Bijbel—Un Buki Unico

El a ser yamá e buki mas bendí, i cu bon motibu. Bijbel ta ser lesá i apreciá mas cu cualkier otro buki. Te n’e fecha djawe, su distribucion (completo of en parte) ta ser calculá na cuater mil miyon ehemplar den mas cu 2.000 idioma.

Sin embargo, hopi mas interesante cu Bijbel su circulacion, ta su afirmacion cu su autor ta divino. “Tur Scritura ta inspirá di Dios,” apostel cristian Pablo a skirbi. (2 Timoteo 3:16) Kico esaki ta nificá? E frase “inspirá di Dios” (griego, the·oʹpneu·stos) ta nificá literalmente “respirá dor di Dios.” Un palabra griego relacioná cuné, pneuʹma, ta nificá “spiritu.” P’esei, e afirmacion ta cu spiritu santu di Dios a impulsá escritornan humano, respirando riba nan, na moda di papia, di manera cu e producto final berdaderamente por a ser yamá e Palabra di Dios, no di hende. En berdad, hopi hende cu a studia Bijbel ta keda asombrá cu su armonia general, su exactitud científico, e onestidad i frankesa di su escritornan, i mas importante ainda, su profecianan cumplí—nan tur a convencé miyones di lector pensativo cu e buki aki ta bini di un fuente superior cu hende.a

Pero con riguroso Dios a guia e skirbimentu di Bijbel? Algun hende ta bisa cu el a dicta e Bijbel palabra pa palabra. Otronan ta bisa cu el a inspirá meramente e pensamentunan hañá den Bijbel, no e palabranan. Sin embargo, en realidad no por limitá inspiracion na un solo método, pasobra Dios a papia “den hopi manera cu nos antepasadonan pa medio dje profetanan.” (Hebreonan 1:1; compará cu 1 Corintionan 12:6.) Den e siguiente artículo, nos lo examiná e maneranan den cua Dios a papia cu e mas o ménos 40 escritornan humano cu a skirbi Bijbel.

[Nota]