Curacionnan Milagroso Ta Sosodé Ainda?
“ACEPTA Jesus i sea curá!” Lemanan manera esaki a pone Alexandre, miembro di un iglesia evangélico, kere cu si e tuma remedi pa su malesa, esei lo indicá un falta di fe. El a keda convencí cu su fe so lo a trece e curacion milagroso cu e tabatin mester. Benedita, un católico ferviente, a keda profundamente conmoví ora el a tende tocante milagernan di curacion den e santuario di Aparecida do Norte, den e estado di São Paulo, Brazil. Usando algun palabra mágico cu su tanta a siñ’é, Benedita a resa na Nos Señora di Aparecida, San Antonio i otro “santunan” pa poder pa cura e enfermonan.
Aparentemente, asta awor den e siglo 20 aki, hopi hende ainda ta kere den curacionnan milagroso—pero pakico? Probablemente, algun ta frustra ora dokternan no por haci mashá pa aliviá e enfermedad, dolor i sufrimentu di nan sernan kerí, specialmente nan yunan. Esnan afligí dor di malesanan crónico por sinti cu en bista dje costo haltu di medicina moderno, nan no tin nada di perde si busca sanacion di fe. Algun ta mira vários iglesia i individuonan na television ofrecé curacion pa AIDS, depresion, cancer, locura, presion haltu i hopi otro malesa. Sea e televidentenan tin algu di fe den e pretensionnan ei of no, kisas nan ta acudí na nan como e último recurso. Otronan cu ta kere cu nan malesa ta ser causá pa mal spiritu por sinti cu medicina convencional no tin e poder pa yuda nan.
Di otro banda, tin esnan cu ta oponé fuertemente, asta condená, e idea di curacionnan milagroso cu “santunan” morto of sanadónan bibu ta haci. Segun e Jornal da Tarde, e inmunólogo Dráusio Varella ta haña cu e creencia den curacionnan milagroso “ta haci bofon di e fe di esnan imprudente i di esnan desesperá.” E ta agregá: “Sperando den milager, kisas hopi ta bandoná tratamentu médico serio pa motibu dje engañadónan aki.” I The New Encyclopædia Britannica ta splica: “Den pasado sanacionnan no-ortodox a ser asociá cu lugánan sagrado i ritonan religioso, i ciencia médico ta incliná pa atribuí tur e sanacionnan ei n’e proceso normal di sugerencia cu ta funcioná bou di condicionnan faborabel.” Tog, tin hopi cu ta kere cu di berdad un milager a cura nan. Pa nan, e sanacion tabata eficas!
Esnan cu conocé Bijbel ta na haltura cu Jesucristo a sana e enfermonan na hopi ocasion, haciendo esaki cu e “poder di Dios.” (Lucas 9:42, 43) Pues, nan por puntra, ‘E poder di Dios ta obrando ainda i ta haciendo sanacionnan milagroso awe?’ Si ta asina, pakico intentonan pa cura ta keda sin trece e resultadonan primintí? Esei ta pa motibu cu e pashent no tin suficiente fe of pa motibu cu su donacion no ta suficiente grandi? Ta corecto pa un cristian busca un curacion milagroso ora e ta sufriendo di un malesa doloroso of tal bes incurabel? I e clase di curacionnan milagroso infalibel cu Jesus a efectuá lo sosodé un dia atrobe? Bo por haña e contestanan p’e preguntanan vital aki den e siguiente artículo.