Informe di Proclamadonan di Reino

Librando for di Influencia di Demoño

E PRACTICA di spiritismo pa hopi tempu a dominá bida di miyones di hende. Pero ta posibel pa libra for di dje! Esei ta loke a sosodé cu hopi hende den e antiguo stad di Efeso. Segun e relato bíblico, “basta hopi di esnan cu a practicá e arte di magia a trece nan bukinan huntu i a kima nan . . . Asina, di un manera poderoso e palabra di Jehova a sigui crece i prevalecé.”—Echonan 19:19, 20.

Awe e congregacion cristian tambe ta experenciando crecementu. Mescos cu tabata e caso den Efeso, entre esnan cu ta bira creyente, tin cu anteriormente tabata practicá demonismo. E siguiente experencia for di Zimbabwe ta ilustrá esaki.

Gogo (Wela) Mthupha tabata bon conocí pa su podernan spiritista. Hende tabata bini for di lugánan masha leu manera Zambia, Botswana i Sur Africa p’e trata nan cu su medicina tradicional. Gogo Mthupha tambe a siña otronan con pa ta un n’anga, of curandero. I algun biaha e tabata mara hende cu encanto!

Un diadomingo mainta dos Testigo di Jehova cu tabata trahando den e ministerio di cas-pa-cas a bishitá Gogo Mthupha. El a disfrutá mashá di un consideracion cu nan tocante e promesa di Bijbel di un mundu nobo di husticia, un mundu liber di tur influencia malbado. El a aceptá e buki Bo por biba pa semper den Paradijs riba tera i a bai di acuerdo pa haña un studio di Bijbel na cas.a Despues di solamente tres studio, el a cuminsá asistí na reunion.

Atrabes di su studio di Bijbel, Gogo Mthupha a siña cu su podernan special a bini for di criaturanan spiritual malbado cu a rebelá contra Jehova su soberania. (2 Pedro 2:4; Hudas 6) Tambe el a siña cu e demoñonan aki ta dicididu pa pone mas hende cu nan por bai contra Jehova i contra adoracion puru. Siendo cu su pan di cada dia a dependé riba inbocá e criaturanan spiritual malbado aki, kico lo el a haci?

Gogo Mthupha a expresá e deseo pa deshací di tur su amuletonan i pertenencianan spiritista. Esaki a incluí su adorno di cabes special i “cachunan di toro cu ta papia,” cu e tabata usa den su sanacionnan di n’anga. Gogo Mthupha kier a deshací di tur e cosnan aki p’e por a sirbi e único Dios bibu i berdadero, Jehova.

Pero algun di su famianan a oponé pasobra e tabata sostené nan financieramente. Nan a rogu’é p’e transferí e artículonan pa nan, huntu cu su podernan misterioso di manera cu nan por a sigui saca ganashi. Gogo Mthupha a nenga.

Cu yudansa dje congregacion local di Testigonan di Jehova, el a recogé tres sacu grandi di obhetonan spiritista i a kima nan tur. Segun cu vlamnan tabata caba cu su instrumentonan di adoracion di demoño, Gogo Mthupha a sclama: “Mira! E cachu ei, e no por salba ni su mes.”

Cu tempu, Gogo Mthupha yen di goso a simbolisá su dedicacion na Jehova pa medio di bautismo bou di awa. Con e ta gana su pan di cada dia awor? Bendiendo berdura. Sí, dor di e poder dje Palabra di Dios, un hende por libra su mes for di adoracion di demoño. Gogo Mthupha ta bisa: “Nunca mi a sintí mi asina liber.”

[Nota]