan dje Dios berdadero a ser instruí pa no sconde nan identidad of tapa nan propósito como Testigonan di Jehova. E disipelnan di Jesus di promé a yena Jerusalem cu nan siñansa. Nan creencianan i actividad tabata público. Mescos ta cierto di Testigonan di Jehova awe. Ta di comprendé cu ora régimennan dictatorial inhustamente ta restringí libertad di adoracion, cristiannan tin cu sigui cu nan actividad cu cautela i cu curashi, obedeciendo “Dios como gobernante mas bien cu hende,” un situacion cu nan ta haña nan mes forsá aden pa motibu di nan testimonio público yen di curashi.—Echonan 5:27-29; 8:1; 12:1-14; Mateo 10:16, 26, 27.

Si a yega di pasa den bo mente cu Testigonan di Jehova por ta un culto of secta secreto, esei tabata probablemente pasobra abo tabata sa muchu poco tocante nan. Esei lo mester tabata e caso cu hopi hende den e promé siglo.

Echonan capítulo 28 ta conta nos di un reunion cu apostel Pablo tabatin na Roma cu “e hombernan principal dje hudiunan.” Nan a bis’é: “Ta parce nos bon pa tende for di bo kico ta bo pensamentunan, pasobra, berdaderamente, pa loke ta e secta aki, ta conocí pa nos cu tur caminda hende ta papia contra dje.” (Echonan 28:16-22) Contestando, Pablo “a splica nan e asuntu, dunando testimonio cabal tocante e Reino di Dios,” i “algun a cuminsá kere.” (Echonan 28:23, 24) Tabata siguramente pa nan beneficio eterno pa haña e datonan real relacioná cu cristianismo berdadero.

Como hende dedicá na sirbishi abierto i público na Dios, Testigonan di Jehova lo ta contentu pa revelá e echonan claro di nan actividad i creencianan na cualkier persona cu ta interesá na sa e detayenan. Pakico no investigá pa bo mes, i ta asina den un posicion pa haña e informacion corecto tocante nan creencianan?

[Plachi na página 6]

Testigonan di Jehova ta contentu pa revelá ken nan ta i kico nan ta haciendo